Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Suku Ruben ras Gat mbue kal lembuna. Asum iidahna uga cocokna taneh Jaser ras Gileat jadi ingan erlembu,
2 idahina Musa, Eleasar, ras kerina peminpin-peminpin perpulungen e, jenari nina,
3 "Daerah enda, si nggo iingani bangsanta bekas penampat TUHAN, eme kap kuta-kuta Atarot, Dibon, Jaser, Nimras, Hesbon, Eleale, Sipma, Nebo, ras Beon, tuhu-tuhu mehuli man ingan ngasuhi lembu, janah kami melala lembu kami.
4 (Bil 32:3)
5 Adi banci, berelah taneh enda jadi sikerajangen kami, janah ula kami suruh ngepari Lau Jordan, janah ringan i jah."
6 Erjabap Musa nina, "Uga? Atendu ringan tetap i jenda sedang senina-seninandu lawes erperang?
7 Ngkai maka iurakindu semangat bangsa Israel ngepari Jordan ku bas taneh si nggo ibereken TUHAN man bana?
8 Bagenda me perbahanen bapa-bapandu pe asum kusuruh ia i Kades Barnea nari gelah iselidikina taneh e.
9 Lawes ia seh ku berneh Eskol janah idahna taneh e, tapi kenca ia mulih, ipebiar-biarna bangsa e gelah ula mengketi taneh si nggo ibereken TUHAN man bana.
10 I bas wari e merawa TUHAN, jenari IbahanNa sada padan, nina,
11 'Ersumpah Aku maka erkite-kiteken la kalak enda tetap patuh man bangKu, la lit sada pe si umurna dua puluh tahun ntah pe lebih si ndarat i Mesir nari banci ngidah taneh si nggo Kupadanken man Abraham, Isak, ras Jakup,'
12 seakatan Kalep anak Jepune, terpuk Kenis, ras Josua anak Nun; ia duana tetap ngikutken TUHAN alu bulat ukur.
13 TUHAN merawa man bangsa e jenari IbahanNa maka mampa-mampa ia i taneh si mesawang empat puluh tahun dekahna, seh maka kalak si erbahanca Ia nembeh ndai nggo mate kerina.
14 Janah genduari perbahanenndu nggo ka bali ras bapa-bapandu ndai, o kam kesusuren manusia si perdosa, si erbahanca maka gara ka mulihken pernembeh ate TUHAN man Israel.
15 Adi kam suku Ruben ras Gat la nggit ngikutken ia genduari, la banci la ItadingkenNa ka mulihken bangsa enda kerina mampa-mampa i bas taneh si mesawang, janah erkite-kiteken kam maka ia bene kerina."
16 Tapi meseksek pemindon kalak e man Musa nina, "Berelah min kami lebe erbahan karang biri-biri kami i bas batu nari ras erbahan benteng kuta-kuta man ingan tading ndehara ras anak-anak kami i jenda.
17 Kenca dung si e kami nggo banci lawes erperang ras senina-senina kami kalak Israel, janah kami gia arah lebe, seh nggo ipetetap kami inganna i bas taneh si jadi sikerajangenna. Tupung si e, ndehara ras anak-anak kami banci ringan i jenda i bas kuta-kuta si erbenteng, aman i bas ganggun kalak si ringan i bas taneh enda nari.
18 La kami mulih ku rumah kami seh kerina bangsa Israel si debanna nggo ndat baginna i bas taneh si nggo itentuken man bana.
19 Taneh si arah lepar Jordan si man bana e la sitik pe ibuat kami jadi sikerajangen kami, sabap nggo ialoken kami bagin kami i jenda arah Timur Lau Jordan."
20 Ngaloi Musa nina, "Adi payo kin i bas ukurndu nari si ikatakenndu e, i jenda, i lebe-lebe TUHAN, ersikap dage kam guna lawes ku bas pertempuren.
21 Kerina dilaki i bas kam si ngasup erperang arus ngepari Jordan, janah i teruh perentah TUHAN arus iserang musuh-musuhta seh italuken TUHAN kerina musuh e,
22 janah IbuatNa negeri e. Kenca si e, banci kam mulih, sabap nggo isehkenndu tanggung jawabndu man TUHAN ras man senina-seninandu bangsa Israel. Jenari taneh enda si arah Timur Jordan iakui TUHAN man sikerajangenndu.
23 Tapi adi la itepatindu padanndu, kupersingeti man bandu maka erdosa kam man TUHAN. Ula tipu bandu, sabap la banci la kam iukum erkite-kiteken dosandu.
24 Emaka bahanlah dage benteng kuta-kutandu ras karang biri-birindu, tapi bahanlah kai si nggo ipadankenndu!"
25 Nina dilaki-dilaki i bas merga Gat ras Ruben, "Sue ras perentahndu, bage me ibahan kami.
26 Ndehara ras anak-anak kami bage pe lembu ras biri-biri kami tading i jenda i bas kuta-kuta Gileat.
27 Tapi kerina kami nggo sikap lawes erperang i teruh perentah TUHAN. Ikepari kami Lau Jordan guna erperang, sue ras si nggo ikatakenndu."
28 Emaka ibereken Musa perentah-perentah enda man Eleasar, Josua, ras peminpin-peminpin suku-suku Israel nina,
29 "Adi ikepari kalak Gat ras Ruben Lau Jordan janah nggit ia erperang i teruh perentah TUHAN, jenari adi arah penampatna ngasup kam engkuasai taneh e, emaka berekenlah man bana taneh Gileat jadi sikerajangenna.
30 Tapi adi la ikeparina Lau Jordan janah la ia nggit lawes ras kam erperang, ia la banci lang ngaloken taneh baginna i bas taneh Kanaan, bali ras kam."
31 Nina kalak Gat ras Ruben erjabap, "Sue ras si nggo iperentahken TUHAN, bage me ibahan kami.
32 I teruh PerentahNa nggit kami ngepar ku taneh Kanaan janah erperang, gelah taneh si arah Timur Lau Jordan enda banci jadi sikerajangen kami."
33 Emaka ibereken Musa man suku Gat ras Ruben bage pe man setengah i bas suku Manase kerina daerah Raja Sihon, kalak Amori e, ras daerah Raja Og i Basan nari, subuk kuta-kuta ras taneh si lit i sekelewetna.
34 Ibangun suku Gat mulihken kuta-kuta si ibentasi, eme: Dibon, Atarot, Aroer,
35 Atarot-Sopan, Jaser, Jokbeha,
36 Bet-Nimra ras Bet-Haran.
37 Kuta-kuta si ibangun merga Ruben mulihken, eme: Hesbon, Eleale, Kiriataim,
38 Nebo, Baal Meon (gelar kuta si enda isambari), ras Sipma. Ibahanna gelar si mbaru man kuta-kuta si ibangun e mulihken.
39 Terpuk Mahir anak Manase iserangna taneh Gileat, iinganina taneh e, jenari ipelawesna kalak Amori si ringan i je.
40 Emaka ibereken Musa taneh Gileat man terpuk Mahir, janah i je me ia ringan.
41 Jair, i bas suku Manase nari, iserangna ras ikuasaina piga-piga kuta jenari igelarina kuta-kuta e "Kuta-kuta Jair".
42 Nobah, iserang ras ikuasaina Kenat ras kuta-kutana, jenari isambarina gelar kuta e jadi Nobah, sue ras gelarna jine.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA