Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhabuna PANGERAN ka Mosa,
2 "Okom reng-oreng Midian polana se marogi ban masossa bangsa Isra’il. Saellana jareya ba’na bakal mateya."
3 Daddi Mosa laju adhabu ka bangsa Isra’il, "Mara sadhiya’agi sanjatana, pas mangkat merrange bangsa Midian, sopaja ba’na ngennenga neba’agi okomanna PANGERAN ka bangsa jareya.
4 Saneyap suku Isra’il kodu nyadhiya’agi tantara saebu oreng se epamangkada aperrang."
5 Daddi dhari saneyap suku Isra’il epele oreng saebu, bannya’na kabbi dhubellas ebu se epamangkada aperrang.
6 Mosa makon reng-oreng jareya mangkat aperrang, se epimpin Pinehas, pottrana Imam Eleyazar. Pinehas ngeba rang-barang se socce sarta pet-tarompet se eangguya aberri’ dha-tandha.
7 Menorot dhabuna PANGERAN ka Mosa, oreng Isra’il nyerrang oreng Midian, lalake’an Midian epate’e kabbi,
8 tamaso’ rato Midian se kalema, iya areya Ewi, Rekem, Zur, Hur ban Reba. Bileyam, ana’na Beor, epate’e keya.
9 Reng-oreng Isra’il nangkep babine’an ban na’-kana’ Midian, sarta arampas keban ban ebinna, sarta sakabbinna dhi’-andhi’na.
10 Tha-kottha ban parkemahan-parkemahanna eobbar.
11 Saellana jareya reng-oreng Isra’il ngala’ sakabbinna hasella rampasan, tamaso’ reng-oreng tahanan sarta ban-keban,
12 jareya kabbi egiba ka Mosa ban ka Imam Eleyazar sarta ka sakabbinna ommat Isra’il, se e bakto jareya teppa’na akemah e tana lapang Mo’ab, e penggirra Songay Yordan, e seddi’anna kottha Yerikho.
13 Mosa, Imam Eleyazar ban sakabbinna pamimpinna ommat Isra’il kalowar dhari parkemahan ngamba’a sardhadhu Isra’il.
14 Mosa duka ka para parwira, para kapalana pasukan ban kapalana laskar se gi’ buru abali dhari paperrangan jareya.
15 Dhabuna ka reng-oreng jareya, "Arapa babine’an jareya me’ ta’ epate’e?
16 Gu ta’ babine’an jareya se norodi petoduna Bileyam, ban nyacae ommat Isra’il e Peyor, eajak mongkore PANGERAN, ta’ iya? Ban jareya se madhateng balai ka ommadda PANGERAN!
17 Daddi sateya pate’e kabbi na’-kana’ lalake’an ban oreng babine’an se la ta’ paraban.
18 Tape babine’an se gi’ paraban olle kala’ ba’na.
19 Ban ba’na kabbi se la mate’e oreng otabana se nyedding mayyit kodu neng e lowarra parkemahan sampe’ pettong are abidda. E are se kapeng tello’ ban se kapeng petto’ ba’na ban sakabbinna babine’an se etawan bi’ ba’na kodu padha mabadha opacara nyocce’e aba’.
20 Sabarnana angguy, ban apa’a bai se ekagabay dhari kole’, buluna embi’ otaba kaju, kodu esocce’e keya."
21 Saellana jareya Imam Eleyazar adhabu ka reng-oreng se gi’ buru abali dhari paperrangan jareya, "Areya’ atoran-atoran se eparengngagi PANGERAN ka Mosa.
22 Sabarang se ta’ tahan apoy, akantha emmas, salaka, dimbaga, besse, tema pote ban tema celleng, kodu esocce’e e dhalem apoy. Rang-barang laenna kodu esocce’e bi’ aeng opacarana panyocceyan.
23 (31:22)
24 E are se kapeng petto’ ba’na kodu nyassa angguyya; samarena jareya buru ba’na ta’ najjis pole, ban olle maso’ ka dhalem parkemahan."
25 Dhabuna PANGERAN ka Mosa,
26 "Ba’na ban Imam Eleyazar ban para pamimpinna ommat Isra’il se laen, kodu ngetong sakabbinna hasella rampasan, tamaso’ tawanan sarta ban-keban.
27 Hasella rampasan jareya kodu ebagi dhuwa’, papadha; saparo bagi ka tantara se mole dhari aperrang, ban saparona bagi ka ommat Isra’il laenna.
28 Dhari bagiyan se ebagi ka tantara gella’, sabban lema ratos oreng tawanan, otabana sape, hemar, dumba ban embi’, kodu kala’ settong, gabay tor-ator se malolo ka Sengko’, PANGERAN.
29 Bagi jareya ka Imam Eleyazar menangka tor-ator se malolo ka Sengko’, PANGERAN.
30 Dhari bagiyan se ebagi ka ommat Isra’il laenna, sabban saeket oreng tawanan, sape, hemar, dumba ban embi’, kodu ekala’ settong, bagi ka oreng Lewi se ngoros Tang Kemah."
31 Mosa ban Imam Eleyazar alampa’agi jareya menorot se edhabuwagi PANGERAN.
32 Salaenna se la ekala’ dibi’ bi’ tantara, gi’ badha hasella rampasan laen, iya areya: dumba ban embi’ nem atos pettong polo lema’ ebu, sape pettong polo dhuwa’ ebu, hemar sabidak settong ebu, sarta babine’an se gi’ paraban tello polo dhuwa’ ebu.
33 (31:32)
34 (31:32)
35 (31:32)
36 Se saparo ebagi ka tantara se dhateng dhari aperrang, iya areya: dumba ban embi’ tello ratos tello polo petto’ ebu lema ratos, se nem atos pettong polo lema’ egabay tor-ator se malolo ka PANGERAN; sape tello polo ennem ebu, se pettong polo dhuwa’ egabay tor-ator se malolo ka PANGERAN; hemar tello polo ebu lema ratos, se sabidak settong egabay tor-ator se malolo ka PANGERAN; babine’an se gi’ paraban nem bellas ebu, se tello polo dhuwa’ egabay tor-ator se malolo ka PANGERAN.
37 (31:36)
38 (31:36)
39 (31:36)
40 (31:36)
41 Mosa laju massra’agi tor-ator jareya ka Imam Eleyazar, kaangguy tor-ator ka PANGERAN, akantha se la edhabuwagi PANGERAN.
42 Bagiyan se ebagi ka ra’yat padha bannya’na bi’ bagiyan se ebagi ka tantara, iya areya: dumba ban embi’ tello ratos tello polo petto’ ebu lema ratos, sape tello polo ennem ebu, hemar tello polo ebu lema ratos, ban babine’ se gi’ paraban nem bellas ebu.
43 (31:42)
44 (31:42)
45 (31:42)
46 (31:42)
47 Menorot se edhabuwagi PANGERAN, dhari sabban saeket oreng tawanan sarta keban, bi’ Mosa epondhut settong, pas eparengngagi ka reng-oreng Lewi se atugas e Kemah Socce.
48 Saellana jareya, para parwira se mimpin tantara Isra’il, ngadhep Mosa,
49 laju mator kantha reya, "Tantara baba’an abdina sadaja ampon padha ebitong, genna’ sadaja, tadha’ korangnga sanare kasorang.
50 Daddi abdina sakanca padha ngeba barang mas-emmasan, lang-gellang tanang, gellang soko, sello’, anteng, sareng kalong ollena bagiyanna bang-sebang. Sadajana eatorragiya ka PANGERAN menangka tor-ator, sopaja PANGERAN teptebba ajaga sareng apareng kasalameddan ka abdina sadaja."
51 Mosa ban Imam Eleyazar laju narema emmas jareya, se aropa gellang ban en-laenna.
52 Tor-atorra para parwira jareya berra’na para’ dhu ratos kilo.
53 Tape tantara jareya la padha ngala’ bagiyanna bang-sebang.
54 Daddi bi’ Mosa ban Eleyazar emmas jareya ebakta ka Kemah Socce sopaja PANGERAN ajaga’a ban aparenga salamet ka bangsa Isra’il.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA