Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On do ginompar ni si Aron pakon si Musa bani panorang sanggah na marsahap Jahowa hubani si Musa i Dolog Sinai.
2 On do goran ni anak ni si Aron: Si Nadab bunga tubuhni, si Abihu, si Eleasar pakon si Itamar.
3 Ai ma goran-goran ni anak ni si Aron, na niminakan gabe malim, na dob pinabangkit mangkorjahon hamalimon.
4 Tapi domma matei popor anggo si Nadab pakon si Abihu i lobei ni Jahowa sanggah na binoban ni sidea apuy na legan hu lobei ni Jahowa i halimisan dohorhon Sinai; jadi si Eleasar pakon si Itamar ma mangkorjahon hamalimon ai i lobei ni si Aron bapa ni sidea ai.
5 Dob ai nini Jahowa ma hubani si Musa,
6 “Hatahon ma roh hun dohor marga Levi, anjaha pajongjong ma sidea i lobei ni Malim Aron, ase marugas sidea bani,
7 ase ihorjahon sidea horja na bani si Aron pakon horja na bani ganup tumpuan ai i lobei ni lampolampo ai, sanggah na marugas ai sidea bani lampolampo ai;
8 lanjar sidea do na paturei-tureihon sagala parugas ni lampolampo partumpuan ai pakon mandalankon horja na porlu bani halak Israel, sanggah na marugas ai sidea bani lampolampo ai.
9 Maningon ondoskononmu do halak Levi in hubani si Aron pakon hubani anakni ai; sidea do na dob niondoskon bani hun tongah-tongah ni halak Israel.
10 Tapi anggo si Aron pakon anakni ai maningon pabangkitonmu do mangkorjahon hamalimon ni sidea ai, tapi anggo roh hundohor halak na legan, maningon marutang hosah do ia.”
11 Dob ai nini Jahowa ma hubani si Musa,
12 “Tonggor ma, domma Hutodoh halak Levi hun tongah-tongah ni halak Israel bahen gantih ni sagala bunga tubuh humbani halak Israel, ai ma gantihni, na parlobei luar hun partapaan, ase Ahu simada halak Levi;
13 ai Ahu do simada sagala bunga tubuh. Singgan ni ari dob Hubunuh sagala bunga tubuh i tanoh Masir, domma Hupapansing Bangku sagala bunga tubuh i Israel humbani jolma ronsi pinahan; maningon Ahu do simadasi, Ahu do Jahowa.”
14 Dob ai nini Jahowa ma hubani si Musa i halimisan dohorhon Sinai,
15 “Bilangi ma halak Levi mar sasaompung pakon mar sasamarga; sagala dalahi na marumur sabulan pakon lobih hunjai maningon bilanganmu do sidea.”
16 Jadi ibilangi si Musa ma sidea romban hubani hata ni Jahowa songon na dob tinonahkon-Ni ai.
17 Anjaha on ma goran ni anak ni si Levi: Si Gerson, si Kahat pakon si Merari.
18 On do goran ni anak ni si Gerson mangihutkon marga ni sidea ai: Si Libni pakon si Simei.
19 Anak ni si Kahat mangihutkon marga ni sidea, “si Amram, si Jizhar, si Hebron pakon si Usiel.”
20 Anjaha anak ni si Merari mangihutkon marga ni sidea, “si Mahli pakon si Musi. Ai ma marga ni halak Levi mar sasaompung.
21 Humbani si Gerson roh marga ni halak Libni pakon marga ni halak Simei; ai ma marga humbani ginompar ni si Gerson.
22 Buei ni bilangan ni sidea, sagala dalahi singgan na marumur sabulan pakon lobih hunjai pitu ribu lima ratus halak do.
23 Ginompar ni si Gerson, maningon marsaran i pudi ni lampolampo ai hampit hasundutan,
24 anjaha si Eliasap, anak ni si Lael do pambobai ni ginompar ni si Gerson.
25 Anak ni si Gerson ai do haondosan ni lampolampo partumpuan, poti parpadanan, tirei ampa langit-langitni pakon tirei ni labah harorohan hu lampolampo partumpuan ai,
26 sonai homa tirei ni alaman pakon tirei ni labah harorohan hu alaman inggot ni lampolampo ai pakon inggot ni anjapanjap ai ampa tali-talini ambahni ai sagala horja na mardomu hujai.
27 Humbani si Kahat do roh marga ni halak Amram, marga ni halak Jizhar, marga ni halak Hebron pakon marga ni halak Usiel; ai ma marga humbani ginompar ni si Kahat.
28 Ia bilangan ni sagala dalahi singgan ni marumur sabulan pakon i atasni ai ualuh ribu onom ratus halak do, sagala na marugas ibagas ianan na pansing ai.
29 Ia ginompar ni si Kahat maningon marsaran do i lambung ni lampolampo ai hampit dangsina,
30 anjaha si Elisapan, anak ni si Usiel do pambobai ni ginompar ni si Kahat.
31 Sidea do haondosan ni poti, meja, parpalitaan, anjapanjap pakon parugas na pansing ai, na pinakei sanggah marugas, sonai homa tirei ai rap pakon ganup parugasni, ambahni ai sagala horja na mardomu hujai.
32 Kopala ni pambobai ni halak Levi ai ma si Eleasar, anak ni Malim Aron, ia do haondosan ni halak, sagala na marugas bani ianan na pansing ai.
33 Humbani si Merari do roh marga ni halak Mahli pakon marga ni halak Musi, ai ma marga humbani ginompar ni si Merari.
34 Ia buei ni bilangan ni sidea, sagala dalahi na marumur sabulan pakon i atasni ai onom ribu dua ratus halak do.
35 Anjaha si Zuriel, anak ni si Abihail do pambobai ni ginompar ni si Merari, anjaha maningon marsaran do sidea i lambung ni lampolampo ai hampit utara.
36 Maningon anak ni si Merari do haondosan ni papan ni lampolampo ai, ransang-ransangni, tiangni, nahei ni tiang ai pakon ganup parugasni, ambahni ai sagala horja na mardomu hujai;
37 ambah ni ai tiang ni alaman ai inggot pakon naheini, pakuni pakon talini.
38 Halak na marsaran i lobei ni lampolampo partumpuan ai dompak hapoltakan ni mata ni ari, ai ma si Musa, si Aron pakon anakni ai; sidea do na mandalankon horja bani ianan na pansing ai, laho mangugaskon horja haporluan ni halak Israel. Barang ise halak na legan na roh hun dohor maningon marutang hosah do ia.”
39 Sagala na tarbilang humbani halak Levi, sagala na binilang ni si Musa pakon si Aron, romban hubani na tinonahkon ni Jahowa, mangihutkon margani bei, sagala dalahi na marumur sabulan pakon i atasni ai, dua puluh dua ribu halak do bueini.
40 Dob ai nini Jahowa ma hubani si Musa, “Bilangi ma sagala bunga tubuh i tongah-tongah ni halak Israel, singgan na marumur sabulan pakon i atasni ai, anjaha buat ma homa bilangan ni goran-goran ni sidea.
41 Papulig ma halak Levi Bangku -- Ahu do Jahowa -- gantih ni sagala dalahi bunga tubuh i tongah-tongah ni halak Israel, pakon pinahan ni halak Levi, gantih ni sagala bunga tubuh i tongah-tongah ni pinahan ni halak Israel.”
42 Jadi ibilangi si Musa ma sagala bunga tubuh i tongah-tongah ni halak Israel, songon na tinonahkon ni Jahowa hu bani.
43 Anjaha sagala bunga tubuh dalahi na tarbilang ai, mangihutkon bilangan ni goran-goran, singgan ni na marumur sabulan pakon i atasni ai, dua puluh dua ribu dua ratus pitu puluh tolu halak do bueini.
44 Dob ai nini Jahowa ma hubani si Musa,
45 “Buat ma halak Levi gantih ni sagala bunga tubuh i tongah-tongah ni halak Israel, pakon pinahan ni halak Levi gantih ni pinahan ni sidea, ase Ahu simada halak Levi, Ahu do Jahowa.
46 Bahen partobus ni sidua ratus pitu puluh tolu halak bunga tubuh ni halak Israel, na lobih humbani bilangan ni halak Levi,
47 maningon buatonmu do lima sekel pirak tobus ni ganup halak, mangihutkon sekel na bani ianan na pansing ai do buatonmu ai, ai ma dua puluh gera sasekel.
48 Maningon bereonmu do pirak partobus ni halak na ganda ai hubani si Aron pakon hubani anakni ai.”
49 Jadi ibuat si Musa ma pirak partobus ai humbani halak na ganda, sagala na tinobus ni halak Levi ai.
50 Humbani bunga tubuh ni halak Israel do ibuat pirak ai, saribu tolu ratus onom puluh lima sekel, marguru hubani sekel bani ianan na pansing ai.
51 Dob ai ibere si Musa ma pirak partobus ai hubani si Aron pakon hubani anakni ai, romban hubani hata ni Jahowa, songon na tinonahkon ni Jahowa hubani si Musa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA