Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Areya’ toronanna Harun ban Mosa e bakto PANGERAN abu-dhabu ka Mosa e attas Gunong Sinay.
2 Harun kaagungan pottra lalake’ kaempa: Nadab se sareyang, pas Abihu, Eleyazar ban Itamar.
3 Se kaempa jareya padha etahbissagi epadaddi imam ngangguy opacara eselene mennya’ e attassa serana.
4 Tape Nadab ban Abihu seda e ra-ara beddhi Sinay, e bakto ngadhep ka PANGERAN ngatorragi apoy se ta’ halal. Se kadhuwa jareya ta’ kaagungan pottra, daddi e bakto Harun gi’ odhi’, Eleyazar ban Itamar se abakte daddi imam.
5 Dhabuna PANGERAN ka Mosa,
6 "Olok suku Lewi soro ngadhep ka ba’na, reng-oreng jareya kabbi padha soro aladine Harun.
7 Kabbi kodu ajalannagi lalakon e Tang Kemah Socce, iya areya aladine imam ban sakabbinna ommat.
8 Reng-oreng jareya kodu ngoros parabudda Tang Kemah Socce, ban ajalannagi lalakon e Tang Kemah jareya menangka gantena reng-oreng Isra’il.
9 Dhari bangsa Isra’il, pera’ suku Lewi se bi’ Sengko’ epele epadaddi pangladin se teptep se kodu aladine Harun ban na’ potona.
10 Tape ba’na kodu ngangkat Harun ban na’-ana’na kaangguy ajalannagi lalakonna imam; sapa’a bai, oreng laenna, se ngoddi ngalakonana lalakon jareya kodu eokom mate."
11 Dhabuna PANGERAN ka Mosa,
12 "Sateya reng-oreng Lewi bi’ Sengko’ epadaddi Tang andhi’. E bakto Sengko’ mate’e sakabbinna ana’ sareyang e Messer, sakabbinna ana’ sareyangnga oreng Isra’il ban sakabbinna budhu’ sareyangnga ebinna bi’ Sengko’ eteptebbagi daddi Tang andhi’ malolo. Menangka gantena ana’ sareyangnga oreng Isra’il, Sengko’ sateya ngala’ suku Lewi, se epadaddi Tang andhi’ malolo. Sengko’ reya PANGERAN."
13 (3:12)
14 E ra-ara beddhi Sinay PANGERAN makon Mosa
15 abadhi dhaftarra reng-oreng Lewi menorot kaomma ban kalowargana bang-sebang; saneyap ana’ lalake’ se aomor sabulan ka attas kodu ecathet nyamana.
16 Papakon jareya bi’ Mosa elampa’agi.
17 Lewi andhi’ ana’ lalake’ katello: Gerson, Kehat ban Merari, bangatowana om-kaom se enyamae menorot nyamana se katello jareya. Gerson andhi’ ana’ lalake’ kadhuwa: Libni ban Simei. Kehat andhi’ ana’ lalake’ kaempa: Amram, Yizhar, Hebron ban Uziyel. Merari andhi’ ana’ lalake’ kadhuwa: Mahli ban Mosi. Jareya bangatowana om-kaom se enyamae menorot nyamana reng-oreng jareya.
18 (3:17)
19 (3:17)
20 (3:17)
21 Se tamaso’ suku Gerson iya areya kaom Libni ban Simei.
22 Bannya’na lalake’anna kaom Gerson se aomor sabulan ka attas se ecathet badha pettong ebu lema ratos oreng.
23 Kaom jareya ekapalae Elyasaf ana’na Lael. E parkemahanna bangsa Isra’il kaom jareya ngala’ kennengngan e bagiyan bara’ e budhina Kemah Socce.
24 (3:23)
25 Lakona kaom jareya kodu ngoros Kemah Socce, ban kodhungnga bagiyan dhalem ban bagiyan lowar, bir-tabirra labangnga,
26 bir-tabirra taneyan e sakalenglengnga Kemah ban mezba, sarta bir-tabirra labangnga taneyan jareya ban talena. Reng-oreng jareya wajib ngalakone sakabbinna lalakon se badha hubunganna ban rang-barang jareya.
27 Se tamaso’ suku Kehat iya areya kaom Amram, Yizhar, Hebron ban Uziyel.
28 Lalake’an se aomor sabulan ka attas dhari kaom jareya bannya’na ballung ebu nem atos oreng. Reng-oreng jareya wajib ngoros rang-barang e Kemah Socce.
29 Kaom jareya ekapalae Elisafan ana’na Uziyel. E parkemahan, kaom jareya ngala’ kennengngan e bagiyan lao’na Kemah Socce.
30 (3:29)
31 Reng-oreng jareya wajib ngoros Petthe Parjanjiyan, meja, ko’-tongko’na damar, ba-mezba, but-parabut se eangguy para imam e Rowangan Se Socce, ban bir-tabir se malaen Rowangan Se Socce. Reng-oreng jareya wajib ngalakone sakabbinna lalakon se badha hubunganna ban rang-barang jareya.
32 Kapalana suku Lewi reya Eleyazar, pottrana Harun. Eleyazar jareya se ajaga reng-oreng se wajib alako e Rowangan Se Socce.
33 Se tamaso’ suku Merari iya areya kaom Mahli ban Mosi.
34 Lalake’an se aomor sabulan ka attas dhari kaom jareya bannya’na kabbi nem ebu dhu ratos oreng.
35 Kapalana kaom jareya Zuriyel ana’na Abihail. E parkemahan kaom jareya ngala’ kennengngan e dhaja’anna Kemah Socce.
36 Reng-oreng jareya se kodu ngoros rangkana Kemah Socce, lo’-balo’na, ga-canggana, langganna, ban sakabbinna pakakas tor sakabbinna lalakon se badha hubunganna ban rang-barang jareya,
37 bariya keya ga-cangga, panongko’anna ga-cangga, ji-paji ban le-talena taneyan lowar.
38 Mosa ban Harun ban tra-pottrana kodu masang kemahna e adha’anna Kemah Socce e bagiyan temor. Reng-oreng jareya wajib ajalannagi opacara kabakteyan kaangguy bangsa Isra’il e Rowangan Se Socce. Salaenna reng-oreng jareya, sapa’a bai se ngoddi ajalannagiya lalakon jareya kodu eokom mate.
39 Lalake’anna suku Lewi se aomor sabulan ka attas se ecathet bi’ Mosa menorot kaomma bang-sebang menorot papakonna PANGERAN, bannya’na kabbi dhu lekor ebu oreng.
40 Dhabuna PANGERAN ka Mosa, "Sakabbinna ana’ lalake’ sareyangnga oreng Isra’il Tang andhi’. Cathet nyamana na’-kana’ jareya se omorra sabulan ka attas. Tape menangka gantena Sengko’ anyata’agi reng-oreng Lewi daddi Tang andhi’ kabbi. Sengko’ PANGERAN! Bariya keya ebinna oreng Lewi bi’ Sengko’ enyata’agi daddi gantena sakabbinna budhu’ sareyangnga ebinna bangsa Isra’il."
41 (3:40)
42 Mosa alampa’agi papakonna PANGERAN jareya; nyamana ana’ lalake’ se sareyang
43 se aomor sabulan ka attas ecathet kabbi. Bannya’na kabbi dhu lekor ebu dhu ratos pettong polo tello’ oreng.
44 Dhabuna PANGERAN ka Mosa,
45 "Reng-oreng Lewi jareya padaddi Tang andhi’ malolo menangka gantena ana’ lalake’anna oreng Isra’il se sareyang, bariya keya ebinna oreng Lewi menangka gantena ebinna oreng Isra’il.
46 Sarrena ana’ lalake’anna oreng Isra’il se sareyang abannya’an dhu ratos pettong polo tello’ dhari bannya’na oreng Lewi, lebbina jareya kodu etebbus.
47 Rang-sorangnga kodu etebbus ban pesse salaka lalema’ menorot arga e Tang Kemah;
48 bajarragi pesse jareya ka Harun ban na’-ana’na."
49 Mosa alampa’agi papakonna PANGERAN jareya,
50 mondhut pesse salaka saebu tello ratos sabidak lema’,
51 laju epassra’agi ka Harun ban tra-pottrana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA