Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhabuna Bileyam ka Balak, "Ngereng abdidalem badhiyagi mezba pettong meggi’, sareng sadhiya’agi sape lalake’ papetto’ sareng dumba lalake’ papetto’."
2 Apa panyo’onna Bileyam jareya bi’ Balak etorodi. E mezba se papetto’ jareya esaba’i sape lake’ ban dumba lake’ settong ebang menangka kurban.
3 Atorra Bileyam ka Balak, "Ngereng junandalem ngadek e seddi’anna kurban kaagunganna. Abdidalem gi’ nengalana ponapa PANGERAN manggiyana abdidalem ponapa bunten. Saamponna, junandalem eatorana oneng ponapa se edhabuwagi PANGERAN ka abdidalem." Bileyam laju ongga ka konco’na gumo’ kadibi’an,
4 e jadhiya Allah ngaton ka salerana. Atorra Bileyam ka Allah, "Abdidalem ampon maddek mezba papetto’, ngatorragi sape sareng dumba settong ebang e saneyap mezba gapaneka."
5 PANGERAN apareng oneng ka Bileyam apa se kodu edhabuwagi; saellana jareya Bileyam laju epakon abali ka Balak.
6 Sanapa’na ka baba, Balak epanggi gi’ ngadek e seddi’anna kurban obbaranna, apolong ban para pamimpinna bangsa Mo’ab.
7 Bileyam laju adhabuwagi nobuwat kantha reya: "Dhari Aram, pagunongan e temor rowa, sengko’ ekone’e Balak, rato Mo’ab. Dhabuna, ‘Mara dha’ enna’, bastowagi bangsa Isra’il rowa!’
8 Baramma sengko’ se abastowa, bangsa se ta’ ebasto bi’ Allah? Baramma sengko’ se ngokoma, bangsa se ta’ eokom PANGERAN?
9 Dhari konco’na nong-gunong sengko’ nangale’e bangsa jareya; dhari nong-gunong sengko’ ngabassagi tengka gulina. Bangsa jareya banneyan ban sa-bangsa laenna, ta’ padha ban sa-bangsa e dunnya.
10 Toronanna Isra’il padha ban abu bannya’na, ta’ ekenneng bitong bi’ manossa. Sengko’ mandar mateya akantha oreng se jujur rowa, tang ajal mandar padha’a ban ajalla ommadda Allah jareya."
11 Dhabuna Balak ka Bileyam, "Ba’na reya baramma? Bi’ sengko’ ba’na egiba dha’ enna’ esoro abasto tang moso, me’ daddi bi’ ba’na la’-mala’ eberkadi."
12 Atorra Bileyam, "Abdidalem namong kengeng ngoca’agi pa-ponapa se epakonnagi sareng PANGERAN."
13 Dhabuna Balak ka Bileyam, "Mara sateya ba’na noro’ sengko’ ka kennengngan laen; dhari dhissa’ ba’na pera’ bisa nangale’e sabagiyan dhari bangsa Isra’il. Bastowagi bangsa jareya dhari jadhiya."
14 Balak laju abakta Bileyam ka talon Zofim e konco’na Gunong Pisga. E jadhiya Balak maddek mezba pettong meggi’; e attassa mezba se papetto’ jareya esaba’i sape lake’ ban dumba lake’ settong ebang.
15 Atorra Bileyam ka Balak, "Ngereng junandalem ngadek e seddi’anna kurban obbaranna kaagunganna, abdidalem gi’ badhi manggi’i PANGERAN."
16 PANGERAN manggi’i Bileyam pas apareng oneng apa se kodu edhabuwagi, saellana jareya Bileyam laju epakon abali ka Balak.
17 Sanapa’na ka baba, Balak epanggi gi’ ngadek e seddi’anna kurban obbaranna, apolong ban para pamimpinna bangsa Mo’ab. Dhabuna Balak, "Baramma ca’na dhabuna PANGERAN?"
18 Bileyam laju adhabuwagi nobuwat kantha reya: "Balak, pottrana Zipor, ngereng kasokana peyarsa’agi.
19 Allah ka’dhinto ta’ padha sareng manossa se dujan lecek cacana. Manabi Allah ajanji, tanto eteptebbi! Manabi Allah adhabu, tanto dhabuna elampa’agi!
20 Abdidalem epakon aberkadi. Dineng manabi Allah aberkadi, berkadda ta’ ekenneng cabut pole.
21 Yakub tadha’ kajahadanna Isra’il tadha’ kasossa’anna sabab Isra’il terros etolonge PANGERAN. Allah se esemba bangsa gapaneka, Allah se eako menangka ratona!
22 Allah se makalowar bangsa gapaneka dhari Messer; se nolonge aperrang akadi bantheng.
23 Tadha’ wa’-duwa’, tennong otaba seher se meddhas ka bangsa Isra’il. Ca’epon oreng parkara bangsa gapaneka, ‘Abas, ra, ajib onggu se elampa’agi Allah!’
24 Bangsa Isra’il padha sareng macan se ta’ poron neng-enneng otaba dhung-tedhungan, manabi gi’ ta’ kengeng nyeppa’ mosona, sareng gi’ ta’ ngero’ dharana mosona se esargep bi’ cakarra."
25 Dhabuna Balak ka Bileyam, "Mon ba’na ta’ endha’ abasto bangsa Isra’il, iya ella, tape ja’ sampe’ ba’na la’-mala’ aberkadi."
26 Saodda Bileyam, "Abdidalem gu ta’ ampon mator ja’ abdidalem kodu ajalannagi sadajana dhabuna PANGERAN?"
27 Dhabuna Balak ka Bileyam, "Mara noro’ sengko’ ka kennengngan laen. Pola bi’ Allah ba’na eedine abastowagi bangsa Isra’il dhari dhissa’."
28 Balak laju abakta Bileyam ka konco’na Gunong Peyor se dhep-adhebban bi’ sagara beddhi.
29 Atorra Bileyam ka Balak, "Ngereng abdidalem maddeggagi mezba papetto’, sareng sadhiya’agi sape lalake’ papetto’ sareng dumba lalake’ papetto’."
30 Balak norodi parnyo’onanna Bileyam jareya. E mezba se papetto’ jareya esaba’i sape lake’ ban dumba lake’ settong ebang.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA