Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina Bilham man Balak, "Pajekkenlah pitu batar-batar i jenda man bangku, jenari bereken man bangku pitu jenggi lembu ras pitu bajar biri-biri."
2 Minter ibahan Balak bagi si ikataken Bilham man bana, jenari ia ras Bilham erbahan persembahen sada jenggi lembu ras sada bajar biri-biri i bas tep-tep batar-batar.
3 Jenari nina Bilham man Balak, "Tedislah i jenda deherken persembahen tutungenndu, janah aku lawes lebe ngenehenca ntah ijumpai TUHAN aku ntah lang. Kuturiken kari man bandu kerina si IpetangkasNa man bangku." Emaka lawes ia sisada ku das sada uruk-uruk,
4 jenari ijumpai Dibata ia. Nina Bilham man BaNa, "Nggo kupajekken batar-batar si pitu e ras kupersembahken sada jenggi lembu ras sada bajar biri-biri i bas tep-tep batar-batar."
5 Ituriken TUHAN man Bilham kai si man katanken jenari IsuruhNa ia mulihken ndahi Balak nehken tenahna e.
6 Emaka lawes ia mulihken janah idahna Balak tedis denga deherken persembahen tutungenna, ras kerina peminpin-peminpin Moap.
7 Emaka ibelasken Bilham me nubuat enda, "Balak raja Moap, nggo maba aku i Siria nari, i bas deleng-deleng si arah kenjulu nari. 'Mari, janah ngeranalah kam guna aku,' nina. 'Sumpahilah bangsa Israel.'
8 Uga ningku numpahisa si la isumpahi Dibata, ntah pe ngataken, 'Kernep me kam,' adi la bage nina TUHAN?
9 I das batu si meganjang nari banci kuidah bangsa e, banci kutatap ia idas uruk-uruk nari. Ia me kap sada bangsa si nggeluh sada-sada; itehna maka ia ipasu-pasu lebih asa bangsa si deban.
10 Kesusuren Israel enterem desken abu, lanai terbeligai perban teremna. Adi mate pagi aku, mate bagi bangsa Dibata min; mate i bas dame bagi kalak si benar."
11 Kenca bage nina Balak man Bilham, "Kai si nggo ibahanndu man bangku e? Kubaba kam ku jenda gelah isumpahindu musuhku, tapi ipasu-pasundu kepeken ia."
12 Nina Bilham erjabap, "Kai si isuruh TUHAN, e ngenca aku ngasup ngatakenca."
13 Kenca bage nina Balak man Bilham, "Mari ras kita ku ingan si deban. I jenari sada bagin si kitik i bas kalak Israel ngenca banci idahndu. Sumpahilah ia i jenari."
14 Ibabana ia ku mbalmbal Sopim idas Deleng Pisga. I je ipajekkenna pitu batar-batar jenari ipersembahkenna sada jenggi lembu ras sada bajar biri-biri i bas tep-tep batar-batar.
15 Nina Bilham man Balak, "Tedislah kam i jenda deherken persembahen tutungenndu, enta kujumpai lebe Dibata i jah."
16 Ijumpai TUHAN me Bilham, IturikenNa man Bilham kai si man katanken, jenari IsuruhNa ia mulihken ndahi Balak nehken TenahNa.
17 Emaka mulih me ia, idapetina Balak tedis denga deherken persembahen tutungenna, ras peminpin-peminpin Moap. Isungkuni Balak minter kai si nggo ikataken TUHAN,
18 jenari ibelasken Bilham me nubuat enda, "Marilah, o Balak anak Sipor, begikenlah kai si arus kukataken.
19 Dibata labo bagi manusia, si perbual; Ia labo manusia si sambar-sambar ukurna. Kai pe si IpadankenNa, pasti IsehkenNa; ngerana Ia, emaka jadi me bagi si IkatakenNa e.
20 Aku nggo isuruh masu-masu, janah adi Dibata si masu-masuna, la aku ngasup muat pasu-pasu e mulihken.
21 Kerna kegeluhen Israel pagin, nggo kuidah genduari nari. La banci reh man bana keguluten ntah pe kesusahen.
22 TUHAN, Dibatana ras kap ia; ipebetehkenna kujapa pe maka Ia me rajana. Nggo ibaba Dibata ia ndarat i Mesir nari; Ia jine erperang guna bangsa e desken sada banteng si merawa.
23 La lit guna-guna, bage pe kinigurun, si banci ipake guna ngelawan bangsa Israel. Genduari ikataken kalak kerna Israel, 'Nehenlah kai si nggo ibahan Dibata!'
24 Bangsa Israel desken sada singa si merawa, la ia medem adi langa kin icaing-caingna ras itelenna, adi langa iinemna dareh kalak si nggo ibunuhna."
25 Kenca bage ngerana Balak man Bilham, "Adi la kam nggit numpahi bangsa Israel, ula ka ipasu-pasundu!"
26 Nina Bilham erjabap, "Ma kin nggo ku kataken man bandu maka arus kulakoken kerina si ikataken TUHAN man bangku?"
27 Nina Balak, "Mari ras kita, gelah kubaba kam ku ingan si deban, ntah nggit maun Dibata mere kam numpahi bangsa e guna aku i jenari."
28 Emaka ibabaina Bilham ku das Deleng Peor. I jenari teridah gurun pasir.
29 Nina Bilham man bana, "Pajekkenlah pitu batar-batar man bangku jenari bereken man bangku pitu jenggi lembu ras pitu bajar biri-biri."
30 Minter ibahan Balak bagi si ikataken man bana. Jenari ipersembahkenna sada jenggi lembu ras sada bajar biri-biri i bas tep-tep batar-batar.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA