Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai bingkat ma halak Israel anjaha marsaran ma sidea bani pamah ni Moab, i dipar ni Jordan, tontang ni Jeriko.
2 Jadi dob ididah si Balak, anak ni si Zippor, haganup na dob binahen ni halak Israel hubani halak Amori,
3 gobir tumang ma Moab dompak bangsa ai, halani buei ni sidea; mabiar ma Moab halani halak Israel ai.
4 Dob ai nini Moab ma hubani pangintuai ni Midian, “Bois ma dilaton ni tumpuan ai haganup na inggot banta, songon pandilat ni lombu jonggi bani poyon-poyon na i ladang. Si Balak, anak ni si Zippor do ijia raja i Moab.”
5 Dob ai isuruh ma suruhanni marayak si Bileam, anak ni si Beor, hu Petor, na bani Bah Eprat, hu tanoh ni anak ni bangsani, laho mandilosi, nini ma, “Tonggor ma, domma luar sada bangsa hun Masir; domma irongkob ganup tanoh in, domma marsaran sidea patontang pakon ahu.
6 On pe, roh ma ho, papai ma bangku bangsa on, ai gogohan do sidea ase ahu; ra tartaluhon ahu do bangsa in anjaha tarusir ahu sidea hun tanoh on; ai hubotoh do barang ise na pinasu-pasumu dapotan pasu-pasu do, anjaha barang ise na pinapaanmu hona papa do.”
7 Jadi laho ma kopala ni Moab pakon kopala ni Midian rap pakon upah partondungon ibagas tangan ni sidea; das ma sidea hubani huta ni si Bileam, anjaha ipadas sidea ma bani hata ni si Balak.
8 Dob ai nini ma hubani sidea, “Marborngin ma nasiam ijon saborngin on, ase hubere balos hubani nasiam, marguru hubani na hinatahon ni Jahowa bangku; jadi tading ma kopala ni Moab rap pakon si Bileam.”
9 Dob ai roh ma Naibata marayak si Bileam, nini ma, “Ise do halak on na rap pakon ho?”
10 Nini si Bileam ma hubani Naibata, “Si Balak, anak ni si Zippor, raja ni Moab, na marsuruh ai bangku, mangkatahon,
11 ʻTonggor ma, domma luar sada bangsa hun tanoh Masir anjaha irongkob ganup tanoh in; on pe roh ma, papai ma sidea bangku; ra tolap do ahu mamorang sidea ampa mangusir sidea.ʼ”
12 Tapi nini Naibata ma hubani si Bileam, “Seng bulih laho ho rap pakon sidea anjaha seng bulih papaanmu bangsa in, ai na pinasu-pasu do sidea.”
13 Dob ai girah ma si Bileam puho patarni ai, anjaha nini ma hubani raja paidua ni si Balak, “Mulak ma nasiam hu tanoh nasiam, ai manjua do Jahowa manlopas ahu laho rap pakon nasiam.”
14 Dob ai bingkat ma kopala-kopala ni Moab, anjaha das ma sidea hubani si Balak, nini ma, “Manjua do si Bileam mardalan odor pakon hanami.”
15 Iulaki si Balak ma use marsuruh kopala-kopala bueinan anjaha sangapan ase na parlobei ai.
16 Jadi dob das sidea hubani si Bileam, nini sidea ma bani, “Sonon do hata ni si Balak, anak ni si Zippor, ʻSai ulang ma ho ra langlangan mardalan marayak ahu,
17 ai sai na marsangap tumang do ho bahenonku, anjaha barang aha pe sihatahononmu hu bangku, sai bahenonku do in. Antong, sai roh ma ho, anjaha papai ma bangku bangsa on.ʼ”
18 Tapi nini si Bileam ma mambalosi juakjuak ni si Balak, “Porini pe gok rumahni pirak pakon omas ibere si Balak bangku, seng tarlanggar ahu hata ni Jahowa, Naibatangku, laho mangkorjahon pahara na etek barang na banggal.
19 On pe, ijon ma nasiam saborngin on, ase hubotoh, atap aha pe hata ni Jahowa bangku.”
20 Dob ai roh ma Naibata bornginni ai marayak si Bileam, anjaha nini ma hu bani, “Halani na dob roh halak in marayak ho, laho ma ho mardalan odor pakon sidea; tapi pitah na Huhatahon bam, ai do na bulih bahenonmu.”
21 Patarni ai puho ma si Bileam, anjaha ipalanai ma halode boru-boruni, anjaha laho ma ia rap pakon kopala-kopala ni Moab.
22 Tapi gajak ma ringis ni Jahowa halani na laho ai ia; anjaha jongjong ma malekat ni Jahowa i tongah dalan sihol mangolatsi. Tapi ajak do ia bani halodeni, anjaha dua halak jabolonni mangkasomanisi.
23 Dob ai ididah halode ai ma malekat ni Jahowa jongjong i tongah dalan pakon podang na sintak ibagas tanganni, jadi manlembang ma halode ai hun dalan laho hu ladang, tapi ilonsingi si Bileam ma halode ai paulakkon hu dalan ai namin.
24 Dob ai jongjong ma malekat ni Jahowa bani dalan na i holangkolang ni pohon anggur ai, anjaha parik do angkup.
25 Jadi dob ididah halode ai malekat ni Jahowa, ihapitkon ma ia hu parik ai, gabe magusgus ma nahei ni si Bileam hu parik ai; jadi inunut ma manlonsingi halode ai.
26 Dob ai mardalan ma malekat ni Jahowa hu lobeihon laho jongjong bani ianan na sompit tumang, seng dong dalan parhusoranni hu siamun barang hu sambilou.
27 Dob ididah halode ai malekat ni Jahowa, gompang ma ia i toruh ni si Bileam; jadi roh ma ringis ni si Bileam, gabe ilonsingi ma halode ai bani tungkotni.
28 Ibuha Jahowa ma babah ni halode ai, gabe nini ma hubani si Bileam, “Aha hubahen bamu, ase ilonsingi ham ahu domma pala tolu hali?”
29 Dob ai nini si Bileam ma hubani halode ai, “Halani na iparguro-gurohonmin ahu; ambit adong podang i tanganku, maningon bunuhonku do ho sonari.”
30 Nini halode ai ma mambalosi si Bileam, “Ai lang ahu do namin halodemu, na dob niajakmu sadokah ham manggoluh ronsi sadari on? Ai somal do ahu mambahen sonin bamu?” nini si Bileam ma, “Lang namin.”
31 Dob ai ipatonggor Jahowa ma mata ni si Bileam, jadi ididah ma malekat ni Jahowa jongjong i tongah dalan manjolom podang na sinintak ibagas tanganni; jadi ipaunduk si Bileam ma uluni, lanjar marrogop ma ia marsombah.
32 Nini malekat ni Jahowa ai ma bani, “Mase ma ilonsingi ho halodemin, domma pala tolu hali? Tonggor ma, Ahu do na luar mangimbang ho, ai salah do na nilangkahkonmin;
33 ididah halode in do Ahu, gabe manlembang hun lobei-Hu pala tolu hali. Ambit lang manimbil ia hun lobei-Hu, domma Hubunuh ho, tapi anggo halode ai pagoluhon-Ku do.”
34 Dob ai nini si Bileam ma hubani malekat ni Jahowa, “Domma mardousa ahu, ai lang na hubotoh ham jongjong i tongah dalan sihol mangolat ahu. On pe, anggo na bajan do on ninuhurmu, age mulak ahu.”
35 Dob ai nini malekat ni Jahowa ma hubani si Bileam, “Laho ma ho rap pakon ganup dalahi in; tapi pitah hata na huhatahon bam, ai do hatahononmu.” Jadi laho ma si Bileam rap pakon gamot-gamot ni si Balak
36 Jadi dob ibogei si Balak na dob roh si Bileam, luar ma ia mangalo-alosi das hu Ir-Moab, na martopihon Arnon, bani parbalogan ni tanohni.
37 Dob ai nini si Balak ma hubani si Bileam, “Ai lang domma husuruh suruhanku marayak ham laho mangalopi ham namin? Mase ma lang mintor roh ham hu bangku? Na so tolap do gakni ahu pasangapkon ham?”
38 Dob ai nini si Bileam ma mambalosi si Balak, “Tonggor ma, domma roh ahu marayak ham! On pe, mintor tarbahen ahu ma mangkatahon barang aha? Hata na ninahkon ni Naibata hubagas pamanganku, ai do na maningon hatahononku.”
39 Dob ai laho ma si Bileam rap pakon si Balak, gabe das ma sidea hu Kiriat-Huzot.
40 Dob ai igalangkon si Balak ma lombu pakon biribiri, anjaha itongoskon ma hunjai parbagianan ni si Bileam pakon kopala-kopala na rap pakonsi.
41 Jadi patarni ai, iarahkon si Balak ma si Bileam tangkog hu Bamot-Baal, anjaha hunjai ma itatap deba humbani bangsa ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA