Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Iterusken bangsa Israel perdalanenna, jenari erkemah ia i kendit Moap arah Timur Jordan, kepar-kepar Jeriho.

² Asum ibegi raja Moap, eme Balak anak Sipor kai si nggo ibahan bangsa Israel man kalak Amori janah uga teremna bangsa Israel i je,

³ ia ras kerina rayatna mbiar tuhu-tuhu.

⁴ Nina kalak Moap kempak peminpin-peminpin bangsa Midian, "Kalak si bagi perkis teremna e la banci la ncedai kerina sinasa lit i sekelewetta desken sada jenggi lembu nggagati dukut i mbalmbal seh keri." Emaka Raja Balak

⁵ nuruh piga-piga persuruhen ndilo Bilham anak Beor, si ringan i Petor, i tepi Lau Eprat i taneh Amaw. Berita si ibabana i bas Balak nari eme kap, "Kupebetehken man bandu maka sada bangsa nggo reh i Mesir nari; rayatna merap ijapa pe, janah iciatina atena kami.

⁶ Teremen ia asa kami, emaka ngarap aku gelah reh kam jenari sumpahilah ia kerina. Adi bage ngasup kami naluken ia ras pelawessa i bas taneh enda nari. Sabap kuteh maka adi ipasu-pasundu kalak, sangap ia, janah adi isumpahindu, kena sumpah ia."

⁷ Emaka ibaba peminpin-peminpin bangsa Moap ras bangsa Midian duit penggalari sumpah e. Lawes ia njumpai Bilham, guna nehken berita i bas Balak nari.

⁸ Nina Bilham man bana, "I jendalah kam erberngi sendah, janah pagi kuturiken man bandu kai si ikataken TUHAN man bangku." Emaka tading peminpin-peminpin bangsa Moap ndai ras Bilham.

⁹ Reh Dibata ndahi Bilham nungkun nina, "Ise kalak si ras kam enda?"

¹⁰ Erjabap ia nina, "Raja Balak i Moap nari nggo nuruh ia ngatakenca man bangku

¹¹ maka sada bangsa si reh i Mesir nari nggo merap i belang-belang taneh e. Atena gelah kusumpahi bangsa e, gelah ngasup ia merang bangsa e ras pelawessa."

¹² Nina Dibata man Bilham, "Ula kam lawes ras kalak enda, janah ula isumpahindu bangsa Israel, sabap pasu-pasungKu Kubereken man bana."

¹³ Pepagina idahi Bilham persuruhen Balak, jenari nina, "Mulihlah ku kutandu; la ibere TUHAN aku lawes ras kam."

¹⁴ Emaka mulih ia kerina ndahi Balak jenari iturikenna man bana maka Bilham la nggit reh.

¹⁵ Jenari isuruh Balak peminpin-peminpin si teremen ras si terhagan asa si pemena ndai.

¹⁶ Lawes ia njumpai Bilham jenari isehkenna berita i bas Balak nari nina, "Ngarap aku gelah ula lit kai pe alangenna maka reh kam ndahi aku!

¹⁷ La banci la kubereken man bandu upah si mbelin janah kubahan kai pe si ikatakenndu. Ngarap aku maka rehlah kam jenari sumpahi bangsa e guna aku."

¹⁸ Tapi erjabap Bilham nina, "Aminna gia ibereken Balak man bangku kerina pirak ntah emas si lit i bas istanana, la banci kusimbak perentah TUHAN, Dibatangku, seh ku bas soal si kitik-kitikna pe.

¹⁹ Tapi ngarap aku gelah erberngi kam, bagi perbahanen kalak si deban, gelah banci kueteh ntah lit denga ntah lang si deban ate TUHAN si man KatankenNa man bangku."

²⁰ I bas berngi e reh Dibata ndahi Bilham, jenari nina, "Adi kalak enda kerina nggo reh mindo gelah kam lawes ras ia, ersikap lah kam berkat, tapi kai si Kukataken e ngenca banci ibahanndu."

²¹ Emaka pepagina ipasang Bilham pelana keledena, jenari berkat ia ras peminpin-peminpin kalak Moap ndai.

²² Tapi merawa Dibata erkite-kiteken ia lawes, janah asum ia i bas perdalanen ngersak keledena, itemani dua kalak suruh-suruhenna, tedis malekat TUHAN i tengah dalan ngambati perdalanenna.

²³ Asum idah keledena tedis malekat i je njemak pedang, ndarat ia i bas dalan e nari jenari nilah ia ku juma-juma. Ipek-pek Bilham kelede ndai, igerana mulihken ku bas dalan.

²⁴ Kenca bage tedis malekat ndai i tengah-tengah dalan si sempit. Arah kawes ras arah kemuhen lit kebun anggur si ertembok batu.

²⁵ Tupung kelede ngidah malekat ndai, idegeskenna man bana ku tembok batu e, emaka kicat nahe Bilham. Ipekpek Bilham ka kelede ndai.

²⁶ Lawes ka sekali nari malekat ndai ku lebe; tedis ia i bas ingan si sempit i ja la lit sitik pe dalan nilah ku kawes ntah ku kemuhen.

²⁷ Sekali enda, tupung idah kelede malekat ndai, gempang ia minter. Bene kesabaren Bilham, ipekpekina kelede ndai alu cikenna.

²⁸ Emaka ibahan TUHAN maka beluh kelede ndai ngerana man Bilham nina, "Kai kin perbahanenku man bandu maka ipekpekndu aku seh telu kali?"

²⁹ Erjabap Bilham nina, "Sabap imain-mainkenndu aku! Bicara lit pedang i bas aku, nggo kam kubunuh."

³⁰ Ngaloi ka kelede ndai nina, "Ma kin aku nge kelede si nggo iersakndu kidekah geluhndu? Ope denga si enda pernah kin bagenda perbahanenku man bandu?" "Lang," nina Bilham.

³¹ Kenca bage ibere TUHAN maka idah Bilham malekat ndai tedis i je njemak pedang; minter ia erjimpuh nembah, ayona seh ku taneh.

³² Iorati malekat ndai ia nina, "Ngkai maka ipekpekindu keledendu seh telu kali? Kuambati dalanndu sabap la kin patut perdalanenndu enda.

³³ Idah keledendu aku, emaka nilah ia telu kali. Adi la bage ibahanna, tentu nggo kubunuh kam janah kelede e kupelepas nggeluh."

³⁴ Erjabap Bilham nina, "Nggo erdosa aku. La kuteh maka tedis kepe kam i tengah dalan ngelawan aku; tapi genduari adi salah kin iakapndu aku nerusken perdalanenku enda, banci aku mulih."

³⁵ Tapi nina malekat, "Teruskenlah perdalanenndu ras kalak enda, tapi kai si kusuruh kam ngatakenca e ngenca banci ikatakenndu." Emaka iterusken Bilham perdalanenna ras kalak ndai.

³⁶ Asum ibegi Balak maka Bilham nggo reh, lawes ia ngalo-ngalosa ku Ar, eme kota i tepi Lau Arnon i perbalengen Moap.

³⁷ Ikataken Balak man bana nina, "Ngkai maka la kam reh mbarenda i bas tenahku si pemena man bandu? Ntah iakapndu maka la aku ngasup mereken upah si cukup man bandu?"

³⁸ Nina Bilham njabapsa, "Genduari ma nggo aku reh? Tapi genduari lit kin kuasa i bas aku? Kai si isuruh Dibata, e ngenca banci kukataken."

³⁹ Emaka lawes me Bilham ras Balak ku kuta Husot.

⁴⁰ I je igeleh Balak lembu ras biri-biri man persembahen, janah iberekenna deba dagingna man Bilham ras peminpin-peminpin si ras ia.

⁴¹ Pepagina ibabai Balak me Bilham ku das Bamot Baal. I jenari banci idah Bilham sada bagin bangsa Israel.

Bilangan

Video Bilangan 22

Ikuti Kami:

KONTAK | PARTISIPASI | DONASI