Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai marungut-ungut ma si Miryam pakon si Aron dompak si Musa, halani parinangonni, halak Kus na binuatni ai, ai boru Kus do na binuatni ai bahen parinangonni.
2 Anjaha nini sidea ma, “Ai pitah marhitei si Musa do gakni Jahowa mangkatahon hata-Ni? Ai lang dihut do Ia marhitei hanami mangkatahon hata-Ni?” Jadi ibogei Jahowa ma ai.
3 Tapi jolma na lamlam tumang do si Musa lobih humbani sagala jolma na i atas tanoh on.
4 Dob ai sompong ma marsahap Jahowa hubani si Musa, si Aron pakon si Miryam, “Luar ma hanima na tolu hu lampolampo partumpuan in!” Jadi luar ma sidea hatolusi.
5 Dob ai tuad ma Jahowa ibagas hombun na jongjong, lanjar jongjong i labah ni lampolampo ai anjaha idilo ma si Aron pakon si Miryam; jadi luar ma sidea na dua.
6 Jadi nini ma, “Tangar ma hatangkon, anggo dong nabi i tongah-tongahnima, Ahu, Jahowa do patalarhon diring-Ku hubani marhitei pangungkabon, Ahu marsahap bani marhitei nipi.
7 Seng sonai anggo juakjuak-Ku si Musa; hatengeran do ia ibagas ganup rumah-Ku.
8 Pamangan hu pamangan do Ahu marsahap pakonsi, dompak bohi bei, seng ibagas hutinta, sabonar rupa ni Jahowa sandiri do na nididahni. Mase ma lang mabiar hanima marhata ungut-ungut dompak juakjuak-Ku si Musa?”
9 Nahit ma ringis ni Jahowa hubani sidea, lanjar laho ma Ia.
10 Dob surut hombun ai hun atas ni lampolampo ai, tonggor ma, domma gadamon si Miryam, lopak songon salju; marhusor ma si Aron mandompakkonsi, tonggor ma, domma gadamon si Miryam.
11 Dob ai nini si Aron ma dompak si Musa, “Ham tuannami, ulang ma uhum ham hanami marhitei dousa na binahennami ibagas haotoonnami.
12 Ulang ma ia songon sada halak na matei, na dob satongah masik angkulani bani parluarni humbani boltok ni inangni.”
13 Dob ai mandoruhi ma si Musa hubani Jahowa, “Ham Naibata, sai pamalum Ham ma ia!”
14 Tapi nini Jahowa ma hubani si Musa, “Anggo porini itijuri bapani bohini, ai lang maningon bador ia pitu ari dokahni? Maningon tartutup ia pitu ari dokahni i darat ni parsaranan ai, dob ai pe ase bulih ia jaloon use.”
15 Jadi tartutup ma si Miryam pitu ari dokahni i darat ni parsaranan ai, sundat pala bangsa ai mardalan, paima tarjalo use si Miryam.
16 Dob ai bingkat ma use bangsa ai hun Hasarot, anjaha marsaran ma sidea i halimisan Paran.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA