Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mosa araji oreng Kus, bi’ Miriyam ban Harun eca’-koca’e.
2 Ca’na se kadhuwa jareya, "Apa PANGERAN abu-dhabu pera’ ngangguy parantara’anna Mosa malolo? Gu ta’ ngangguy parantara’anna sengko’ ban ba’na keya, ta’ iya?" PANGERAN meyarsa cacana se kadhuwa jareya.
3 Mosa reya talebat andhap asor, alebbiyan dhari sapa’a bai e bume reya.
4 O-tao PANGERAN adhabu ka Mosa, Harun ban Miriyam, "Mara ba’na entar ka Tang Kemah." Se katello jareya pas padha entar ka jadhiya,
5 PANGERAN pas toron e dhalem cangga ondhem, pas ngadek e adha’anna labangnga Kemah Socce, laju nembali Harun ban Miriyam. Se kadhuwa jareya nyander.
6 Dhabuna PANGERAN, "Edhingngagi Tang oca’ reya! Mon e antarana ba’na badha oreng se bi’ Sengko’ epele epadaddi nabbi, Sengko’ tanto ngaton ka bi-nabbi jareya, ban acaca e dhalem mempena.
7 Tape ka Mosa Sengko’ ta’ kantha jareya, sabab Mosa reya oreng se esto e antarana Tang ommat.
8 Sengko’ mon acaca ka Mosa dhep-adhebban, rang-terrangan, ta’ akantha oreng bak-tebbagan. La’-mala’ Mosa nangale’e Tang roba! Baramma ba’na me’ bangal ca’-ngoca’e Mosa, Tang abdi jareya?"
9 PANGERAN ce’ dukana ka Miriyam ban Harun, laju nyengga dhari jadhiya.
10 E bakto ondhem jareya la tadha’ e attassa Kemah Socce, o-tao kole’na Miriyam etombuwi panyaket kole’ budhuk; kole’na pote akantha kapas. E bakto Harun atole, laju ngoladi ja’ Miriyam ekenneng panyaket jareya,
11 laju adhabu ka Mosa, "Adhu, ale’, mara tolong sengko’ ban embugga reya, ja’ sampe’ eseksa lantaran dusa se esababbagi kabudhuwan, se sampe’ ca’-ngoca’e ba’na gella’.
12 Tolong embugga rowa me’ ta’ daddi akantha babaji’ se lahir se la mate dhari dhalem tabu’, dagingnga satengnga bucco’."
13 Daddi Mosa aserro ka PANGERAN, "Adhu, Guste Allah, abdidalem nyo’ona, kasokana Junandalem mabaras embuk ka’dhinto!"
14 Dhabuna PANGERAN, "Ja’ sakenga mowana ecopae bi’ eppa’na, embugga ba’na jareya tanto nyandhang malo pettong are abidda. Paondur embugga ba’na jareya dhari parkemahan pettong are abidda, saellana jareya olle abali pole."
15 Miriyam pas epaondur dhari parkemahan pettong are abidda, ban bangsa jareya ta’ aginjeggan dhari jadhiya sampe’ Miriyam eedine abali ka parkemahan.
16 Saellana jareya bangsa Isra’il buru mangkat dhari Hazerot laju akemah e ra-ara beddhi Paran.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA