Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ “Dilo ham ma, adong do na sihol mambalosi ham? Hubani ise, humbani halak na pansing ai sihol mangadu-adu ham?

² Tongon, pandoleianni do mamunuh halak na oto, anjaha simburu do pamatei halak na bodoh.

³ Huidah do halak na oto manjulur uratni, tapi sompong melus iananni.

⁴ Daoh do anakni humbani hatuahon, hona dogei-dogei sidea i horbangan, anjaha seng dong na paluahkon sidea.

⁵ Halak na loheian do mangankon na sinabini, gari hun tongah-tongah ni rungga-rungga ibuat do ai; anjaha halak na horahan do manginum na dong bani.

⁶ Ai seng humbani orbuk roh ni hasedaon, anjaha seng humbani tanoh roh ni hasunsahan.

⁷ Tapi jolma do na manubuhkon sitaronon, songon dilah ni apuy habang dompak datas.

⁸ Porini ahu, Naibata do hupindahi, hubani Naibata do ondoskononku parniahapanku.

⁹ Ia do sibahen pambahenan na banggal na so tarpareksa, ampa halongangan na so tarhira.

¹⁰ Ia do sibere udan hu tanoh in, anjaha Ia do sitongos bah hu juma.

¹¹ Ia do na patimbulhon halak na musil, anjaha na mangangkat hu hatuahon halak na pusok uhur.

¹² Ia do parsedahon tahi-tahi ni siparakal-akal, gabe seng manjadi hinorjahon ni tangan ni sidea.

¹³ Ia do manangkap halak na pentar ibagas akal ni sidea sandiri, ibahen soya tahi-tahi ni siparakal-akal.

¹⁴ Dorabon ni na golap do sidea arian, anjaha dadap-dadap sidea arian songon borngin-borngin.

¹⁵ Tapi ipaluah do halak na maetek humbani podang, anjaha halak na musil humbani tangan ni halak na gogoh.

¹⁶ Gabe marpangarapan ma halak na galek, tapi ipasip do halak parjahat.

¹⁷ Tonggor ma, martuah ma jolma na niajar ni Naibata, halani ai ulang ma teoskon pinsang-pinsang ni Sitimbulan in!

¹⁸ Ia do mangugahi, lanjar Ia do mambaluti: Ia do mambogbog, lanjar tangan-Ni do pamalumkon.

¹⁹ Onom hali ho tarsosak, Ia do paluahkon ho: papituhalihon seng mangonai be hamagouan bam.

²⁰ Sanggah lohei, Ia do paluahkon ho humbani hamatean, sanggah porang, humbani kuasa ni podang.

²¹ Ondingan-Ni do ho humbani lonsing-lonsing ni dilah, anjaha seng pala habiaranmu hasedaon porini pe roh.

²² Tawa do ho mangidah hasedaon ampa lohei, anjaha seng pala habiaranmu binatang na i tanoh in.

²³ Ai ibagas padan do ho pakon batu na i talun, binatang na i harangan pe mardamei do pakon ho.

²⁴ Jadi botohonmu ma, ibagas hasonangan do lampolampomu; anjaha anggo ipareksa ho alamanmu, aha pe lang dong na magou.

²⁵ Botohonmu do homa, lambin gargarni do dakdanakmu, anjaha ginomparmu songon suan-suanan na i tanoh in.

²⁶ Palobei sayur matua do ho ase surukonmu tanoman, songon omei na sinopouhon bani panorangni.

²⁷ Tonggor ma, sonai ma domu hubani pamareksaannami! Tangar ma ai, anjaha paratei-ateihon ma!”