Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dob ai nini si Elipas, halak Teman ai ma mambalosi,

² “Anggo dong na marsahap dompak ham, sogam do uhurmu? Tapi ise ma na mangasup mangorom marsahap?

³ Tonggor ma, buei ma halak na dob niajaranmu, anjaha ipargogohi ham do tangan na galek.

⁴ Halak na jomba ipajongjong ham do marhitei hatamu, anjaha nahei ni halak na rebad-rebad ipatoguh ham do.

⁵ Tapi nuan dob mangonai on bamu, gabe mandolei ham; dob mangonai on bamu, gabe gamang ham.

⁶ Ai lang biarmu dompak Naibata hatengeran ni uhurmu, anjaha habonaran ni langkahmu pangarapanmu hinan?

⁷ Dingati ham ma, nantigan ma ongga magou halak na so marsalah? Barang ija ongga masab na pintor maruhur?

⁸ Songon na dob huidah, halak sitinggalahon hajahaton ampa sitidahkon hamagouan, ai do pariamaonni.

⁹ Mogap do sidea ibahen hosah ni Naibata, anjaha bois sidea ibahen panompul ni ringisni.

¹⁰ Paraum ni singa, sora ni singa panoroh, ipon ni singa poso-poso, iropangi do.

¹¹ Magou do singa halani hurang sorohan, anjaha anak ni singa boru-boru merap do.

¹² Roh do bangku hata, sipsip, anjaha ijalo pinggolhu do husipni ai.

¹³ Sanggah mamingkir-mingkiri alatan borngin, sanggah rengesni modom jolma,

¹⁴ sogop ma bangku biar pakon gobir, na mambahen hitir ganup holiholingku.

¹⁵ Montas do sada Tonduy hun lobeihu; manimbor ma ambulu ni badanku.

¹⁶ Soh ma ia, tapi seng tartandai ahu rupani. Dong do na jongjong i lobeihu, anjaha hubogei ma sora na husip-husip:

¹⁷ Mintor boi ma sahalak jolma pintor i lobei ni Naibata? Mintor boi ma sada dalahi pansing i lobei ni Sitompasi?

¹⁸ Tonggor ma, gari bani juakjuak-Ni seng tenger uhurni, anjaha bani malekat-Ni ididah hakahouon,

¹⁹ samintolah ma bani jolma na marianan ibagas rumah tanoh halampung, na marbona humbani orbuk, na boi pisatkonon songon ngitngit?

²⁰ Holangkolang ni sogod pakon bodari iagou, iropuki sidea; magou do sidea sadokah ni dokahni, seng dong na mansahapkon.

²¹ Ai lang, anggo iparreong ma lampolampo ni goluh ni sidea, matei ma sidea, tapi seng ibagas hapentaran.”