Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ba’na reya gu ta’ penter ban andhi’ akkal buddi? Daddi, mara tang caca reya edhingngagi.
2 (34:1)
3 Oreng tao ja’ kakanan reya nyaman mon la arassae; oreng tao ja’ ca’-oca’ bicaksana mon la tao ngedhing.
4 Mara areng-bareng mareksa parkara reya me’ olle etemmo baramma se teppa’.
5 Dhabuna Ayyub, ‘Sengko’ ta’ andhi’ sala, tape Allah ta’ adil ka sengko’.
6 Sengko’ eanggep lecek polana ngoca’ ta’ andhi’ dusa. Sateya sengko’ bakbak, maske ta’ andhi’ sala.’
7 Ba’na ba’ taowa nangale oreng akantha Ayyub reya? Salerana li-baliyan bi-nyebbi Allah.
8 Ayyub jareya dujan akanca ban oreng daraka, apolongan ban oreng durjana.
9 Ca’na, tadha’ gunana mon aehteyar ajalannagi kasokanna Allah.
10 He reng-oreng se penter, mara edhingngagi! Masa’ Allah Se Mahakobasa reya badha salana?
11 Allah reya aganjar manossa menorot lalakonna, apareng ganjaran otaba okoman sapantessa.
12 Allah Se Mahakobasa ta’ tao alampa’agi kajahadan; kabbi manossa eparenge kaadilan.
13 Dhari sapa Allah narema kobasana? Sapa se massra’agi bume reya ka Salerana?
14 Saandhinna Allah nyabut nyabana manossa, ban mondhut balina nyabana odhi’na,
15 mate kabbi mahlok se anyaba, manossa daddi abu akantha asalla.
16 Daddi, mon ba’na penter, mara gateyagi, bukka’ kopengnga, pas edhingngagi.
17 Apa ba’na nyala’agi Allah se adil ban parjuga? Apa ba’na nyangka Allah reya baji’ ka kaadilan?
18 Allah ngokom rato ban pangobasa se alako jahat ban daraka.
19 Allah ta’ nolonge rato otaba mamennang oreng sogi ka oreng se nespa, sabab kabbi padha cepta’anna.
20 E tengnga malem rato bisa o-tao atemmo seda. Allah ngokom pangobasa se pas laju napa’ ka ajal; tadha’ malaradda mon mateyana oreng se parjuga.
21 Sabab Allah nalektegi odhi’na manossa, ngoladi saneyap tengka’na.
22 Tadha’ petteng maske sampe’ calemodan, se ekenneng gabay pangeteggan kaangguy dusa ban kajahadan.
23 Allah ta’ parlo nantowagi baktona bila manossa se mangkada eadilana.
24 Ta’ kalaban nalektegi otaba mareksa, Allah maambu pangobasa, oreng laen epadaddi gantena.
25 Sabab Allah ngagali apa se la elakone reng-oreng jareya; daddi laju epagulu’ ban epaancor e baja malem.
26 Reng-oreng jareya etamper polana dusana, e adha’na oreng se bannya’ epanarema okomanna.
27 Sabab reng-oreng jareya ta’ atoro’ ka kasokanna, ban ta’ ta’at ka papakonna.
28 Reng-oreng jareya daddi sababba oreng mesken aserrowan, tangessa kapeyarsa ka Allah.
29 Mon Allah motossagi mendella malolo, tadha’ oreng se bangal nyale. Mon Salerana ta’ kasokan ngaton, ta’ kera badha oreng se bisa nyare.
30 Sa-bangsa ta’ bisa apa-rapa ngadhebbi kakejjemmanna reng-oreng se ta’ andhi’ Allah.
31 Ayyub, apa sa-dusana ba’na ka Allah la eakone? Apa ba’na la ajanji ta’ agabaya dusa pole?
32 Apa ba’na nyo’on sopaja eduduwagi kasala’anna? Apa ba’na la asompa ambuwa ta’ ngalakonana kantha jareya?
33 Allah ta’ kera ngabbuli pangaterrona ba’na, saellana ba’na nyala’agi se elampa’agi Allah. Sateya ba’na se kodu motossagi, banne sengko’, mara koca’agi mon ba’na andhi’ panemmo.
34 Reng-oreng se penter tanto padha ban sengko’ pekkeranna; oreng bicaksana se ngedhing tang caca tanto ngoca’
35 ja’ Ayyub acaca tape ta’ ngarte ka cacana dibi’, cacana tadha’ ma’nana.
36 Mon cacana Ayyub epekker epatete, nyata cacana akantha oreng jahat se juba’ ate.
37 Kasala’anna etambai pole ban settong dusa; iya areya alaban ka Allah ban ya-nyeya Allah e adha’na sengko’ ban ba’na.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA