Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Erkiteken bujur kal iakap Jop man bana, emaka ngadi temanna si telu kalak ndai njabapisa.
2 Tapi lit i je sekalak dilaki, Elihu gelarna. Ia anak Barakel, kesusuren Bus, i bas terpuk Ram nari. Lanai tertahan Elihu rawana sabap Jop mbenarken dirina janah Dibata isalahkenna.
3 Nandangi teman Jop si telu kalak ndai pe nembeh ate Elihu, sabap la tertogansa kata-kata Jop, seh maka Dibata tempa si salah.
4 Erkiteken Elihu si ngudana i je, emaka itimaina lebe kalak ndai kerina dung ngerana.
5 Kenca idahna maka si telu kalak ndai lanai beluh njabap Jop, emaka merawa ia,
6 jenari ibenakenna me ngerana. [Nina Elihu,] "Aku nguda denga, tuan kam asa aku, emaka mbiar aku ndai melasken ukurku.
7 Ningku i bas ukurku, kam kap arusna si ngerana, si metua arus mereken kepentaren.
8 Tapi si mereken kepentaren man manusia, Kesah Dibata si Mada Kuasa kap si tuhuna.
9 Labo perban tuana maka kalak jadi pentar, labo erkiteken umurna nggo gedang maka itehna apai si benar.
10 Dage genduari, begikenlah aku, maka kuturiken ukurku man bandu,
11 Alu sabar kubegiken kerina percakapenndu, janah kutimai kam ndarami kata-kata si payo.
12 Kupergermetken kal, kuidah maka nggo kam talu, kai si ikataken Jop la tersanggahndu.
13 Kuga banci iakuindu maka kepentaren nggo idatndu, sedang Jop la tertalukenndu? Tapi Dibata kap si nalukenca labo manusia.
14 Ndube nari man bandu kap ia ngerana, la man bangku, genduari ateku njabap ia, tapi la bali ras penjabapndu.
15 O Jop, kam lanai terjabap kalak enda, nggo keri belas-belasna.
16 Tedis saja ia, lanai lit si man katankenna. Dage, arus kin aku terus nimai adi nggo sinik ia kerina?
17 Lang! Genduari erjabap ateku, janah kuturiken bandu ukurku.
18 Kata-kata si ateku kubelasken seh lalana, pusuhku sedak nimai katawari baci ngerana.
19 Adi la aku ngerana, sedak kari pusuhku, bali ras kantong kuling-kuling dem anggur si mbaru.
20 Aku arus ngerana, emaka teneng pusuhku, ersumekah ateku mereken jabapen.
21 Ise pe labo kukapiti, ise pe la kupuji-puji.
22 Sabap labo aku beluh muji-muji pe, janah minter kap aku iukum Dibata, adi kulakoken si e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA