Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Domma marpadan ahu pakon matangku, seng anjai mangkawah ahu dompak anak boru.
2 Aha do nani rupei bereon ni Naibata na i atas in, barang parbagianan bahenon ni Pargogoh Na So Tarimbang hun nagori atas?
3 Ai lang hamagouan do bani halak pargeduk, anjaha hasedaon bani sihorjahon hajahaton?
4 Seng nani ididah Naibata dalanku, anjaha na so ihira do nani ganup langkah-langkahku?
5 Ambit marsipakulah-kulah namin parlahouhu, anjaha naheihu mangolos mangkorjahon sipaoto-oto,
6 itimbang ma namin ahu bani timbangan na sintong, tontu akuon-Ni ma, na so marsalah ahu.
7 Anggo manlembang langkah-langkahku humbani dalan hasintongan, iihutkon uhurhu rosuh-rosuh ni matangku, anjaha longkot bani tanganku habadoron,
8 halak na legan ma mangankon na hutidahkon, anjaha iorbati na dob husuan.
9 Anggo ongga tartarik uhur hubani sada naboru, anjaha mangonggopi ahu i lambung labah ni hombar rumahku,
10 parinangonku ma panduda bani halak na legan, anjaha halak na legan mambangkisisi.
11 Ai pantang do na sonai ai, tongon, hajahaton na patut siuhumon ni panguhum.
12 Ai apuy do ai, na manggagat ronsi nagori toruh, anjaha talup mammosogkon ganup na husari.
13 Anggo ongga lang pintor hubahen bani juakjuakku dalahi barang naboru, ai ma sanggah marsalisih sidea pakon ahu,
14 aha ma na sihol bahenonku porini roh Naibata? Anggo ibahen parturiakan, aha ma balosku Bani?
15 Ai lang Ia, na manjadihon ahu i partapaan do homa na manjadihonsi? Ai lang lanjar sasadasi do na manjadihon hanami ibagas partapaan?
16 Anggo ongga lang hubere pangindoan ni halak na musil, atap motei-otei hubahen mata ni naboru na mabalu,
17 atap sahalak ahu mangankon rotingku, anjaha seng dihut na tading maetek mangankon ai,
18 ai humbani haposoonni ahu do na songon bapani na pagodangkonsi, anjaha humbani partapaan ni inangni ahu do na mangiring-iringsi;
19 anggo ongga huidah sada halak lajang-lajang lang marhiou, barang sada halak na musil lang marsiluban,
20 anggo lang hupamalas binongeini, anjaha anggo lang malas ia halani bobak ni biribiringku,
21 anggo ongga mangonai tangan ahu bani sada halak na tading maetek, halani adong huidah na mangurupi i horbangan,
22 tanggal ma lah abarangku humbani sasapku, anjaha tanganku sirang humbani ringringni.
23 Ai mabiar do ahu tong bani uhum ni Naibata, anjaha seng tahan ahu mangkawahkon hatunggungon-Ni.
24 Anggo ongga omas hubahen pangarapanku, anjaha dompak omas pitah ningku, ʻHo do hatengerankuʼ;
25 anggo ongga marmalas uhur ahu, halani buei artangku, barang buei na sinari ni tanganku;
26 anggo ongga hukawah-kawahkon mata ni ari sonaha parsinalsalni ai, barang bulan sanggah bani rondangni mardalan,
27 gabe tartarik uhurhu marponop-ponop, anjaha husummah tanganku padaskon sombahku;
28 hajahaton do on, talup siuhumon ni panguhum, ai domma huparnalang Naibata na i atas ijai.
29 Anggo ongga marsombuh-sombuh ahu mangidah hamagouan ni munsuhku, barang marolob-olob ahu anggo maseda ia,
30 seng ongga hulopas pamanganku mardousa marhitei na mangindohon ase matei hona papa ia.
31 Anggo seng isaksihon hasomanku na salampolampo: Ise na so bosur binahen ni guleini?
32 Seng ongga marborngin panginsolat i alaman; huungkab do labahku bani halak pardalan-dalan.
33 Anggo ongga hurungkub dousangku, ase ulang ididah halak, barang huponopkon hajahatonku ibagas uhurhu,
34 halani mabiar ahu mangidah halak na mabuei, anjaha gobir ahu bani pangapasion ni jolma marsundut-sundut, gabe sip ahu anjaha seng luar hun rumah.
35 Ah, ambit adong ma namin sada halak na ra mambogei hatangku. Tonggor ma, tanda tanganku! Ibalosi Pargogoh Na So Tarimbang in ma namin ahu! Ah, ambit dong ma namin pangaduan na sinurat ni imbangku dompak ahu!
36 Tongon, sai tampeihononku do ai i atas abarangku, anjaha sangkutkononku bangku songon sortali.
37 Patorangonku ma sada-sada langkahku Bani, anjaha doskon raja adaponku Ia.
38 Anggo doruh-doruh jumangku mangaduhon ahu, anjaha ganup noranni tangis-tangis;
39 anggo hupangan gogohni seng margalar, anjaha simadasi hulopas matei loheian,
40 dear ma tubuh bangku duri gantih ni gandum, barang poyon-poyon gantih ni jagul.” Marujung ma sahap ni si Job.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA