Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Le’ba’ma’ assumpa siagang janji talaniakkami cinnaku anciniki tau loloa.
2 Apa kutadeng Nagaukang Allata’ala mae ri katte? Antekamma Nabalasa’ panggaukanna rupataua?
3 Cilaka siagang susa ma’nassa Napabattu mae ri tau a’gau’ ja’dalaka!
4 Mattantu Naassengi Allata’ala sikontu panggaukangku; Nacini’ ngasengi sikamma dakkaku.
5 Assumpa’, angkana tenale’baka’ inakke a’gau’ jekkong; tenale’baka tonga’ annipu tau.
6 Lappassamma’ Natimbang Allata’ala irate ri timbangang annabaya, na laNaasseng angkana tena nakusala.
7 Ebara’ angkana ammengkama’ battu ri oloang tojenga, yareka nibeso’mi pa’maikku mae ri apa ra’masaka, punna ra’masa’ limangku lanri dosa,
8 lampassammi taua angkanrei apa kulamunga, siagang ancuru’ ngaseng sikontu wassele’ lamung-lamungku.
9 Ebara’ le’baka’ cinna mae ri turiballa’na siampi’ ballakku, siagang kutoa’ cokko-cokko battu ri bokona pakke’bu’,
10 lappassammi tau maraeng napappalluang turiballakku; lappassammi ri katinroanna bura’ne maraeng attinro.
11 Punna memang kugaukang anjo dosa rantasa’ kammaya, siratanga’ anggappa hukkungang.
12 Anjo dosaya ammanraki kamma pepe’, sikontu apa kupatanga la’busu’ ngaseng nakanre.
13 Ri wattuna akkunrareng atangku lanri kupassala-salang ha’na, kupilangngeri kunrarenna, na kubajiki gaukku mae ri ia.
14 Punna tena, antekamma bateku musti andallekang ri Allata’alaku? Apa pialingku punna battu sallang angngadelia’?
15 Sai Allata’ala ampa’jaria’, na Ia todong ampa’jari sikamma anjo atangku?
16 Tenale’bakai takutulunga tau kamase-masea, yareka kubalang parekang janda tappu’ minasaya ri tallasa’na.
17 Tenale’bakai kubalang parekang ana’ kukanga cipuru’, nampa inakke ganna’ ri kanre.
18 Battu ri ca’dina kuparakai ke’nanga; kupimpingi ke’nanga lalang tallasakku.
19 Punna kucini’ tau kakuranganga, ta’liwa’ kasi-asi untu’ ammalli pakeang,
20 kukammuki siagang kaeng kalimbu’ battu ri bulu gimbalakku, kulanapuji silambusu’na pa’mai’na.
21 Ebara’ angkana le’baka’ anjallakkangi ana’ kukanga, lanri tappakku angkana lammeta’ ri parkaraku,
22 lappassammi tepo’ rua-rua limangku sa’genna tassa’la’ battu ri paling-palingku.
23 Tena kula’gau’ kammanjo, saba’ hukkunganNa Allata’ala sanna’ Napakamalla’na pa’maikku.
24 Tale’bakai kurannuang barang-barangku,
25 yareka kupattampoang kakalumanynyangangku.
26 Tale’bakai kusomba allo singaraka sioro’na yareka bulang ga’gaya cayana.
27 Tale’bakai nialle pa’maikku ri ia, yareka kubau limangku untu’ ampakalompoi.
28 Dosa kammaya anjo siratangi anggappa hukkungang mate; lanri nasassali Allata’ala Kaminang Koasaya.
29 Tale’baka’ rannu lanri pa’risi’na musungku, yareka lompo pa’maikku lanri anggappana bala.
30 Tena kuppala’ doang sollanna mate musungku; tale’baka’ anggaukangi dosa kammaya anjo.
31 Tau anjamaya ri nakke naassengi, angkana inai-nai kutoana ri ballakku.
32 Tassungkei ballakku mae ri tau kabangngianga; tale’bakai kulappassang ke’nanga a’bangngi ri aganga.
33 Tau maraenga nacokkoi dosana, mingka inakke tena kule’ba’ appakamma anjo ke’nanga.
34 Tena kumalla’ ri panggappana tau jaia, siagang tena kujampangi kana-kana anghinana taua. Tenale’baka’ ammantang ri balla’ yareka a’mereki bawang, lanri mallakku bawang nihina.
35 Tenaka tau ero’ ampilangngeri kana-kanangku? Assumpa’ angkana annaba ngasengi anjo kupaua. Dasi-dasi Napialia’ Kaminang Koasaya. Ebara’ angkana tuduhanna musua mae ri nakke nitulisi’ ngasengi sa’genna kucini’,
36 lalompoi pa’maikku nakupanai’ ri salangga, na kupadakki’ ri ulungku a’jari songko’ kalompoang.
37 Lakupauangi Allata’ala sikontu apa kugaukanga; lalompoi pa’maikku siagang laccongai ulungku andallekang ri Ia.
38 Ebara’ angkana tampa’ kulukka’ butta kupa’jekoa, na kurampasa’ battu ri sitojennaya pata,
39 ebara’ angkana la’busuki wassele’na kukanre, na kubalang parekang cipuru’ pamarri allamungai,
40 lappassammi teai ase siagang gandung attimbo ri koko, passangalinna rompo’ katinting siagang rea." Sikammaminjo kana-kananna Ayub.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA