Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Napannarrusu’mi bicaranna Ayub, angkana, "Lanri arenNa Allata’ala mattallasaka, assarea kaadelang mae ri nakke,
2 (27:1)
3 assumpa’ kukana: Lalang Nasareku ija nappasa’ Allata’ala, lalang nia’na ija nyawa lalang ri kalengku,
4 tena nala’bicara balle-balle muncengku, tena nalannipu lilaku.
5 Jari taeroka’ ampaui angkana annabako; sa’gengku pole mate lattahanga’ angkana tena kura’masa’.
6 Tuli anna’galakka’ mae ri kamannurukingku, siagang tuli tangkasa’na ati mailalangku.
7 Dasi-dasi nanihukkung musungku sangkamma tau doraka, na niballassi balingku sangkamma tau kodi sipa’.
8 Maka nia’ panrannuanna tau kumbalaka ri wattunna Natuntu’ Allata’ala nyawana?
9 Maka laNapilangngeri Allata’ala karru’na punna nitujui ri kasukkarrang?
10 Mustina nakkuki ri kassannangang battua ri Allata’ala, siagang tena mangnganna appala’ doang mae ri Ia.
11 Lakuajari ngasengko ri passala’ kalompoang koasaNa Allata’ala, kupauangko rancanaNa Kaminang Koasaya.
12 Mingka, kalennu ngasemmi le’ba’ anciniki. Jari, angngapa nussare pappakainga’ tenaya anggaranna?"
13 Nakanamo Zofar, "Kammaminne bateNa Allata’ala Kaminang Koasaya anghukkungi tau tenaya naadele’ siagang tau dorakaya.
14 Punna jai ana’na, lamatei ke’nanga lalang bundu’ siagang ana’ cucunna lakakurangangi lalang tallasa’na.
15 Bijanna niaka ija, matei lanri garring, siagang tena nikarruki ri janda-jandana.
16 Akkullei attambung-tambung pera’na siagang assusung-susung pakeanna,
17 mingka yangasenna anjo peraka siagang pakeanga la’jari napatangi tau lambusu’ pa’maika.
18 Balla’na tau ja’dalaka jappoki sanrapang balla’ bolang-bolang, poro pa’balla-ballakang sinampekang, sangkamma balla’-balla’ pajaga.
19 Napara’bai kalenna sangkamma tau kalumanynyang, mingka takkulleai napa’mole-molei, ri wattu ambangunna ri tinrona, lanynya’ ngasemmi kakalumanynyanganna.
20 Battumi bala lompoa antujui sanrapang je’ne’ a’ba ti’ring battua. Anging puttusu’ ri wattunna bangngi anri’bakangi siagang anre’resangi a’lampa.
21 Anging battu raya angngangkaki, siagang ambarrasaki battu ri balla’na.
22 Nilissara’mi tanikamaseangnga, na tarpassa lari a’boya pa’la’langngang.
23 Attempa limai taua ri wattunna tu’guru’; kemae-kemaei nihina."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA