Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dob ai nini si Job ma mambalosi,

² ʻAge sadari on adu-adu ope ahu, borat do pandondon ni tangan-Ni bangku na morong-orong on.

³ Ambit hubotoh ma namin, ija Ia boi jumpahkononku, ambit boi ma namin das ahu bani paratas-Ni.

⁴ Patibalonku ma hu lobei-Ni paharangku, anjaha gok balos bahenonku pamanganku.

⁵ Sihol botohonku, naha balos-Ni bangku, anjaha inteihononku barang aha sihatahonon-Ni bangku.

⁶ Mintor marhitei gogoh-Ni na banggal in ma imbangon-Ni ahu? Lang tene, sai na pardiateihonon-Ni do ahu.

⁷ Marsibalosan ma ijai halak parpintor pakon-Si, gabe maluah ma ahu humbani Siuhum ahu ronsi sadokah ni dokahni.

⁸ Tapi tonggor ma, porini laho ahu dompak purba, seng ijai Ia; dompak hasundutan, seng jumpah ahu Ia ijai;

⁹ hupindahi Ia i utara, seng dong huidah Ia, laho ahu hu dangsina, seng ijai Ia.

¹⁰ Tapi ibotoh do dalan na hudalani, anjaha anggo iuji ahu, gabe doskon omas ahu luar.

¹¹ Totap do naheihu mardalan bani bokas-Ni, dalan-Ni do huihut-ihut, seng manlembang ahu.

¹² Seng ongga hulanggar titah na luar hun pamangan-Ni, huparimbagaskon do hata na luar hun pamangan-Ni.

¹³ Seng mubah-ubah Ia, ise ma na boi pagolingkon-Si? Aha na sinurahon-Ni, ai do ipasaud.

¹⁴ Sai na paujungon-Ni do na dob pinutuskon-Ni bangku, anjaha buei ope na sonai ai ibagas uhur-Ni.

¹⁵ Halani ai do ase songgotan ahu i lobei-Ni, anggo hupingkiri ai, hitir-hitir do ahu mangidah-Si.

¹⁶ Naibata do na patunduk uhurhu, anjaha Pargogoh Na So Tarimbang in do mangkirjati ahu.

¹⁷ Tapi seng magou jomba ahu binahen ni halotiron, barang halani hagolapon na manrungkub bohingku.”