Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Appialimi Ayub angkana, "Pilangngeri anne apa lakupaua; se’reji bawang kupala’ a’jari panynyaleori.
2 (21:1)
3 Sarea’ kasampatang, na nakke tosseng a’bicara, le’baki anjo akkulle mako anghina’ pole!
4 Teai rupataua kuagang a’gea’, jari tena nangngapa punna kurang sa’baraka’.
5 Cinikima’, nunampa lalannasa’ ngaseng, takkajannakko siagang tattongkoki bawanu.
6 Punna kunawa-nawa anne tallasakku annekkere’ma’ lanri malla’ duduku.
7 Angngapa natau ja’dalaka Nasare umuru’ la’bu Allata’ala, siagang tulusu’ katambang barang-baranna ke’nanga?
8 Ganna’ sallona tallasa’na ke’nanga sa’genna nacini’ ana’ cucunna ke’nanga a’jari lompo.
9 Amang sannang ruma tanggana ke’nanga; Tena Napitujui bala ke’nanga.
10 A’bija-bijai olo’-olo’ piarana ke’nanga, tena susana punna ammana’-mana’.
11 A’lumpa’-lumpa’ rannu ana’-ana’na tau ja’dalaka, rapang gimbala’ rungka a’rannu-rannu.
12 Nirurungang ri sa’ra rabana, suling, siagang kacapi, suaraki ke’nanga akkelong-kelong siagang a’joge’-joge’.
13 Napa’la’busuki allo-allo katallassanna ke’nanga lalang mate’ne, na amang nasa’ring ri wattunna mate ke’nanga.
14 Padahala’ le’baki angkana ke’nanga ri Allata’ala, ‘BellaKi’ anrinni siagang a’lampaKi’! Tanajampangiai ikambe siagang taerokai ikambe ampahangi apa erotTa siagang pattujunTa mae ri tallasa’na ikambe.’
15 Nakana pikkiranna ke’nanga, ‘Tena matu-matunna allayani Allata’ala, siagang tena bua’-bua’na appala’ doang mae ri Ia.
16 Sai lanri kagassinganta tonji bawang, nanigappa sikontu erotta siagang pattujunta?’ Mingka tena sikali kusituju ri pikkirang siagang panggappa kammaya anjo.
17 Le’bakkai nibuno kanjolina tau ja’dalaka, siagang nituju ri bala siagang kacilakang? Le’bakkai Allata’ala larro mae ri ke’nanga, sa’genna nihukkung ke’nanga?
18 Le’bakkai ke’nanga rapang rarame siagang limbu’bu’ niri’bakang ri anging puttusu’ siagang anging allaloa?
19 Nukana ngaseng, ‘Nihukkungi anaka ri Allata’ala lanri dosana manggena.’ Mingka inakke kukana: Tau dorakaya, iatommi nihukkung ri Allata’ala, sollanna sadara’ ke’nanga angkana lanri dosana ke’nanga, Nappabattu hukkungang Allata’ala.
20 Lappassammi tau dorakaya antanggongi dosa kalenna ke’nanga, lappassammi nakasia’ pangngalarroiNa Allata’ala Kaminang Tinggia.
21 Punna la’busu’mo wattunna taua ri lino, maka najampangi iji angkana mate’nei kaluargana?
22 Maka akkullei rupataua angngajaraki Allata’ala na KalenNa Allata’ala angngadeli apa attallasaka ri suruga?
23 Nia’ tau akkamale lalang tallasa’na; sukkuki siagang assaui pa’mai’na ri wattunna mate. Sannangi siagang mate’nei nakasia’ ri matena, nagassingija tubuna anjo wattua.
24 (21:23)
25 Mingka nia’ todong tau mate sanna’ pa’risi’na, tena le’baka nakasia’ mate’nea.
26 Mingka ri jeraka, para anra’bai ke’nanga; nikatulung ri olo’ siagang gallang-gallang.
27 Memang, kuassengi apa nupikkirika ngaseng siagang sikontu kaja’dallang nurancanga.
28 Akkuta’nangko angkana, ‘Kemae balla’na makoasaya anggaukangai panggaukang dorakaya?’
29 Tenapaka nukuta’nangi tau masarroa a’lampa? Tenaka nutappa’ ri kabara’ napabattua ke’nanga?
30 Nakana ke’nanga, ‘Ri allo appabattuNa hukkungang Allata’ala, lanipasalamaki sikamma tau ja’dalaka.’
31 Tena antuntuki panggaukanna; tena ambalasaki kaja’dallanna.
32 Nierangi mae ri jeraka, nipantamaki ri kali’bong kuburuka; nijagai siagang niparakai jera’na.
33 Assa’bui tau a’jappa anrurungangi maya’na; nampa nitambungi baji’mo ri butta.
34 Jari, bicara kosong anjo panynyaleorinnu, sangnging balle-balle pappialinnu!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA