Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saodda Ayyub, "Edhingngagi pateppa’ tang oca’ reya; pera’ jareya panglepor se epenta sengko’ sateya.
2 (21:1)
3 Edine gallu sengko’ acaca’a, samarena olle ba’na ya-nyeya pole tang aba’ reya.
4 Banne ban manossa sengko’ atokar; sengko’ ta’ sabbar badha lantaranna.
5 Abas sengko’, tanto ba’na tacengnga’, ba’na tababeggen ta’ metto oca’.
6 Mon sengko’ mekkere tang kabadha’an reya sengko’ ngetter, marenges rassana.
7 Arapa oreng jahat me’ epalanjang omorra bi’ Allah dhi’-andhi’na epatamba ros-terrosan?
8 Odhi’na cokop abidda, sempat nangale’e na’ potona daddi dibasa.
9 Roma tatanggana taremtem ban aman; Bi’ Allah ta’ eparenge balai pa-apa.
10 Ebinna ana’-rana’, abudhu’ ta’ kalaban malarat.
11 Na’-ana’na oreng jahat gumbira ca’-lonca’an, akantha dumba se gi’ ngodha se neng-sennengngan.
12 Kabbi ramme atari ban anyanye, etoro’e terbang, calempong ban soleng.
13 Re-saare senneng odhi’na, matena taremtem ta’ nyangsara.
14 Mangkana reng-oreng jareya mator ka Allah, ‘Jauwi abdidalem, ngereng Junandalem nyengla! Abdidalem ta’ parduli ban ta’ terro ngarteya maksod sareng kasokanna Junandalem ka abdidalem sadajana.’
15 Ca’na pekkerra reng-oreng jareya, ‘Aladine Allah tadha’ gunana, adu’a ka Salerana tadha’ parlona.
16 Sengko’ ahasel ngaolle tang maksod ban pangaterro, gu ta’ dhari kakowadan dibi’ malolo?’ Tape sengko’ ta’ saroju’ sakale ka jalanna pekkeran ban panemmo se kantha jareya.
17 Bila badha damarra oreng jahat epamate? Bila badha oreng jahat nemmo balai ban palang? Bila Allah tao duka ka reng-oreng jareya, sampe’ apareng okoman?
18 Bila reng-oreng jareya tao daddi akantha darameyan ban abu se ekebbat kaleng busbus ban angen se lebat?
19 Ca’na ba’na, ‘Ana’ eokom Allah polana dusana eppa’na.’ Tape ca’na sengko’: Oreng se dusa jareya se kodu eokom Allah polana dusana, sopaja oreng jareya apangrasa ja’ polana dusana aba’na eokom bi’ Allah.
20 Dina oreng dusa me’ nanggung dusana dibi’, dina me’ erassae dukana Allah Se Mahatenggi.
21 Mon oreng la mate ta’ kera mekkere pole senneng enja’na ana’ bine.
22 Apa bisa manossa ngajari Allah, Allah se ahakime mahlok e sowarga?
23 Badha reng-oreng se baras saomorra; badanna sehat sampe’ matena. Pamatena senneng ban gampang, badanna gi’ kowat.
24 (21:23)
25 Badha pole se ta’ tao senneng salanjangnga, odhi’ sampe’ mate talebat nyangsara.
26 Tape e koburan kabbi tadha’ bidana; padha ekaromo’ caceng ban ola’.
27 Sengko’ tao pekkeranna ba’na, ban pekkeran juba’ se erancang e dhalem atena.
28 Ba’na atanya, ‘E dhimma bengkona oreng se kobasa rowa, oreng se daraka lakona?’
29 Apa ba’na gi’ ta’ atanya ka reng-oreng se seggut ajalanan? Apa ba’na ta’ parcaja ka berta se egiba reng-oreng jareya?
30 Ca’na reng-oreng jareya, ‘E are baktona Allah apareng okoman, reng-oreng jahat bakal epasalamedda.’
31 Tadha’ se agugat tengkana, tadha’ se males kajahadanna.
32 Oreng jareya egiba ka koburan, epamaso’ ka dhalem lobang, makamma ejaga ban erabat.
33 Oreng aebuwan se ngerengngagi jinazana, tana re-lere notobi badanna.
34 Daddi pangleporra ba’na jareya kosong! Jawabanna ba’na jareya co-ngoco!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA