Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ [Nina ka Sopar anak Noama,] Serbut kal ukurku ibanndu, o Jop. Lanai aku sabar njabap kam perban ngilas kuakap.

² (Ayb 20:1)

³ Megombang kal kam arah pengeranandu.

⁴ Ma itehndu kin maka nai-nai nari, tangtangna kin manusia itamaken i bas doni,

⁵ keriahen kalak jahat labo ndekah, janah kesenangenna kentisik saja ngenca?

⁶ Aminna gia ia jadi meganjang la teralang, seh maka takalna seh ku langit dingen awang-awang,

⁷ nandangi masap me ia asa lalap, masap alu mbau desken karap-karap. Kalak si pernah ngidah ia, nungkuni, "Eh, i ja ndai?"

⁸ Lesap me ia desken nipi, masap bagi nipi sanga berngi.

⁹ I japa pe lanai ia teridah, inganna ndube pe lanai tereteh.

¹⁰ Kai gelgel e itangkona i bas si musil nari, arus iganti anak-anakna man empuna nai.

¹¹ Mbestang gia dagingna genduari, jadi abu me ia kentisik nari.

¹² Ntebu kal akapna kejahaten i bas babahna, emaka mberat kal akapna ngutahkenca; dage ibunikenna i teruh dilahna, janah lalap ibulbulina.

¹³ (Ayb 20:12)

¹⁴ Tapi kenca seh i bas beltekna, salih pangan ndai jadi racun si erbisa.

¹⁵ Kebayaken si nggo itelenna, terpaksa iutahkenna; nggo gia seh i bas beltekna, mulihi ka ipedarat Dibata.

¹⁶ Erta-erta si isirup kalak jahat langkahna, bali kap ras racun si erbisa; erkiteken si e mate me ia, desken itagut nipe si erbisa.

¹⁷ Subuk minak saitun si maler desken lau belin, tah pe tengguli ras susu si maler desken lau anak, kidekah geluhna la banci iidahna.

¹⁸ Untung si idatca terpaksa iulihkenna, janah ulihna latih la banci inanamina.

¹⁹ Sabap kalak musil itebu-tebuna jenari itundalkenna, janah rumah bekas kalak erbahan irampasna.

²⁰ Enda erkiteken kerangapenna la lit sibarna, janah lalap la erpuas-puas kerna kesenangenna.

²¹ Adi man ia, la lit sitik pe ibahanna iba. Tapi genduari nggo masap kebayakenna.

²² Tupung paksana senang geluhna, rempet ndabuh kiniseran si mberat ngkenai ia.

²³ Kenca ibesurina kal beltekna, itelkasken Dibata pernembeh AteNa man bana.

²⁴ Asum ia lompat nilahken pedang waja, badanna telpus kena panah tembaga.

²⁵ Anak panah pultak arah gurungna i bas ujungna si erndilap nari naktaken dareh megara, emaka seh kal ia biarna.

²⁶ Asa kai buni-bunina kernep kerina, bage pe ia ras isi jabuna si tading denga, keri ipan api si la manusia pegarasa.

²⁷ Langit petangkas kejahatenna, janah doni keke nalahken ia.

²⁸ Kebayakenna melengas kerina iombakken rawa ate Dibata.

²⁹ Bagenda me jadina man kalak si la mbiar Dibata, si itetapken Dibata jadi kerajangenna.