Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ah, lanai ateku gedang nggeluh. Kutelkasken ateku rananku, kubelasken ateku ukurku si ngilas i bas pusuhku.
2 O Dibata, ula UkumNdu aku! Turiken bangku maka kueteh salahku.
3 Bujur kin Kam bage? Megombang Kam man TinepaNdu jine, jenari cirem Kam ngidah rencana kalak jahat.
4 Bali kin PengidahNdu ras pengidah manusia?
5 Bali kin gedangna GeluhNdu ras geluh kami manusia?
6 Di lang, ngkai dage maka IdaramiNdu kerina dosa-dosangku, dingen InungnungiNdu tiap kesalahenku?
7 ItehNdu kap maka labo lit salahku janah ItehNdu ka pe labo lit ise pe si ngkelini aku.
8 TanNdu kap si njadiken ras si nepa aku, tapi genduari TanNdu e ka si ngkernepken aku.
9 Inget min maka i bas taneh dah nari kap aku ItepaNdu; IperperkenNdu ka kin AteNdu aku jadi abu mulihi?
10 IbereNdu gegeh man bapangku lako njadiken aku; IpeturahNdu aku i bas bertin nandengku.
11 IranggutNdu badanku salu tulan ras urat, janah ItutupiNdu tulanku salu jukut ras kulit.
12 IbereNdu aku nggeluh; IkelengiNdu aku, dingen PengepkepenNdu ngkawali kesahku.
13 Tapi genduari nggo kuteh maka kidekah enda, sinik-sinik IrencanakenNdu kepe cilaka man bangku.
14 Itima-TimaiNdu ndigan aku erbahan dosa, janah kenca kubahan dosa, la Kam nggit ngalemisa.
15 Kenca aku erdosa, minter aku cilaka IbahanNdu; tapi aminna si mehuli pe kubahan, labo aku dat pujin. Mesui kal ateku, mela kuakap.
16 Adi sitik lah gia seh sura-surangku, minter aku IperburuiNdu, bagi Kam erburu singa; lebih asa si e, tanda KuasaNdu pe IlakokenNdu guna encilakaken aku.
17 Lalap lit SaksiNdu lako ngelawan aku; AteNdu nembeh man bangku tetap reh belinna; tetap IbahanNdu rencana si mbaru guna nerang aku.
18 O Dibata, ngkai maka IpelepasNdu aku tubuh? Ulin min mbarenda aku mate ope denga ise pe ngidahsa.
19 Pinter lawes i bas bertin nari ku bas kuburen, bali kap ulina ras la pernah lit.
20 Ma nandangi keri kin kegeluhenku? Tadingkenlah aku sisada! Pelepaslah aku ersenang-senang i bas geluhku si sitik nari e.
21 Lanai ndekahsa lawes me aku janah ndigan pe lanai mulihken lawes me aku ku negeri si gelap dingen geltem,
22 negeri kegelapen, negeri awih-awih, ras rontang, i je siangna bali ras gelapna berngi."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA