Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia hapentaran ai domma ipajongjong rumahni, ipasuk do basikahni na pitu ai,

² isayat do pinahanni, irarui anggurni, anjaha ipasirsir do mejani.

³ Isuruh do juakjuakni naboru martaur humbani ianan na gijang i huta ai,

⁴ “Barang ise na so marpambotoh, roh ma ia hujon!” Bani halak na oto ihatahon,

⁵ “Roh ma, pangan hanima ma indahanku anjaha inum ma anggurhu, na dob hurarui.

⁶ Tadingkon hanima ma haotoon ase manggoluh anjaha mardalan ma hanima bani dalan pangarusion.”

⁷ Halak sipinsang sipanrisai dapotan habadoron, anjaha halak sihata parjahat pasambor dirini sandiri do.

⁸ Ulang ma pinsang sipanrisai, ase ulang mardomdom ia bam, halak siparuhur ma pinsang, gabe haholonganni ma ho.

⁹ Bere ma bani siparuhur, ase lambin maruhur ia, ajari ma halak parpintor, ase tambah habotohonni.

¹⁰ Biar mangidah Jahowa do mula ni hapentaran, anjaha panandaion bani Na Pansing ai, ai do pangarusion.

¹¹ Ai marhitei ahu do ganjang ari-arimu anjaha tambah bam tahun ni goluhmu.

¹² Anggo pentar ho, bam do hapentaranmai; tapi anggo manrisai ho, ho sandiri do na mangahapkon ai.

¹³ Ia haotoon doskon naboru na garang do ai, seng dong pangartianni, seng dong binotohni.

¹⁴ Bani labah ni rumahni do ia hundul-hundul, bani ianan sigijangan i huta ai,

¹⁵ dilo-dilo bani halak na mamontas, na mannunuti pardalananni, nini,

¹⁶ “Barang ise na bodoh, singgah ma hujon!” Bani halak na oto ihatahon,

¹⁷ “Matobu do bah tinangko-tangko, anjaha mantin do ruti na pinangan marponop-ponop.”

¹⁸ Tapi seng ibotoh adong do hamatean ijai, anjaha ibagas nagori toruh do niontangni ai.