Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kuciniki Batara ammenteng ri ampi’na tampa’ pakkoro’bangnganga. Napassareangi anne parenta kammaya, "Tunrung sarringi sikamma ulu bentenga ri BallakKu sollanna ta’goccang kabusu’ pattiro-tiroanga. Rumbang kabusuki anjo sikamma benteng mae ri tuju ulunna taua. Tenaya namate laKubunoi lalang ri pa’bundukanga. Tena manna sitau lakkulle lari yareka ta’lappasa’.
2 Manna pole annarrusu’ ke’nanga antama ri linona tau matea laKukayao tonji ke’nanga. Manna pole nanai’ ke’nanga ri langi’, laKupanaungi ke’nanga battu rate.
3 Punna accokkoi ke’nanga ri coppo’na Moncong Karmel, laKuboyai naKujakkala’ ke’nanga. Punna accokko ke’nanga irawanganna tamparanga, laKuparentakangi naga tamparanga untu’ ampittoki ke’nanga.
4 Punna nitahangi ke’nanga ri musua, laKuparentakangi sollanna nibuno ke’nanga. Le’ba’ Kupattantumi laKupanraki ke’nanga, siagang tena nalaKubantu ke’nanga."
5 Ta’goccangi buttaya siagang susai pandudu’na, lanri niseroi ri Batara Kaminang Tinggia siagang Kaminang Koasaya. Rapang Binanga Nil nai’ naung je’ne’na, kammami anjo lanaiki ke’nanga nampa tu’guru’.
6 Nabangungi Balla’Na Batara bella nai’ ri allaka, irateanna buttaya Natannangi langika salaku pa’rangka’, siagang je’ne’ battua ri tamparang Natumpai nai’ ri bontoa, Ia anggaukanga kabusuki anjo sikammaya iamintu Batara arenNa.
7 Nakana Batara, "He umma’ Israel, Kuparhatikangi tu Sudan sangkamma batenu Kuparhatikang. Kuerangi tu Filistin battu ri Kreta siagang tu Siria battu ri Kir sangkamma ikau Kuerangko battu ri Mesir.
8 INakke, Batara Kaminang Tinggia, amparhatikangi anne kakaraenganna Israel dorakaya, siagang laKupa’lanynyaki ke’nanga battu ri buttaya. Mingka jari-jarina Yakub tena nalaKupanraki ngaseng. INakke, Batara, anne akkana.
9 LassareA’ parenta siagang laKutapi bansa Israel rapang tau attapi gandung lalang ri pattapia. Untu’ ampela’ kabusuki tenaya bua’-bua’na battu ri ke’nanga, laKugoccangi ke’nanga ri alla’na bansa-bansaya.
10 Nakana sikamma tudorakaya ri alla’na ummakKu, ‘Tena nalaNabalang parekangki’ Allata’ala nituju ri bala.’ Mingka, sikontutojenna lanibunoi ke’nanga lalang pa’bundukang."
11 Nakana Batara, "Lanarapiki wattunna naKupoterang kakaraenganna Daud. Kamma-kamma anne anjo kakaraenganga kontumi balla’ rumbanga. Mingka laKupakabajiki ammotere’ tembo’-tembo’na siagang laKubangungi ammotere’ sa’genna a’jari sangkamma riolo.
12 Tu Israel lanakoasai pa’rasangang Edom niaka ija tassesa kammayatompa sikontu bansa Kupatanga riolo. INakke, Batara, anne a’bicara siagang iNakke langgaukangi anjo passalaka."
13 Nakana Batara, "Lanarapiki wattunna nasanna’ linta’na timbona gandunga sa’genna tena tappu’na akkatto taua. Poko’ anggoroka lasanna’ copponna batena attimbo sa’genna tulusu’ appare’na taua je’ne’ anggoro’. Je’ne’ anggoroka lammattiki battu ri sikamma buluka siagang assolongi battu ri sikamma bontoa.
14 LaKupa’jari kalumanynyangi ammotere’ ummakKu Israel. Lanabangungi ammotere’ kota-kotana ke’nanga le’baka runtung, nampa ammantang ke’nanga anjoreng. Lanalamungi koko-koko anggoro’na ke’nanga, siagang nainung je’ne’na. La’lamung-lamungi ke’nanga, nampa nakanre wassele’na.
15 LaKuboliki ummakKu ri pa’rasangang le’baka Kupassareang mae ri ke’nanga. Tenamo nalanibi’bu’ ammotere’ ke’nanga battu anjoreng. INakke, Karaeng Allata’alana ke’nanga anne akkana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA