Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Anggappa’ se’re paccini’ battu ri Batara Kaminang Tinggia. Kuciniki appare’ sanna’ jaina katimbang ri wattu le’ba’na taua ampangngalleangi ruku’ karaenga, siagang appakkaramula attimbo poleang ruku’ berua.

² Anjo katimbang jaia a’biringi nakanre sa’genna la’busu’ sikontu timbo-timboanga ri buttaya. Nampa kukanamo, "O Batara Kaminang Tinggia, Kipammopporang laloi ummatTa! Teai sipato’ ca’dina siagang lammana ke’nanga, jari antekamma batena lakkulle ke’nanga attahang?"

³ Napinrami rancanaNa Batara siagang Nakana, "Anjo apa nucinika tena nalakajariang."

⁴ Anggappa’ se’re paccini’ pole battu ri Batara Kaminang Tinggia. Kuciniki sadia-sadia untu’ anghukkungi umma’Na siagang pepe’. Anjo pepeka nalepaki tamparanga sa’genna la’busu’ irawa ri buttaya siagang appakkaramulami napammutung kokoa.

⁵ Kukanamo, "O Batara Kaminang Tinggia, Kipamari laloi anjo pepeka! Teai sipato’ ca’dina siagang lammana ummatTa, jari antekamma batena lakkulle attahang?"

⁶ Napinrami pole rancanaNa Batara siagang Nakana, "Anne pole tena todong nalakajariang."

⁷ Anggappa’ pole se’re paccini’ maraeng battu ri Batara. Kuciniki ammenteng ri sa’rinna se’reang tembo’ nibangunga siagang ammake otere’ pa’ladung lambusu’ battu irate naung. Nata’galaki ri limanNa anjo otere’ ladunga untu’ anciniki apaka anjo temboka ammenteng lambusuki yareka tena.

⁸ Akkuta’nangi mae ri nakke angkana, "Apa nucini’ Amos?" Appialima’ angkana, "Otere’ pa’ladung ammenteng lambusu’, Batara." Nampa Nakanamo Batara, "Kupakei anne pa’ladunga untu’ ampappicinikangi angkanaya ummakKu rapangi tembo’ tenaya nammenteng lambusu’. Tenamo nalaKupinra poleang rancanaKu, ma’nassa laKuhukkungi ke’nanga.

⁹ Tampa’-tampa’ napakea jari-jarina Ishak untu’ anynyomba laniancuruki. Tampa’-tampa’ matangkasa’na tu Israel laniruntungi. LaKuputtai jari-jarina Yerobeam."

¹⁰ Amazia, iamintu imang ri Betel, akkiringi laporang kamma anne mae ri Yerobeam karaeng Israel, "Assikongkoloki Amos siagang ra’yaka untu’ angngewaki’ karaeng. Kana-kananna nakompa-kompai ra’yaka untu’ angngancuruki anne pa’rasanganga.

¹¹ Napaui angkanaya lamatei karaenga lalang pa’bundukang, siagang ma’nassa laniengkaki bansa Israel mange ri pammelakkanga, bellaya battu ri pa’rasangang kalenta."

¹² Nampa nakana Amazia ri Amos, "He na’bi, ammoterekko mange ri Yehuda! Anjoreng mako akkato’ba. Lappassammi nake’nanga assareko gaji.

¹³ Tea’ mako akkato’bai pole ri Betel. Anne kotaya nisa’laki untu’ kalenna karaenga, siagang tampa’ ibadana sikontu ra’yaka!"

¹⁴ Appialimi Amos angkana, "Inakke teaiya’ na’bi lanri pangka’. Sikontutojenna inakke pakalawakia’ siagang pakattili’ rappo ara.

¹⁵ Mingka Naallea’ Batara battu ri jama-jamangku, siagang Nasuroa’ ampabattui pasanNa mae ri tu Israel.

¹⁶ Jari pilangngerimi apa kananNa Batara mae ri kau. Lanri nupisangkaia’ akkato’ba angngewai bansa Israel,

¹⁷ Nakana Batara angkanaya la’jari pasundalaki bainennu ri agang-agang kotaya, siagang sikamma ana’nu lanibunoi lalang pa’bundukang. Buttanu lanipa’bage-bageangi mae ri tau maraenga, nampa ikau kalennu lamateko ri pa’rasanganna tau tenaya natappa’ ri Batara. Pandudu’na Israel ma’nassa laniengkaki mange ri pammelakkanga, bella battu ri pa’rasangang kalenna."

Amos

Video Amos 7

Ikuti Kami:

KONTAK | PARTISIPASI | DONASI