Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'enaka de ma 'Imam ma Amoko wosano 'o Stefanusika, "Manga galaki ge'ena 'iodumu ma goungu?"

² De 'una wosango, wongose 'ato, "'Esa moi riaka dodoto de 'o Dea-dea! Niongano-nganono naneda! 'O Abraham to ngone nanga edete de nanga dotumu kowomato'orakuwasi 'o Haranika, ma 'orasi ge'ena ka 'o Mesopotamiakasi wogogere, de ma Jo'oungu ma Dutu gee woku-kumati ma sala woboa womasidumutu 'unaka

³ de wongose, ''Ani tonaka de ni riaka dodoto namada, de nosikaika 'o daeraaka gee dua ngoi tonisidumutu.'

⁴ So 'o Abraham wamada 'o Kasdim ma daeraa de womato'oraka 'o Haranika. Maha 'o Abraham ma dea wosongenoka, 'asa de ma Jo'oungu ma Dutu wosuloko 'o Abraham womato'oraka ne'ena ma daeraano, gee ngini 'Esa moi de mita Dea-dea nioodumu niodogogere ne'ena naga.

⁵ Ma 'orasi ge'ena 'o daeraa ne'ena ka 'o busanga moi ma, ma Jo'oungu ma Dutu kowokulawasi 'o Abrahamuka ma ngale 'idadi 'awi pusaka. Ma ma Jo'oungu ma Dutu wojaji dua wokula 'o Abrahamuka de wi ngowaka de wi dangonuku ma ngale to 'onau manga pusaka. Ma 'orasi ge'ena 'o Abraham wi ngowaka koi'iwa.

⁶ Ma koneda ma Jo'oungu ma Dutu wongose 'o Abrahamuka: ''Ani ngowaka de ni dangonuku dua yogogere 'o nyawa manga daeraaka 'isoka 'o nyawa ma dudunino. 'O daeraa ma dutu 'asa yakidiai 'o yongosi de yakihalebiru ma do'ingo 'o taunu ratusu soatino.

⁷ Ma godagee yosigi-gilaongo 'asa takihukumu, de yogi-gilaongo go'ona 'asa takisisupu ma daeraaka ge'ena de dua yosuba ngoino ma ngii ne'enaka.'

⁸ Ma Jo'oungu ma Dutu wongoseka koge'ena de wi jaji ge'ena wosikuata de 'o suna. So 'o Abraham wi ngowaka 'o Ishak wolahiruku 'o wange tuangere, de 'o Abraham wisuna. Ge'enaka de 'o Ishakioli 'awi ngowaka 'o Yakub wasuna. 'Asa de 'o Yakub wakisuna 'awi ngowaka yamogiooko de modidi gedagee yodadi to ngone 'o Yahudioka nanga edete de nanga dotumu.

⁹ Naga nanga edete de nanga dotumoka go'ona wimoi wi ronga 'o Yusuf. 'Una 'awi ria-riaka witaleana sigado 'ona wiwukunu wodadi yongosi 'o Mesiroka. Ma ma Jo'oungu ma Dutu kowimadakawa,

¹⁰ so wisipidili 'o sangisara 'i'ini-'inioka. De wisibarakati ma 'orasi waika 'o Firaunika 'o Mesiroka manga Koana, so 'o Firaun wamake wi singina yaowa de wi barija ma Jo'oungu ma Dutuno ge'ena, sigado wigoraka wodadi gubernur 'o Mesiroka de wodadi balusu 'o Firaun wi kadatoka.

¹¹ Ge'enaka de 'idadi 'o baulaco ma amoko 'o Mesir de 'o Kanaanoka yasuluunuku so 'o nyawa yosangisara. Nanga edete de nanga dotumu 'o Kanaanoka koyomadamakewau 'o 'inomo.

¹² So gee 'o Yakub wo'isene 'o Mesiroka 'o 'inomo de ma 'ena, de wakisuloko wi ngowa-ngowaka gee to ngone nanga edete de nanga dotumu yotagi dokaika 'asa ma di-disiraka.

¹³ Gee 'ona yaika ma gilio ma modidi, de 'o Yusuf wakisidemo wi riaka dodotika 'ato 'una ge'ena 'o Yusuf. Ge'enau ma 'orasi 'asa de 'o Mesiroka manga koana wanako ma ngale 'o Yusuf wi nyawa-nyawa.

¹⁴ Ge'enaka de 'o Yusuf wobesesongo la ma dea 'o Yakub de wi riaka dodoto yomato'orakinou 'o Mesirino. 'Ona yoodumu yanagi tumudiingi de motoaka.

¹⁵ So 'o Yakub de to ngone nanga edete de nanga dotumu yomato'orakika 'o Mesiroka, de ge'enakau yomanoa sigado yosongene.

¹⁶ Gee yosongene de manga songene yosigilio 'o Sikhemika 'o Kanaanoka, la yakipo'osuku 'o Hemoroka manga tonaoka 'o Abraham wa'ija-'ijano.

¹⁷ Gee ma 'orasi rekeni ya'adonoka ma Jo'oungu ma Dutu wi jaji 'o Abrahamuka wositotomo, to ngone nanga nyawa 'o Mesiroka kayokudai monga yodogo.

¹⁸ De ino ma Koana wimoi wopareta 'o Mesiroka 'una kowinakowa 'o Yusuf gee wosongenokau.

¹⁹ Ma Koana gu'una nanga nyawa wakisido-doko, de wotingkai to ngone nanga edete de nanga dotumika. 'Una wakipakisaa manga ngowaka ma di-dingoono 'asa kailahiruku yakoki'umo la 'isongene.

²⁰ Ge'enau ma 'orasi, de 'o Musa wolahiri. 'Una 'o ngowaka ma giau ma sure moi. 'O mede sa'ange 'una de 'awi balusu.

²¹ De gee wiasinika de 'o Firaun wi ngowaka 'o ngeweka mi'ese so mipiara 'isoka to muna mi ngowaka ma dutu.

²² 'O Mesiroka manga do-dotoko moi-moi wisikokidotoko, so 'una 'o nyawa gee ma kumati 'iamoko ma sala 'awi demoka de wi manaramoka.

²³ Ma 'orasi 'o Musa wi taunu nagi soata, de womau wotagi wakilega 'awi nyawa 'o Israeloka 'ona kokia.

²⁴ De wimake 'o Mesir ma nyawa wisikisaa 'o Israel ma nyawaka wimoi, so 'o Musa wosibooi so wito'oma 'o Mesir ma nyawa gu'una.

²⁵ 'O Musa womangano-nganono dua 'awi nyawa yasahe 'ato 'una ma Jo'oungu ma Dutu wipake ma ngale yakisilaha de yakisipidili manga sangisara ma dodaka. Momongo 'ona koyasahewa.

²⁶ Ko ma wangede de wakimakeli 'o Israel ma nyawa yamididi yomakapesana. Ge'enaka de 'una wakisikatiai wongose, 'Ngini ne'ena ka 'o 'esa moi de 'ido'oa so niomakapesana?'

²⁷ Ma gee wopesa-pesana wimoi 'awi di-diai 'isowo-sowono, 'o Musaka wiitomo de kawosanokau, 'Ee! Nago'ona nigorakie nodadi balusu de nodadi to ngomi mia hakimi?

²⁸ Bolo nomau noito'oma mita 'isoka 'o Mesir ma nyawa ka'uginika?'

²⁹ 'O Musa wo'isenoka 'okia naga 'o nyawa gu'una wongose, de 'una woowara 'o Mesiroka de womanoa 'o Midianoka. Ge'enaka doka 'una womodoka so wi ngowaka 'o nauru yamididi.

³⁰ Ge'enaka de 'o taunu nagi soata, de 'o mala'ekati moi 'iboa 'o Musaka 'o tonaka 'ika-kakasaka 'o Sinai ma gigie ma dateoka. 'O mala'ekati ge'ena 'iboa 'o 'uku ma lurusu ma dodaka. 'O 'uku ge'ena 'o 'ubutino 'isupu.

³¹ 'O Musa woherangi wamake ge'ena, so waika womasisori-sorika monga ma ngale womau wanako 'okia ge'ena. Ge'enaka de wo'isene ma Jou wi 'ilingi 'ingose,

³² 'Ngoi ne'ena ma Jo'oungu ma Dutu, 'ani edete de ni dotumu 'o Abraham de 'o Ishak de 'o Yakub 'isuba-suba.' 'O Musa wimodongo kawoti-tirine so kawomalegawau ge'ena ma 'ubutika.

³³ Ge'enaka de ma Jou wongoseli, 'Na'aikika 'ani sandali sababu 'o tonaka gee ngona noma'oko-'okodeka ge'ena 'itebi-tebini ngano ngoi naga ne'enaka.

³⁴ Ngoi takimakekau de takisinginakau 'ai kawasa 'o Mesir ma tonaoka, gee manga 'ahu 'isangisara ma sala. De to'isenokau yomasigasoko, so tauku la takisisupu 'o Mesir ma tonaoka. So ne'ena, nainou! Ngoi tonisuloko nolio 'o Mesir ma tonaika.'

³⁵ Dea-dea de ngini, 'Esa moi riaka dodoto. 'O Musa nu'unau gee 'o Israel ma nyawa kowidomotekuwa de yongose konee: 'Nago'ona nigorakie nodadi to ngomi mia balusu de mia hakimi?' Ma ngaro koge'ena ma, 'unau ge'ena ma Jo'oungu ma Dutu wisuloko la wodadi balusu de wakisilaha, ma ngekomo 'o mala'ekati gee widoboa 'o 'ubutu 'iluru-lurusoka.

³⁶ 'O Musau ge'ena wakisibalusu 'o Israeloka yosupu 'o Mesiroka, de wokadiai 'o no-nako 'ihera-herangi de 'okia sonaa kobiasawa 'o Mesiroka, 'o Ngooto 'Ite-terebekoka, de 'o tonaka 'ika-kakasaka ma do'ingo 'o taunu nagi soatino.

³⁷ 'O Musau mita wongose 'o Israel ma nyawaka, 'Ma Jo'oungu ma Dutu 'asa winikula 'o nabii moi gee woiriki naga nginioka, 'isoka 'una woiiriki ngoi!'

³⁸ 'O Musau ge'ena gee naga 'o Israeloka manga sigoronaka 'o tonaka 'ika-kakasaka, wodadi 'o mala'ekati ma demo wosidowa-dowanga nanga edete de nanga dotumika gee wisidemo 'o Sinai ma gigieka. 'Unau ge'ena wadawongo de wositotara ngoneno 'o besesongo la nanga 'ahu 'isure ma Jo'oungu ma Dutu wi bionoka.

³⁹ Ngaro koge'ena ma to ngone nanga edete de nanga dotumu kowisingounuwa. 'Ona wiitomo de yomau yolioli 'o Mesirika.

⁴⁰ 'Ona yongose 'o Harunika, 'Miniditiai mia patongo la ge'enau misibalusu. Sababu ngomi komimasinakowau 'okia 'idadi de 'o Musa gee mi'asa misisupu 'o Mesiroka!'

⁴¹ 'O Harun womodeke so yodiai 'o patongo 'o ngai moi 'isoka 'o sapi ma ngowaka, de yositedene manga su-suba 'asa de 'o rame yodiai ma ngale yasuba to 'ona ma sirete manga giama ma jo-jobo.

⁴² So ma Jo'oungu ma Dutu kowakikalesanguawau de kawakisidipidilika yasuba 'okia sonaa 'ita-tarangi 'o diwangoka. Ge'ena 'imakadaene de 'isoka naga 'isilefokou 'o nabii manga bukuoka konee: 'Ee, Israel ma nyawa! Ngini 'o haewani niotoaka de niosisuba ma do'ingo 'o taunu nagi soatino 'o tonaka 'ika-kakasaka ge'ena ma dumutu ko ngoinowa niosisuba.

⁴³ 'Ania barahala 'o Molokhiou ge'ena ma woa nia'asa-asa, niosida-da'asa de nia barahala 'o patongo 'isoka 'o ngoma ge'ena la 'o Refan. Ge'enau niadiaiku ma ngale niasuba. Sababu ge'ena ngoi 'asa tini'umo 'o gurutika doka 'o Babel ma daeraaka.'

⁴⁴ 'O woa ma dingoono gee ma Jo'oungu ma Dutu woboa-boa 'o nyawano ma ngii, gee to ngone nanga edete de nanga dotumu ya'asa-'asa 'o tonaka 'ika-kakasaka, 'o woa ge'ena yodiai moteke ma Jo'oungu ma Dutu wi pareta 'o Musaka. De moteke ma dulada gee ma Jo'oungu ma Dutu wosidumutokau 'o Musaka.

⁴⁵ Ge'enaka de 'o woa ge'ena nanga edete de nanga dotumu ya'asali ma 'orasi 'ona de 'o Yosua yotagi ya'ese 'o daeraa gee ngone podo-dogogere ne'ena. 'Ona ya'ese 'o nyawa ma somoa manga giama ma soatoka, gee ma Jo'oungu ma Dutu wakiginiiki nanga edete de nanga dotumu manga bionoka. 'O woa ge'ena, ge'enaka dau sigado 'o Dautu wopareta.

⁴⁶ 'O Dautu ma Jo'oungu ma Dutu wi singina wasanangi. De 'una woga'asoko ma Jo'oungu ma Dutuka la wosidabi 'o woa moi wosigoko, ma ngale to ma Jo'oungu ma Dutu gee 'o Yakub wisuba-suba.

⁴⁷ Ma ka 'o Salomo wodiai ma woa ge'ena, ma ngale to ma Jo'oungu ma Dutu.

⁴⁸ Duga ma Jo'oungu ma Dutu gee woku-kumati ma sala kowodogogeruwa 'o woaka gee 'o nyawa yodi-diaiku, 'isoka naga 'o nabii manga bukuoka 'isilefoku konee:

⁴⁹ ''O diwanga ge'ena 'ai go-gogere 'ika-karamati, de 'o dunia ge'ena 'ai dou ma ba-bangini. 'O woa gee kokia niomau niditiai gee yadaene tomanoa? De 'o ngii kiaka ma ngale ngoi tomaomasa?

⁵⁰ Ngoiou todiaiku 'okia sonaa moi-moi!' Ma Jo'oungu ma Dutu koge'ena wongose.

⁵¹ 'Esa moi ngini ma goungu de nio'opinoka, de 'isusa niosingounu ma Jo'oungu ma Dutuka. Nimatopongonokau ma Jo'oungu ma Dutu wi demoka! Ngini 'isoka nia edete de nia dotumu so kaitaurika nialawani 'o Ngomasa 'Itebi-tebini.

⁵² Bika kiaka 'o nabii gee 'ania edete de nia dotumu koyakihalebiruwa? 'Ania edete de nia dotumou go'ona yakito'oma ma Jo'oungu ma Dutu wi su-suloko gee ma sirasi yosikawasakau 'ato ma Jo'oungu ma Dutu 'awi Ro-riwo wosingou-ngounu dua woboa. 'Una woboakau de ngini ne'ena 'ania singina 'itorou 'unaka so winisisarakani de winito'oma.

⁵³ 'O mala'ekati-mala'ekati nisitotarokau ma Jo'oungu ma Dutu wi besesongo moi-moi, ma ngini koniamotekuwa."

⁵⁴ 'O 'Agamaka ma Hakimi go'ona kayo'isenoka gee 'o Stefanus wongose-ngose 'iodumu ge'ena, de yomadegese ma ngale so manga do'otasa 'irama.

⁵⁵ Ma 'o Stefanus 'o Ngomasa 'Itebi-tebini wiparetano, womatagade 'o diwangie de wamakede ma Jo'oungu ma Dutu 'awi darangi de 'o Yesus woma'okode 'awi giniraoka 'o Koana ma ngiioka kaisureli so.

⁵⁶ 'O Stefanus wongose, "'Etei! 'O sorogaa 'ipelenga de towimake 'o Nyawa ma Ngowaka woma'okode ma Jo'oungu ma Dutu wi giniraoka!"

⁵⁷ De yohaki-hakimi go'ona manga ngauku yakokiti'imuoka de yomapoa-poaka, deika ka ma moioko wigo'ora.

⁵⁸ 'Ona wisisupuka 'o kota ma dudunoka, 'asa de wiriteto. 'O nyawa yosa-sakisii go'ona manga pakeangi yosido-dogumika 'o dogu'uru wimoioka wi ronga 'o Saulus.

⁵⁹ 'O Stefanus wiriteto ma gu-gudaioka, de womasigasoko, "Jou Yesus, 'ai ngomasa nadawongo!"

⁶⁰ Ge'enaka de womatalibukuku de womapoaka wakua-kuatie, "Jou, 'o so-sowono ne'ena 'uwa nakisidaene 'onaku!" Ka koge'ena wongoseka de wosongenokau.

Kisah Para Rasul

Video Kisah Para Rasul 7

Ikuti Kami:

KONTAK | PARTISIPASI | DONASI