Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali kepala nto pampue to bae angganya, ia mampotanaka resi i Stepanus, to’onya, “Wimba, bara monso gombo to nato’o nsira etu? To’o notomu si’i-si’i.”
2 Panewa i Stepanus manganto’o, “A’i-a’i pasi pa’a-pa’a, padongeka gombongku. Tempo owi, tempo bue ngkita, i Abraham, re’ewa ri tana Mesopotamia, re’e katawanya ia maroo ri kota Haran, tempo etu i Pue Allah anu bae kojo kayawaNya pasi kuasaNya rata resi ia.
3 I Pue Allah manganto’oka ia, ‘Piyaika lipu ngkorom pasi ja’i ngkorom pei inta njo’u lipu to daKusuduka korom.’
4 “Wali i Abraham miyai yako ri tana nto Kasdim pei maroo-roo nja’u kota Haran. Panewa yako etu ia mate yau pa’anya, wali i Pue Allah mampokau wo’u ia malimba wo’u yako ri kota etu, wali ia ma’i wo’u ri tana to takaroos si’i.
5 Wali ri tempo etu i Pue Allah tawa mangawaika i Abraham tana si’i. Sakowa sia’a ia tawa mangawaika. Pei i Pue Allah mamparajanjika i Abraham damangawaika ia tana si’i ri tempo to darata, pasi ane matem i Abraham, tana si’i darawaika wo’u wiyaanya. Pei tempo i Pue Allah mangika parajanjiNya etu, tempo etu i Abraham tawa riana.
6 Wali ewa si’i nato’oka i mPue Allah i Abraham, Ia manganto’o, ‘Wiyaamu damawali ewa tau to rata nja’u tana ntau to yusa. Wali tau pue ntana etu damampowatua sira pasi damangansesai sira opo atu nto’u kasaenya.
7 Pei tau to mampowatua sira etu Aku damangahuku. Wali ojo karoonya Aku mangahuku tau etu panewa wiyaamu damasuwu muni yako ri tana etu, sira dama’i mampue mampakabae Aku ri lipu si’i.’ Wali etu semo gombo i mPue Allah resi i Abraham.
8 Pasi yako etu Ia manganto’oka wo’u i Abraham mangika ada to damawali tondong parajanjiNya etu. Ada etu semo i Abraham pasi wiyaanya darasui. Wali yako etu i Abraham re’e ananya, Ishak. Wali ojo kagananya wayu mbengi i Abraham mangansui ananya etu. Pasi ewa see seja naika Ishak resi ananya i Yakub panewa ewa see seja naika i Yakub resi ananya to sampuyu pei dua to mawali bue ngkita samparia to Yahudi.
9 “Wali ngana i Yakub to mawali bue ngkita etu, samba’a sanganya i Yusup. Wali tukaka i Yusup etu sira mawali timopo rayanya resi ia, see naka sira mampobalu yau ia. Wali i Yusup etu mawali watua ri tana Mesir, pei i Pue Allah re’e siwaka pei ia.
10 Wali Pue Allah mampalaes i Yusup yako samparia kasesanya etu, pasi mangawaika ia kapande. Wali yako ri kapandenya etu see naka i Piraun, makole Mesir, masanang kojo resi ia. Wali i Piraun etu mangokotaka i Yusup mawali gubernur to mangkuasang tana Mesir pasi to mampasilonga samparia palaong ri banua i mPiraun.”
11 Wali i Stepanus mampakapolas gombonya, ia manganto’o wo’u, “Wali i Yusup mawali gubernur ri tana Mesir, panewa yako etu mawali oro ri sambawo tana Mesir etu pasi ri tana Kana’an. Masesa kojo tau to maroo re’e ria. Wali tempo etu bue ngkita tamo seja mangarata pangkoni.
12 Pei i Yakub mangandonge gombo ntau to manganto’o, ‘Re’ewa pangkoni la’u tana Mesir.’ Wali ojo pangandongenya kareba etu ia mampokau ananya, etu semo bue ngkita, dayau mangoli pangkoni lo’u tana Mesir. Wali etu semo ka’uyu ngkaninya sira yau.
13 Panewa yako etu sira yau wo’u kadua ngkaninya. Wali tempo sira nayau lo’u tana Mesir kadua ngkaninya etu, tempo etu i Yusup mampakanasaka sira, ia manganto’o, ‘Aku si’i semo i Yusup, a’i ngkomi.’ Panewa yako etu i Piraun seja napakarebaka ntau mangkonong pua’i pasi pa’a i Yusup.
14 Wali i Yusup mampotuunaka resi pa’anya, i Yakub, pasi resi samparia ja’inya. Ja’inya etu pitu mpuyu pei lima mba’a kaborosinya. Wali ia manganto’oka sira samparia ma’i maroo resi ia.
15 Wali i Yakub pasi ja’inya etu nayau lo’u tana Mesir. Panewa yako etu i Yakub ia mate yaumo. Wali samparia bue-bue ngkita etu sira paka namate yau la’u tana Mesir.
16 Pei sira taa rapongkeli la’u tana Mesir etu. Lemba nsira rakeni muni ri tana Kana’an panewa rapongkeli ri raya mbayau mbatu to naoli i Abraham tempo owi yako ri wiyaa i Hemor nja’u kota Sikem. Wayau mbatu etu inolika i Abraham doi.”
17 Wali i Stepanus manganto’o wo’u, to’onya, “Wali yako etu mosu tempo to napakatantu i mPue Allah damangabanang parajanjiNya resi i Abraham. Tempo etu wiyaa nu bue ngkita to la’u tana Mesir kanjo’u-njo’u tiduga-dugang kaborosinya.
18 Wali tempo etu re’e wo’u samba’a tau mawali makole Mesir. Pei makole etu ia taa manga’angga palaong to naika i Yusup mangansawang tau Mesir tempo ia tawa mate.
19 Wali makole etu mangantipu wiyaa nu bue ngkita pei mangansesai sira. Ia mampakasaaka sira, to’onya, ‘Taji yau ana ngkomi to owo rapoanaka.’ Batuanginya see ana etu mate yau.
20 “Wali tempo etu semo tempo ngkare’e i Musa, pasi ia magaya kojo ri pangkita i mPue Allah. Wali i Musa togo mbuya kasaenya rapiara nja’u banua mpa’anya.
21 Panewa ia rakeni njo’u longko pei rapiyaika yau nja’u ria. Pei tempo ia rapiyaika yau etu ia naoko ntau we’a, ana i mPiraun. Wali ana i mPiraun etu mampiara kojo ia ewa ana ngkoronya.
22 Wali samparia kapande nto Mesir rapotundeka seja i Musa, wali samparia gombonya pasi lengkonya bae kojo batuanginya.
23 “Wali yako etu, ojo kagananya opo mpuyu nto’u, i Musa mampobuuka, ‘Aku dayau mangalo’aka yunungku to Israel.’
24 Wali ia yau mangalo’a. Tempo ia yau mangalo’a etu, ia mangkita samba’a to Israel ia nasesai nto Mesir. Panewa ia yau mangansawang pasi mampasimbalika to Israel etu. Ia mampopate yau tau Mesir to mangansesai ngkai etu.
25 Tempo ia mampopate yau tau Mesir etu ia mampobuuka, ‘Yako palaong si’i yunungku damangansani i Pue Allah mangampake aku mangampalaes sira.’ Ewa see pampobuukanya. Pei to Israel sira taa mangansani.
26 Wali yako etu, ojo kaeonya wo’u rao, i Musa mangarata wo’u dua mba’a tau paka to Israel, sira matingka. Ia rani mampasingkonongka sira wali ia yau manganto’oka sira, to’onya, ‘Gete, komi dua paka to Israel wali taa matao ane komi matingka!’
27 “Pei tau to mangantidas yununya etu ia mangantuko yau i Musa panewa ia manganto’o, ‘Sema nangokotaka korom mawali kepala mami pasi mawali to pobotus mami?
28 Wimba, bara korom rani seja mampopate yau aku ewa nuika ngkorom nampopate yau tau Mesir wengi?’
29 Wali ojo pandonge i Musa gombo ngkai etu ia meka rayanya apa re’e tau to mangansani ia room mampopate yau tau Mesir etu, wali see naka ia miyai yako ri tana Mesir pei maroo-roo nja’u tana ntau to yusa, etu semo nja’u tana Midian. Tempo ia nja’u tana Midian etu ia marongo panewa ia re’e ananya dua mba’a paka langkai.”
30 Wali i Stepanus manganto’o wo’u, to’onya, “Wali tempo i Musa maroo nja’u tana Midian, ojo kagananya opo mpuyu nto’u wo’u, ma’i samba’a pomakau i mPue Allah yako ri saruga rata resi i Musa nja’u pada bone to ri awe nTongku Sinai. Tempo pomakau rata resi i Musa etu, pomakau etu re’e ri raya njunju to mawea.
31 Wali i Musa ipu rayanya mangkita anu to mawali etu apa taa mosi yau junju etu, see naka ia mampakamosu ri awe njunju to mawea etu damangalo’a bara kesaa to mawali. Wali tempo ia mampakamosu etu, tempo etu ia mangandonge loo i mPue mampogomboka ia,
32 manganto’o, ‘Aku semo i Allah. Pasi bue-bue ngkorom tempo owi, i Abraham pasi i Ishak pasi i Yakub, sira samparia paka mampue mampakabae Aku.’ Wali ojo pandonge i Musa gombo i mPue Allah etu, ia rongko-rongko pasi ia tamo rani mangalo’aka junju to mawea etu apa meka rayanya.
33 “Wali i Pue manganto’oka wo’u ia, to’onya, ‘Yali yau sepatu to nupake ngkorom, apa tampa to nupakore ngkorom etu i Pue Allah puenya.’
34 Panewa i Pue manganto’o wo’u, “Aku mangangkita kojo kasesa to narata ntaungKu la’u tana Mesir. Pasi Aku re’e mangandonge loo nsira sakarai mangansosoi. Wali see naka Aku ma’i yako ndate saruga damampalaes sira. Wali mai rire. Aku damampokau korom yau muni ri tana Mesir.’ Etu semo to nato’oka i mPue i Musa.
35 “Wali i Musa etu, ia semo to yau mangansawang bue-bue ngkita to Israel tempo owi, pei sira mampobo’o ia. Sira manganto’o, ‘Sema nangokotaka korom mawali kepala mami pasi mawali to pobotus mami?’ Ewa wetu nato’o nsira, pei kamonsonya i Musa napokau i mPue Allah damawali kepala nsira pasi damawali seja to mangampalaes sira. Pasi tempo ia mangika palaong etu, ia nasawang kojo mpomakau i mPue Allah to rata resi ia seore ri raya njunju to mawea etu.
36 Wali i Musa ia mangkeni yau to Israel yako la’u tana Mesir. Pasi ri rayanya ia mangkeni yau tau etu ia mangika palaong to mampakaipu raya ntau pasi mangika anu to taa rapobiasa to mawali tondong resi tau. Palaong to nikanya etu re’e to nikanya la’u tana Mesir pasi nja’u Tasi Miaro pasi nja’u pada bone opo mpuyu nto’u kasaenya.
37 Wali i Musa manganto’oka seja to Israel etu, to’onya, ‘I Pue Allah damangampilisika komi samba’a to pantuntu tuntuNya to yako ri oyo nu yunu ngkita seja. To pantuntu tuntuNya etu Ia damangampilis ewa nikaNya nangampilis aku.’ Ewa see to’oka i Musa to Israel.
38 Wali i Musa ia semo mawali to mamponsaruka to Israel nja’u pada bone. Ia semo to mangandonge gombo mpomakau i mPue Allah to mampogomboka ia ri Tongku Sinai panewa ia wo’u mamporata resi buebue ngkita gombo etu. Wali tuntu to mangawaika katuwu yako resi i Pue Allah, tuntu etu rasarumakaka resi i Musa, panewa tuntu etu ia mamporata resi kita.
39 “Pei bue ngkita tempo owi etu, sira bo’onya mampalaika ia. Sira mangansapu ia pasi sira rani kojo rayanya mawolili muni lo’u tana Mesir.
40 Pasi tempo i Musa masaemo ndate Tongku Sinai, tempo etu sira manganto’oka tukaka i Musa, i Harun, to’o nsira ‘Ikaka kami bara sawei mba’a tau-tau to darakeni ri tango mami. Apa kami tamo kunsani kesaa to mawali resi i Musa to mangkeni yau kami seore yako la’u tana Mesir!’ Ewa wetu nato’o nsira.
41 Wali ri tempo etu sira mangika tau-tau to ewa ana nsapi ta’anya. Panewa sira mampampueka pampue resi tau-tau etu, pasi sira ndende kojo rayanya mangkita tau-tau to nika nsira etu.
42 Wali yako etu i Pue Allah mangandolika tangoNya yako resi sira pasi Ia ojo mangabiaka yau sira mampue batu’e to re’e ri yangi. Wali palaong etu rapakanasa ri raya buku nto pantuntu tuntu i mPue Allah. Gombo i mPue Allah to ratulis reria manganto’o, ‘O to Israel. Tempo komi nja’u pada bone opo mpuyu nto’u kasaenya, tempo etu komi re’e mansimbale yau binatangbinatang to danupampueka. Pei pampue ngkomi etu si’a rapampueka resi Aku,
43 komi mampue mampakabae pue to yusa to rato’oka i Moloklah. Wali komi mangkeningkeni tenda to nja’u tautaunya, pasi komi mangkeni seja tau-tau to tondong batu’e to rato’oka Repan. Tau-tau to etu nuika ngkomi danupampue ngkomi apa etu semo to nupakabae ngkomi. Wali see naka Aku damantaji yau komi njo’u longko. Longko wo’u yako ri kota Babel daKupangantaji yau komi.’
44 “Etu semo gombo i mPue Allah resi bue-bue ngkita tempo owi. Wali tempo etu, tempo sira nja’uwa nja’u pada bone, sira re’e tenda to nja’u peti to la’u parajanji i mPue Allah la’u rayanya. Tenda etu nato’oka i mPue Allah i Musa mangika, wali sira mangika tenda etu mangaluluka tondong to napapokitaka i mPue Allah i Musa.
45 Wali yako etu tenda etu nakeni nu bue-bue ngkita tempo sira sindarandara pei i Yosua masua ri tana ntau to yusa. Tana etu sira mangoko yau yako ri tau puenya apa tau puenya etu narubak i mPue Allah yako ri tango nsira. Wali tenda etu re’e nja’u tana to naoko nsira etu sampe rata temponya i Makole Daud.
46 I Daud etu mampakasanang raya i mPue Allah. Pasi ia mamporapika resi i Pue Allah see ia maya mangawanguka i Pue Allah banua to danapake ntau mampue mampakabae i Pue Allah, Allah to napakabae nu bue ngkita, i Yakub, tempo owi.
47 Pei i Pue taa mangawaika i Daud mangawangu banua etu. Pei yako etu, tempo i Salomo ana i Daud mawali makole, tempo etu ia semo to nawaika i mPue mangawanguka Ia banua.
48 “Pei nempo Ia mangawaika i Salomo mangawanguka Ia banua etu, kamonsonya, i Pue Allah anu to bae kojo anggaNya etu, Ia taa maroo-roo ri raya banua to naika nto lino. Apa ane ewa to natulis nto pantuntu tuntu i mPue tempo owi,
49 i Pue Allah manganto’o, ‘Yangi semo gadera daKupatunda maporenta pasi lino tampa daKupamposaka witingKu. Wali nempo tare banua to danuwanguka ngkomi Aku, taa mawei. Pasi nempo tare tampa to damawali tampa karoosngKu, taa seja mawei.
50 Apa Aku semo to mampapowali kasamparianya.’ Etu semo gombo i mPue Allah to natulis nto pantuntu tuntuNya tempo owi.”
51 Wali i Stepanus manganto’oka wo’u kepala-kepala etu, to’onya, “Gete komi mako’o wo’omu! Komi taa kojo rani mampalaika bara mampodongeka kareba yako resi i Pue Allah. Komi sangkani mangewa i Nosa Mapasing ewa naika bue-bue ngkita tempo owi.
52 Tare pasi samba’a to pantuntu tuntu i mPue Allah tempo owi to taa nasesai nu bue ngkita etu. Pasi sira mampopate yau samparia tau to mampakarebaka yami manganto’o, ‘Dama’i Makole parajanji i mPue Allah, Ia to tare dosaNya.’ Wali Makole parajanji i mPue Allah to nato’o nsira etu, i Yesu semo, Ia ma’i pu’u seore pei si’i-si’i komi roomo mamposora yau pasi mampopate yau Ia.
53 Wali gete! Komi roomo rawaika porenta i mPue Allah to naporataka mpomakauNya kita, pei nempo ewa see komi mamporayaka mangangewa porenta etu, wali komi semo to sala.” Wali etu semo gombo i nStepanus manganto’o notonya.
54 Wali ojo pangandonge ngkepala-kepala etu gombo i nStepanus, sira maja’a kojo rayanya sakangke’i baganginya.
55 Pei i Stepanus bae kojo karoso ndaya to nawaika i Nosa Mapasing ia, wali ia mangalo’aka nto’u yangi pei mangkita kayawa i mPue Allah. Pasi ia mangkita seja i Yesu makore ri tondo ngkana i mPue Allah.
56 Wali ia manganto’o, “Lo’a! Aku mangkita yangi tiloka pasi aku mangkita seja Wiyaa nto Lino makore ri tondo ngkana i mPue Allah.”
57 Wali kepala-kepala etu maroso loonya sakaboo pasi sira mangaba’a talinganya apa tamo rani mangandonge gombo i nStepanus etu. Panewa sira sindara-ndara yau mangansoko ia.
58 Sira mangaditi ia njo’u sambali ngkota damangantasoka ia watu see ia damate yau. Rata nja’u ria, tau to mampakasala i Stepanus tempo pangabotus etu sira mangawonsu bajunya to makumba pei mangansaka yau ri awe mbiti ngkai to mangurawa to sanganya Saulus see ia mangajagai. Panewa sira mula mangantasoka i Stepanus watu.
59 Wali tongo-tongonya i Stepanus nataso-tasoka nsira watu etu ia makai-kai, ia manganto’o, “O Pue Yesu oko muni toniingku!”
60 Ojo karoonya ia makai-kai etu ia mambokotu yau panewa maroso loonya kaboo mampokaika tau to mangantasoka ia watu etu, ia manganto’o, “O Pue, ne’e mangkitanaka dosa nsira si’i.” Wali ojo karoonya ia manganto’o gombo etu ia puramo nosanya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA