Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Imam Agung beketuan lẽq Stepanus, "Napi selapuq saq tesampẽang siq dengan nike kenaq?"

² Jawab Stepanus, "Semeton-semeton dait bapaq-bapaq! Dengahang tiang! Sendẽqman Ibrahim, leluhurte nike ngalih ojok Haran, sewaktu ie masih ndot lẽq Mesopotamia, Allah saq Mahemulie rauh tipaq ie

³ dait bemanik, 'Bilin negerinde dait selapuq kadang jarinde. Lumbar ojok negeri saq gen Tiang petitoqang lẽq side.'

⁴ Make Ibrahim bilin negeri Kasdim, terus ngalih ojok Haran. Sesampun bapaqne Ibrahim ninggal, Allah manikang Ibrahim ngalih malik ojok negeri niki, saq semeton-semeton dait bapaq-bapaq taoqin mangkin niki.

⁵ Lẽq waktu nike ndẽq araq separone lẽman negeri niki saq Allah icanin tipaq Ibrahim jari dowẽne, timaqne sejengkak, ndẽqne teicanin tipaq ie. Laguq Allah bejanji bahwe Ie gen ngicanin tipaq Ibrahim jari dowẽne dait jari dowẽ keturunanne. Waktu nike Ibrahim ndẽqman bedowẽ bije.

⁶ Laguq niki saq temanikang Allah tipaq ie, 'Keturunande gen ndot sebagẽ dengan pendateng lẽq negeri dengan lain. Dengan-dengan negeri nike gen jariang ie pade panjak dait perlakuang ie pade secare kejem samas taun ngonẽqne.

⁷ Laguq Tiang gen hukum bangse saq jariang ie pade panjakne, dait ie pade gen sugul lẽman negeri nike dait gen nyembah Tiang lẽq taoq niki.'

⁸ Beterus Allah ngicanin tipaq ie perjanjian sunat. Make sesampun Ishak, bije Ibrahim tebijeang, Ibrahim sunat ie sewaktu ie beumur baluq jelo. Beterus Ishak ẽndah sunat bijene, aranne Yakub. Dait Yakub ẽndah sunat kedue olas bijene, saq jari bapaq-bapaq leluhur bangse Yahudi.

⁹ Bapaq-bapaq leluhurte nike talon atẽ lẽq Yusup, sehingge ie pade sepakat jual Yusup jari hambe lẽq Mesir. Laguq Allah araq bareng-bareng kance ie,

¹⁰ Allah bẽbasang ie lẽman selapuq kesusahanne dait ngicanin ie hikmat dait kebijaksanean sewaktu ie ngadep Piraun, raje Mesir, sehingge Piraun jariang ie gubernur negeri Mesir dait penguase istane Piraun.

¹¹ Terus araq bahle kelapahan saq belẽq lẽq selapuq negeri Mesir dait Kanaan sehingge dengan menderite gati. Leluhurte ndẽqne bau mauq keloran.

¹² Make sewaktu Yakub dengah araq gandum lẽq Mesir, ie suruq bije-bijene, leluhurte, lumbar ojok derike. Nike saq penembẽq.

¹³ Sewaktu ie pade lumbar saq kedue kaline, Yusup bebadaq tipaq semeton-semetonne nike bahwe ie setetune Yusup. Waktu nike baruq tewikanang siq raje Mesir mengenai keluarge Yusup.

¹⁴ Beterus Yusup ngirim berite tipaq Yakub, bapaqne jari tunas ie kance selapuq keluargene ngalih ojok Mesir -- selapuqne araq pituq pulu lime dengan.

¹⁵ Sesampun nike Yakub ngalih ojok Mesir dait lẽq derike ie kance selapuq leluhurte ninggal.

¹⁶ Beterus jenazah ie pade tejauq tulak ojok Sikem dait temakamang lẽq makam saq sampun tebayah kadu kẽpẽng siq Ibrahim lẽman suku bangse Hemor lẽq Sikem.

¹⁷ Sewaktu gen dateng waktune Allah nepatin janji-Ne tipaq Ibrahim, bangsente lẽq Mesir sampun sayan luwẽq.

¹⁸ Ahirne sopoq raje lain saq ndẽq kenal Yusup, mrẽntah lẽq Mesir.

¹⁹ Licik gati entan raje nike tipaq bangsente dait kejem lẽq leluhurte. Ie paksaq ie pade adẽqne netẽh bebẽaq-bebẽaq saq baruq teanakang, adẽqne karẽ-arẽ dait matẽ.

²⁰ Lẽq waktu nike Musa tebijeang; ie bebẽaq saq solah gati. Telu bulan ngonẽqne ie tepeliharaq lẽq balẽ bapaqne,

²¹ dait sesampun ie tetetẽh, putri Piraun bait ie, beterus ie tepeliharaq maraq bijene mẽsaq.

²² Selapuq ilmu bangse Mesir teajahang tipaq ie dait ie jari dengan saq bekuase gati dalem ucapan dait perbuatan.

²³ Waktu Musa beumur petang dase taun, ie beniat lumbar serioq keadaan bangsene dengan Israel.

²⁴ Beterus serioqne sopoq dengan lẽq antare bangse Israel teaniaye siq sopoq dengan Mesir; terus ie bẽle dengan saq teaniaye nike, dait matẽq dengan Mesir nike.

²⁵ Musa paran bangsene gen ngerti bahwe Allah ngutus ie jari bẽbasang ie pade. Laguq ie pade ndẽq ngerti.

²⁶ Jemaqne, ie serioq ẽndah due dengan Israel kenyeke besiaq, terus ie berusahe damẽang ie pade. Basene, 'Side pade niki besemeton kembẽq side pade besiaq?'

²⁷ Laguq dengan saq ngempuk baturne nike jelek Musa ojok sedi dait bebase,

²⁸ 'Sai saq ngangkat side jari pemimpin dait hakim tiang pade? Napi side mẽlẽ matẽq tiang ẽndah maraq side matẽq dengan Mesir nike rubin?'

²⁹ Waktu Musa pirengang napi saq teucapang siq dengan nike, ie pelai lẽman Mesir terus ndot lẽq negeri Midian. Lẽq derike ie mauq due bije.

³⁰ Petang dase taun sesampun nike sopoq malaẽkat rauh tipaq Musa lẽq padang gurun dẽkẽt Gunung Sinai. Malaẽkat nike rauh dalem api lẽq bebenes saq kenyeke nyale.

³¹ Musa bengaq cingakin hal nike, make ie dateng ngerapetin taoq nike adẽqne wikanang napi setetune nike. Terus pirengangne suare Tuhan bemanik,

³² 'Tiang Allah leluhurde, Tiang Allahne Ibrahim, Ishak dait Yakub.' Musa jari ngijik siq takutne, terus ndẽqne bani malik cingakin bebenes nike.

³³ Beterus Tuhan bemanik malik, 'Lepas sandel saq side kadu nike, sẽngaq tanaq saq taoq side nganjeng nike tanaq saq suci.

³⁴ Tiang sampun serioq dait merhatiang paitne penderitean umat Tiang, lẽq Mesir. Tiang sampun dengah keluhan, dait Tiang gen turun bẽbasang ie pade. Mangkin, silaq! Tiang gen ngutus side tulak ojok Mesir.'

³⁵ Musa niki ie saq ndẽq teakuq siq bangse Israel dait saq tetolaq siq ucapan niki, 'Sai saq ngangkat side jari pemimpin dait hakim tiang pade?' Laguq malahan ie saq teutus siq Allah jari pemimpin dait penyelamat, langan malaẽkat saq rauh tipaq ie lẽq tengaq bebenes saq nyale nike.

³⁶ Musa nike saq mimpin bangse Israel sugul lẽman Mesir siq care piaq keajaipan-keajaipan dait hal-hal saq luar biase lẽq Mesir, lẽq Segare Bẽaq dait lẽq padang gurun petang dase taun ngonẽqne.

³⁷ Musa niki ẽndah saq bebase lẽq bangse Israel bahwe, 'Allah gen ngutus sopoq nabi maraq tiang niki tipaq side pade lẽman bangsende mẽsaq.'

³⁸ Musa nike saq araq lẽq tengaq-tengaq bangse Israel lẽq padang gurun, jari perantare tipaq malaẽkat saq bemanik lẽq ie lẽq Gunung Sinai kance leluhurte. Ie saq nerimaq lẽman Allah manik saq idup jari tesampẽang tipaq ite.

³⁹ Timaq maraq nike leluhurte nẽnten kayun taat lẽq ie. Ie pade nolaq Musa dait ie pade melẽt tulak ojok Mesir.

⁴⁰ Ie pade bebase lẽq Harun, 'Piaqang tiang pade dẽwe-dẽwe, adẽq dẽwe-dẽwe nike mimpin tiang pade. Sẽngaq tiang pade ndẽq nenaoq malik napi saq nimpe Musa, saq pimpin tiang pade sugul lẽman Mesir!'

⁴¹ Terus lẽq waktu nike ie pade miaq sopoq tetato anak sampi, beterus ie pade ngaturang kurban tipaq tetato nike dait ngaraqang gawẽ jari nyembah barang saq ie pade piaq mẽsaq.

⁴² Make Allah bilin ie pade dait menengang ie pade nyembah bintang-bintang lẽq langit. Nike pade maraq saq tetulis lẽq dalem kitab nabi-nabi. Maraq niki, 'Hai dengan-dengan Israel! Ndẽqne umaq Tiang side nyembelẽh dait ngurbanang binatang sengonẽq petang dase taun lẽq padang gurun.

⁴³ Kẽmah berhale Molok saq side jauq-jauq bareng-bareng kance tetato bintang berhalende, Repan; nike tetato saq side piaq jari tesembah. Keranaq nike Tiang gen tetẽh side jangke dateng itoqan, lẽq negeri Babel.'

⁴⁴ Kẽmah taoq Allah rauh tipaq manusie araq lẽq leluhurte lẽq padang gurun. Kẽmah nike tepiaq siq prẽntah lẽman Allah tipaq Musa dait menurut conto saq tepetitoqang siq Allah tipaq ie.

⁴⁵ Beterus kẽmah nike tejauq siq leluhurte sewaktu ie pade bareng kance Yusak lumbar ngerebut negeri niki lẽman kekuasean bangse-bangse saq tetundung siq Allah lẽq julun ie pade. Kẽmah nike araq lẽq derike jangke dateng jaman Daud.

⁴⁶ Daud nyenengang Allah, dait tunas lẽq Allah adẽqne teijinang miaq sopoq gedẽng umaq Allah saq tesembah siq Yakub nike.

⁴⁷ Laguq Nabi Sulaiman saq piaq gedẽng umaq Allah.

⁴⁸ Laguq Allah saq Maheagung nẽnten meneng lẽq dalem gedẽng saq tepiaq siq manusie; maraq saq tesampẽang siq nabi,

⁴⁹ 'Langit nike tahte Tiang, dait gumi lamak naẽn Tiang. Gedẽng napi gen side piaqang Tiang? Lẽq mbẽ taoq Tiang mentelah? Maraq nike manik Tuhan.

⁵⁰ Tekan Tiang mẽsaq saq cipteang selapuqne?' maraq nike Manik Allah.

⁵¹ Hai dengan-dengan saq pagah, saq keras atẽ dait kedok, side tetep nentang Roh Suci, pade maraq leluhurde, maraq nike ẽndah side.

⁵² Napi araq nabi saq ndẽq teaniaye siq leluhurde? Ie pade nyematẽq utusan-utusan lẽman Allah saq laẽq sampun nyampẽang bahwe Dengan Kenaq lẽq arepan Allah nike gen rauh. Terus mangkin side pade matẽq dait behianat lẽq Ie.

⁵³ Malaẽkat-malaẽkat sampun nyampẽang Hukum Taurat tipaq side pade, laguq side pade ndẽq mẽlẽ taat lẽq hukum nike!"

⁵⁴ Sesampun anggote-anggote Mahkamah Agame nike pirengang selapuqne saq tesampẽang siq Stepanus nike, ie pade jari sakit angen dait gedek gati lẽq ie.

⁵⁵ Laguq Stepanus saq tekuasein siq Roh Suci, serioq andang langit. Ie serioq kemuliean Allah dait Deside Isa ngadeg lẽq sedi kanan Allah.

⁵⁶ Pade serioq basen Stepanus, "Tiang serioq sorge kebukaq dait Bije Manusie nganjeng lẽq sedi kanan Allah!"

⁵⁷ Anggote-anggote mahkamah nike nyumpel kentokne sambil nyurak-nyurak, terus beriuk nyerang Stepanus.

⁵⁸ Ie pade oros Stepanus sugul ojok luah kote, beterus pelẽwasne kadu batu. Saksi-saksi noloq jubah ie pade lẽq julun naẽn sopoq terune aranne Saulus.

⁵⁹ Sewaktu ie pade pelẽwas Stepanus, Stepanus bekuih, "Junjungan Saq Mulie Deside Isa, terimaq roh tiang!"

⁶⁰ Terus ie sujut dait bekuih siq suare saq belẽq, "Junjungan Saq Mulie, sampunang dose niki tetanggungang tipaq ie pade!" Sesampun bebase maraq nike, ie ninggal.

Kisah Para Rasul

Video Kisah Para Rasul 7

Ikuti Kami:

KONTAK | PARTISIPASI | DONASI