Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Isofu khõ Zitefano ere sebua imane, "Hadia, duhu fefu niw̃a'õ niha andrõ?"
2 Itema li Sitefano imane, "He ya'ami ira talifusõ ba ira Ama! Mifondrondrongo niw̃a'õgu! No mõi Lowalangi khõ duada Aberahamo fatua lõ si tewu'a ia moroi ba Harana, me ba Mezofotamia so ia nasa,
3 imane, 'Rõi danõmi ba talifusõu. Ae'e ba mbanua ni'oroma'õ-Gu khõu dania.'
4 Irõi danõ Kasedimi Aberahamo, awu'a ia ba Harana. Me no mate nama Gaberahamo, Ifawu'a Lowalangi Gaberahamo ba danõ andre, si so ira talifusõ awõ ndra ama iada'e.
5 Me inõtõ da'õ ma'ifu lõ nibe'e Lowalangi khõ Gaberahamo danõ da'e tobali okhõtania; lõ mube'e khõnia zi sambua lahe. Ba hiza no Ifabu'u Lowalangi wame'e khõ Gaberahamo tobali okhõtania awõ nga'õtõnia. Lõ nasa iraono khõ Gaberahamo me inõtõ da'õ.
6 Ba hiza Imane khõnia Lowalangi, 'Tobali si fatewu nga'õtõu dania ba danõ niha bõ'õ. La'osawuyu ira sowanua ba danõ andrõ lafakao ira õfa ngaotu fakhe wa'ara.
7 Ba hiza, Uhuku niha sangosawuyu ya'ira, larõi danõ andrõ dania ba lafosumange Ndra'o ba nahia andre.' Si manõ wehede Lowalangi.
8 Me no aefa Iw̃a'õ da'õ, I'a'aro'õ wawu'usa li andrõ Lowalangi faoma famoto iraono. Andrõ me no tumbu Giza'aki, ono Gaberahamo, laboto ia me no w̃alu ngaluo wa'ebuania. Iboto gõi nononia Iza'aki, ya'ia Yakobo. Ba iboto gõi Yakobo ndraononia andrõ si felendrua, si tobali furugõ niha Yahudi.
9 Afõkhõ dõdõ ndra tuada khõ Yosefo irege la'amawa ia tobali sawuyu ba danõ Miserai. Ba hiza faofao khõnia Lowalangi.
10 Lowalangi andrõ zangefa'õ ya'ia moroi ba ngawalõ gabula dõdõ. Ibe'e khõnia wa'ebua dõdõ ba fa'atuatua Lowalangi me mõi ia fõna Wara'o razo ba danõ Miserai, irege ibali'õ ia gubernur ba danõ Miserai ba tobali satua ba nomo Wara'o.
11 Aefa da'õ ba alua lofo sebua ba zi sagõrõ tanõ Miserai awõ danõ Kana'ana, irege marase sibai niha. Ba lõ lasõndra zoguna ira furugõda.
12 Ba me irongo Yakobo so gõ ba danõ Miserai, ba ifatenge ndraononia, ya'ia ndra tuada, we'amõi ba da'õ si fõfõna sibai.
13 Me mõi ba zi mendrua kali, i'ombakha'õ ia Yosefo khõ ndra talifusõnia. Ba awena aboto ba dõdõ razo danõ Miserai dalifusõ Yosefo andrõ.
14 Aefa da'õ i'oroi'õ Yosefo khõ namania Yakobo, ena'õ na awu'a ia awõ zi sambua omo ya'ira numalõ ba danõ Miserai -- fitu ngafulu a lima niha wa'ato fefu.
15 Ba awu'a Yakobo numalõ ba danõ Miserai ba mate ia ba da'õ awõ ndra tuada.
16 La'ohe mangawuli mbotora ba Zikhema ba lako'o ba lewatõ si no i'õli Aberahamo moroi ba mado ndraono Hemori ba Zikhema.
17 Me no arakha irugi inõtõ Ifalua wawu'usa li-Nia Lowalangi khõ Gaberahamo, no itugu ato soida ba danõ Miserai.
18 Ba gafuriata so razo tanõ bõ'õ si lõ mangila Yosefo samatõrõ ba danõ Miserai.
19 I'o'aya soida razo andrõ ba ifakao ndra tuada. Ifaso ira ena'õ latibo'õ ndraono sawuyu khõra ena'õ tefakao ba mate.
20 Me inõtõ da'õ tumbu Moze; iraono si sõkhi sibai ia. Tõlu waw̃a terorogõ ia ba nomo namania,
21 ba me no tetibo'õ ia, maoso nono Wara'o alawe ihalõ ba irorogõ hulõ nononia samõsa.
22 Tefahaõ ia ba ngawalõ wa'atuatua ba danõ Miserai ba tobali ia niha safõnu kuaso na fahuhuo ia ma hadia ia nilaunia.
23 Me no õfa wulu fakhe wa'ebua Moze tumbu ba dõdõnia wamaigi soinia niha Gizera'eli.
24 I'ila samõsa moroi ba soinia andrõ nifakao niha Miserai; ilau mbalõ niha nifakao da'õ ba ibunu niha Miserai andrõ.
25 Iwalinga aboto ba dõdõ soinia Moze wa Ibali'õ fakake ia Lowalangi ba wangefa'õ ya'ira. Ba hiza lõ aboto ba dõdõra.
26 Mahemolu da'õ i'ila zui darua niha Gizera'eli si fasõndra, omasi ia wangatulõ'õ ya'ira. Imane, 'He ya'ami ira talifusõ, no si fatalifusõ ami andre. Hana wa fasõndra ami?'
27 Ituli'õ Moze zamõzi awõnia andrõ ba imane khõ Moze, 'Haniha zamataro ya'ugõ tobali salaw̃a ba sanguhuku khõma?
28 Hadia omasi'õ õbunu ndra'odo si mane famunumõ niha Miserai andrõ menewi?'
29 Me irongo niw̃a'õ niha andrõ Moze, moloi ia moroi ba danõ Miserai, torõi ia ba danõ Midiano. Mo'ono ia ba da'õ dombua ono matua.
30 Õfa wulu fakhe aefa da'õ mõi khõ Moze samõsa mala'ika ba danõ si mate ahatõ ba Hili Sina'i. Tohare mala'ika andrõ bakha ba holahola galitõ ba ngafu ndru'u.
31 Ahõli dõdõ Moze wamaigi da'õ, irege ihatõ'õ ia wamaigi hadia ia da'õ. Irongo li Zo'aya sanguma'õ,
32 'Lowalangi ndra tuau Ndra'odo; Lowalangi Gaberahamo, Lowalangi Giza'aki ba Lowalangi Yakobo.' Manizinizi Moze bõrõ wa'ata'u irege lõ ifahatõ ia sa'ae ba gamaudu da'õ.
33 Aefa da'õ irongo zui li Zo'aya sanguma'õ, 'Heta mbadagahe si so ba gaheu andrõ. Bõrõ me tanõ ni'amoni'õ danõ ba zi zizio ya'ugõ.
34 No U'ila ba no Uhaogõ wangosisi'õ famakao mbanua-Gu ba danõ Miserai. No Urongo wangarõngarõra ba tohare sa'ae Ndra'o ba wangefa'õ ya'ira. Aine, iada'e! Ufatenge ndra'ugõ wangawuli ba danõ Miserai.'
35 Moze andrõ, si lõ latema'õ niha Gizera'eli ba nitimbagõ faoma fehede, 'Haniha zamataro ya'ugõ tobali salaw̃a ba sanguhuku khõma?' ba sindruhunia no nifatenge Lowalangi tobali salaw̃a ba sangorifi, si fao fanolo moroi ba mala'ika si mõi khõnia ba ndru'u si holahola andrõ.
36 Moze andrõ zolohe soi Gizera'eli we'amõi baero moroi ba danõ Miserai, me no ilau zagahõlihõli dõdõ ba danõ Miserai, ba Nasi Soyo awõ ba danõ si mate õfa wulu fakhe wa'ara.
37 Ya'ia zanguma'õ ba soi Gizera'eli, 'Ibe'e khõmi samõsa zama'ele'õ Lowalangi nifili-Nia moroi ba gotaluami, si mane fanuyu-Nia ya'odo.'
38 Moze andrõ gõi, ba gotalua soi Gizera'eli ba danõ si mate, zi tobali sangiagõ otalua ndra mala'ika si fahuhuo khõnia ba Hili Sina'i ba ira tuada. Ya'ia zanema turia sauri moroi khõ Lowalangi ba wama'ema khõda.
39 Ba hew̃a'ae si manõ ba lõ sa'atõ la'o'õ linia ira tuada. Latimbagõ ia ba omasi ira mangawuli ba danõ Miserai.
40 Lamane khõ Ga'aroni, 'Fazõkhi khõma lowalangi, ena'õ idõnia'õ ndra'aga. Bõrõ me lõ ma'ila hadia zalua khõ Moze, sangeheta ya'aga moroi ba danõ Miserai!'
41 Me inõtõ da'õ lafazõkhi nono zaw̃i, ba labe'e zumange ba nono zaw̃i balaki andrõ. Lalau gowasa wamosumange nifazõkhi dangara samõsa.
42 Andrõ Irõi ira Lowalangi, aefa da'õ lafosumange ndrõfi ba mbanua. Faudu da'õ ba nisura ba mbuku ndra sama'ele'õ. Lamane, 'He ya'ami niha Gizera'eli! Tenga khõ-Gu wa mitaba ba mibe'e zumange ba zi õfa wulu fakhe ba danõ si mate.
43 No mi'osa'õ nose Molokho awõ lowalangimi dõfi andrõ ya'ia Refano; da'õ wamaedo nifazõkhimi ba nifosumange. Bõrõ da'õ Utibo'õ ami arõu yefo ba danõ Mbabeli.'
44 Ose nahia we'amõi Lowalangi ba niha, so khõ ndra tuada ba danõ si mate. Tefazõkhi nose andrõ niw̃a'õ Lowalangi khõ Moze molo'õ dumaduma ni'oroma'õ Lowalangi khõnia.
45 Aefa da'õ la'ohe nose andrõ ira tuada me lafadõni danõda andre si fao Yosua moroi ba wa'abõlõ soi nifofanõ Lowalangi fõnara. So nose andrõ irugi ginõtõ Dawido.
46 I'omusoi'õ dõdõ Lowalangi Dawido. I'andrõ khõ Zo'aya ena'õ ifazõkhi sambua nomo khõ Lowalangi nifosumange Yakobo.
47 Ba hiza Salomo zamazõkhi omo andrõ khõ Lowalangi.
48 Ba hiza no fondrege zebua Lowalangi lõ torõi Ia ba nomo nifazõkhi niha; bõrõ me no tesura ba mbuku zama'ele'õ si mane,
49 'Dadaoma-Gu mbanua si yaw̃a, ba danedane gahe-Gu danõ. Hadia nomo nifazõkhimi khõ-Gu? Hezo nahia khõ-Gu wolombase?
50 Hadia tenga Ya'o zamazõkhi fefu hadia ia?' Imanõ Lowalangi.
51 Tenga mai wa'abe'e hõgõmi ya'ami ira talifusõ ba afõkhõ sibai khõmi wolo'õ khõ Lowalangi! No afiso sibai dõgi dalingami wamondrongo Taroma Li Lowalangi! Fagõlõ ami khõ ndra tuami; wolaw̃a Eheha Lowalangi!
52 Hadia so zama'ele'õ si lõ lafakao ira tuami? Labunu fefu nifatenge Lowalangi andrõ mbõrõta si no mangombakha wa tohare Genoni Lowalangi satulõ andrõ. Ba iada'e mi'a mbõli ba mibunu Zawuyu Lowalangi andrõ.
53 No lafa'ema khõmi goroisa Lowalangi ira mala'ika, ba hiza lõ mi'o'õ!"
54 Me larongo ira ndrotondroto Zanguhuku ba Agama niw̃a'õ Zitefano andrõ fefu, afõkhõ dõdõra ba mofõnu sibai ira khõnia.
55 Ba hiza, ifaigi mbanua si yaw̃a Sitefano nifatõrõ Geheha Lowalangi andrõ. I'ila lakhõmi Lowalangi ba no muzizio Yesu ba nahia wamatõrõ ba gambõlõ Lowalangi.
56 Imane Sitefano, "Mifaigi, u'ila teboka zorugo ba no muzizio ba gambõlõ Lowalangi Nono Niha nifatenge Lowalangi!"
57 Laduhõ dõgi dalingara ndrotondroto rafe Zanguhuku ba Agama ba mu'ao ira, lahurufai Zitefano.
58 Ladõni ia baero mbanua ba latebu ia kara. Niha sato sangila salua andrõ, lafagogohe'õ nukhara khõ nono matua sotõi Saulo.
59 Me latetebu Zitefano, mu'ao ia imane, "He Yesu So'aya, tema nosogu!"
60 Ibalõduhini danõ ba mu'ao ia ebua linia imane, "He So'aya be'e aefa khõra horõra andre!" Me no aefa iw̃a'õ da'õ ba aetu nosonia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA