Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi kebala Imam Rayeh ni Stepanus, "Matuké bala ineh?"
2 Idi kebala Stepanus, "O lun kinanak idi lun taman-taman, ninger muyuh. Allah luk meluun rayeh nengegala' bururNeh kuan tepun tau Ibrahim, kareb ieh idi déi' bawang Mesopotamia kareb nateh ieh netudo bang bawang Haran,
3 idi kebala Tuhan neneh, 'Remuat iko rat bang bawangmu ini idi rat arang pupumu, idi amé' inan sebuleng bawang luk uenKu nicul kuanmu.'
4 Ibrahim neremuat rat bang bawang lun Kasdim, idi ieh tudo déi' Haran. Idi kareb tamanneh pangeh naté, Allah nemubuh neneh rat déi' macing inan tana' ini luk inan muyuh mudeng nekini.
5 Idi Allah na nemaré sesuut tana' pana' kuanneh ratnan bawang ini, kirayeh lengayan pana' nateh. Iamo' Ieh nepejani' maré tana' ineh kuanneh idi kuan inulneh pana', sagan pana' kareb ineh Ibrahim na anak.
6 Idi Allah nepebala kudeng ini, 'Idi mupunneh miak tudo bang bawang sakai, idi tebanendeh idi uen ngedereh apat ngeratu lak kinioneh.'
7 Idi teh Allah nepebala, 'Ui sikal ngukum pupu luk naban nedeh ineh, idi pangeh ineh miak ideh remuat rat déi', idi sembayang Negku ieni.'
8 Idi Allah nemaré ni Ibrahim aceh pejani' sunat. Idi Ibrahim nenunat ni Isak kareb ulunneh seminggu. Idi Isak nenunat ni Yakub, idi Yakub nenunat pulu' dueh tepun pupu tau.
9 "Idi tepun tau mét niat ni Yusup idi nemasui neneh amé' bawang Masir. Iamo' Allah nengedengan neneh,
10 idi nemuit neneh ratnan amung-amung derehneh, idi nemaré neneh katu idi ileh pa kiung raca' Masir ineh luk nenganau' neneh mangun ku lun rayeh amung-amung tana' Masir idi amung-amung anak itinneh.
11 Idi nacing aceh iru' kuan amung tana' Masir idi Kanaan ineh idi dereh luk rayeh, pad tepun tau na akan.
12 Iamo' pangeh Yakub nekali' idi inan padé' déi' Masir, idi ieh nengecuk tepun tau amé' déi' lawédeh sepun-pun.
13 Idi sekedueh kua' lawédeh Yusup nengegala' bururneh nan kinanak-kinanakneh, idi raca' Masir pana' nekali' ratnan inulneh.
14 Idi Yusup neneteng tamanneh Yakub amé' neneh dengan amung-amung kinanakneh, ieh ineh tudu' ngepulu' limeh burur kinula'deh.
15 Idi Yakub nepura' iné' Masir, idi ieh naté dengan amung-amung tepun tau pana'.
16 Idi butungdeh inuit iné' Sikem, idi tinanem bang tanem luk bilih Ibrahim ratnan pupu Hamor déi' Sikem ku usin pirak.
17 "Iamo' kareb pangeh nacing pejani' luk biré Allah kuan Ibrahim, idi pupu ineh luk amé' mula' déi' Masir.
18 Kekipedneh inan aceh raca' luk baken déi' Masir luk na nekali' ni Yusup.
19 Ieh nenaluk pupu tau idi nengedereh tepun tau. Ieh mesaad ngecuk nedeh nala' anak-anakdeh luk isuut pad ideh maté.
20 Kareb ineh Musa tinganak idi ieh pelaba taga. Ieh isa' teluh bulan kinioneh bang ruma' tamanneh.
21 Kareb ieh tila', idi anak decur raca' Masir nengalap neneh idi nengasa' neneh mepad kudeng anakneh sebuleng.
22 Idi Musa pangeh bida' bang amung ileh lun Masir, pad ieh mebala tu-tu ngaceku balaneh idi kekamenneh.
23 "Kareb ulun Musa apat ngepulu' lak, niatneh nesigio sikal ngikak amung kinanakneh, pupu Israil.
24 Idi ieh nenier selemulun luk pidereh lun Masir, idi ieh nengedengan lemulun ineh, idi ieh nengua' dengan ngaté lun Masir ineh.
25 (Bang terawé Musa, kinanak-kinanakneh pana' nekali' idi dengan ticu'neh, Allah sikal muit nedeh; iamo' na tu ideh nekali'.)
26 Idi kenebpa teh ieh nacing kareb lemulun pekedaluh, idi sikal ngubuk nedeh pedo', keburi'neh, 'O lun muyuh, muyuh ini denganak, ngudehké muyuh ngedereh seburur dengan seburur?'
27 Iamo' lemulun luk nengedereh lun denganneh nengarung neneh, keburi'neh, 'Idéké luk nenganau' namu ku lun rayeh idi lun luk mutut besara' arang kai?
28 Iko pian ngaté negku mepad kudeng iko nengaté aceh lun Masir nalem?'
29 Kareb Musa neninger bala ineh, idi ieh neburo rat Masir idi ieh iné' tebawang déi' tana' Midian. Idi déi' ieh nenginul dueh anak deléi.
30 "Pangeh apat ngepulu' lak, idi ieh nenier déi' su luk ali-ali muneng ku Pegkung Sinai inan aceh melaikat bang budung apui luk udung aceh kayuh luk mebeneh.
31 Musa mawa nier ineh, idi ieh iné' muneng sikal nier ineh do'-do'. Iamo' ieh neninger tang Tuhan pebala:
32 'Ui ini Allah tepun muyuh, Ibrahim, Isak, idi Yakub.' Idi Musa megegker pad ieh na mekuu' amé' nier.
33 Idi Tuhan nepebala neneh, 'Lenguenmu kasut ratnan kukudmu ineh, ngaceku su luk inanmu tuped, ieh ineh tana' luk meligan.
34 Ui pangeh nenier dereh pupuKu luk bang tana' Masir. Ui pangeh neninger aroddeh, idi Ui temurun sikal muit nedeh. Do' iko amé' nekini; Ui ngecuk namu amé' tana' Masir.
35 "Idi Musa kinarung lun pupu Israil, kebaladeh, Idéké luk nenganau' namu ku lun luk ngimet idi lun luk mutut besara'?' Iamo' ieh luk icuk Allah mangun ku lun luk ngimet idi ku lun luk muit dengan lalud melaikat luk sinierneh bang budung apui luk udung kayuh ineh.
36 Idi ieh teh luk nenguit nedeh remuat rat bang bawang Masir dengan nenganau' kekamen luk nan mawa idi tanu'-tanu' bang bawang Masir, idi déi' Abpa' Pisui, idi muci déi' su luk ali-ali apat ngepulu lak kinioneh.
37 Idi Musa ineh luk nepebala nelun pupu Israil, 'Allah sikal maré kuan muyuh aceh Nabi rat arang pupu muyuh sebuleng mepad kudeng ui ini teh.'
38 Musa ineh luk nengedengan nelun pupu Israil déi' su luk ali-ali. Ieh idi déi' dengan tepun tau idi melaikat luk nepebala neneh déi' Pegkung Sinai ineh. Idi Allah nemaré kuanneh bala luk mulun, luk uenneh ngacing kuan tau.
39 "Iamo' tepun tau na sikal maya' balaneh. Ideh nengarung neneh idi pian lemubed amé' Masir.
40 Idi kebaladeh ni Arun, 'Do' iko nganau' akang kuan kai, luk miak nalan pa atun kai. Na kai kali' luk mangun kuan Musa ineh luk nenguit nekai remuat rat bang bawang Masir.'
41 Idi kareb ineh ideh nenganau' aceh akang mepad kudeng anak sapi', idi nemaré baré kuanneh. Idi ideh nenganau' irau pad ngedita' luk inau'deh sebuleng.
42 Iamo' Allah neteketed rat nedeh idi nenima' nedeh sembayang nan gituen, maya' kudeng luk inayud bang surat nabi-nabi: 'O lun Israil! Baken muyuh nemaré pung-pung luk kirat ineh kuanKu ruked apat ngepulu' lak déi' su luk ali-ali
43 Lepo akang Molok luk binirir muyuh idi ayu gituen Repan akang muyuh ineh; ideh ineh akang luk inau' muyuh inan muyuh sembayang. Ngaceku ineh Ui mubuh nemuyuh amé' bal déi' bawang Babil.'
44 "Tepun tau inan Lepo su luk inan papu' Tuhan déi' su luk ali-ali. Lepo ineh inau' maya' ayu luk icuk Allah ni Musa idi maya' ayu luk bida' Allah neneh.
45 Pangeh ineh tepun tau luk nengalap lepo ineh ratnan tamandeh nenguit ineh semuet dengan Yusak kareb ideh nengaro bawang rat nelun pupu baken, luk inusu Allah pa kiungdeh. Lepo ineh idi déi' macing kareb Daud.
46 Idi Daud inan Allah mawa, idi ieh mutuh mudut aceh ruma' kuan Allah Yakub.
47 Iamo' Selimun luk nemudut ruma' ineh kuanNeh.
48 "Iamo' Allah luk Meluun Dita' ineh na tudo bang ruma luk pinudut lemulun, maya' kudeng luk bida' nabi,
49 Kebala Tuhan, 'Langit ineh kerusiKu, idi tana' ineh tapin kukudKu. Kudeng apehké ruma' luk piduten muyuh kuanKu? Idi iapehké su luk inanKu ngato erurKu?
50 Bakenké amung ini inau' ticu'Ku?'
51 "O muyuh luk metueh niat, idi luk na sinunat niat idi lalid, muyuh megéi' sikal metueh ratnan Roh Meligan! Kudeng tepun muyuh, kudeng ineh teh muyuh.
52 Idéké nabi luk na pidereh tepun muyuh ineh? Ideh nengaté amung-amung lemulun luk nemada' atun ratnan acing Lun luk Matu ineh, ieh ineh luk pangeh biré muyuh nekini idi luk pinaté muyuh teh.
53 Muyuh luk pangeh nengalap ukum Allah luk icing melaikat, iamo' na muyuh maya' ineh."
54 Kareb tebubpun besara' lun Yahudi neninger bala Stepanus, idi ideh megateh niat, idi ideh netegelitem neneh.
55 Iamo' Stepanus luk mepanu' ku Roh Meligan netengook déi' langit idi nenier rayeh Allah idi Yésus luk tuped pa tinueh Allah.
56 Idi kebalaneh, "Siruh, ui nier langit pangeh mukab, idi Anak-Lemulun tuped pa tinueh Allah."
57 Iamo' ideh nengitang, idi nengang laliddeh, idi ideh peranga' nedupeh neneh.
58 Ideh nenala' neneh rat bang bawang ineh idi nemitung neneh ku batu. Idi lun luk nekali' ineh pana' nengerareng ayungdeh iring kukud sebuleng lun anak adi', ngadanneh Saul.
59 Idi laba' ideh mitung ni Stepanus idi ieh sembayang, "O Tuhan Yésus, lapenMu rohku."
60 Idi ieh netekeradung idi nengitang, "O Tuhan, aleg ngukum nedeh ngaceku sala' ini." Idi pangeh ieh nepebala kudeng ini, idi ieh naté peh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA