Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nakutanaii Imang Lompo to Stefanus nakua, "Tonganraka to napau tuu mati' tau?"

² Napebalii Stefanus nakua, "Tabe' lako to tomala'bihku' sola ngasan, pekaamberan agama, pekaamberan to-Yahudi na guru agama! Tapesa'dingngi meloi! Ia tonna torro jio unapa tana Mesopotamia to tojolota' Nabi Ibrahim, te'dapa namellele lako kota Haran, ratui to mala'bih, Puang Allataala,

³ ngkuanni, 'Messarakko lan mai tondokkomu sola rapummu, mumale lako tondok to la kupakitanko.'

⁴ Messunmi Nabi Ibrahim lan mai tondok to-Kasdim na mellele lako kota Haran. Ia tonna mangkamo mate ambe'na, nasuami Puang Allataala mellele tama tee tondok, tee tatorroi too.

⁵ Ia joo wattu te'da nabenni Puang Allataala tee tondok lako Nabi Ibrahim la napumanah, moi sangjangkan te'da too nabenni. Apa napangngakui Puang Allataala kumua la naben Nabi Ibrahim napuapai ratu lako bati'na. Ia joo wattu te'dapa anakkana Nabi Ibrahim.

⁶ Apa nakuanmo ia Puang Allataala kumua, 'La mentoratui to bati'mu jio tondokkona tau, na la napukaunan sola nasessai pata ratuh taun masainna.

⁷ Apa la messunni lan mai joo tondok anna sompana' ntee, ke kusessai joo bangsa mpukaunanni.'

⁸ Susimi joo napangngakui Puang Allataala anna suai to Nabi Ibrahim disunna' menjaji tandana joo pangngakuan. Ia tonna jajimo to anakkana disanga Ishak, nasunna'i tonna umuru' karuamo allona. Susi toomi Ishak ssunna' anakkana to disanga Yakub, na Yakub ssunna' ngasanni to sangpulo dua anakkana, iamo tojolota' kita' bangsa Yahudi.

⁹ Apa masere atii to tojolota' lako mesa' sile'tona disanga Yusuf, anna balukki nadipukaunan jio tana Mesir. Apa tuli naampaii Puang Allataala,

¹⁰ anna tulungngi ke masussai. Nabenni barakka' sola kamaccan tonna mangngolo lako Firaun, Raja Mesir, anna angka'i menjaji gubernur jio, napakuasa tooi lan salassa'na.

¹¹ Den pissen napealloan la'da' lan lili'na tana Mesir sola Kanaan anna liwa' parri' to tau, te'damo nanii nnampa' kande to tojolota'.

¹² Apa ia tonna issenni Yakub kumua den gose' jio tana Mesir, nasuami male lako to anakkana, iamo tojolota'. Iamo joo bungah kamaleanna lako.

¹³ Ia tonna mangpenduannamo male lako, mane'ri mpangpeissenan kalena Yusuf lako sile'tona. Mane' toori joo naissenni Raja Mesir to rapunna Yusuf.

¹⁴ Mangkai joo napepasanni Yusuf to ambe'na disanga Yakub napeta'dai namellele ngasan sola rapunna lako tana Mesir -- pitung puloi lima sola ngasan.

¹⁵ Mellelemi Yakub sola rapunna lako tana Mesir na jio nanii mate sola to tojolota'.

¹⁶ Ia to batang rabukkuna dibawa pole lako kota Sikhem, nadilamun jio lamunan mangka naalli doi' pera' Nabi Ibrahim lako bati'na Hemor jio kota Sikhem.

¹⁷ Ia tonna la ndete'mi wattunna Puang Allataala mpugauk pangngakuan-Na lako Nabi Ibrahim, sabuda-budannami to bangsata' jio tana Mesir,

¹⁸ arannai den raja laen mangparenta jio, na te'da naissenni to Yusuf.

¹⁹ Nacapa'-capa' to bangsata', na gaja parrang lako tojolota'. Naparuku nca'beanni to peana ke mane' jajii, nakua danggi' namembuda.

²⁰ Iamo joo wattu najaji Nabi Musa. Malolo situru' pengkitan-Na Puang Allataala. Tallung bulan masainna ditaranak lan bolana ambe'na.

²¹ Na ia tonna dica'bean, naalai anakdara anakkana Firaun nataranakki susi anak tonganna.

²² Sininna kamaccanna bangsa Mesir diajaranni, arannai pacau' la lan buangan kada la lan sipa'na.

²³ Ia tonna patang pulomi taunna to Nabi Musa, mamali'mi la male ssikitan to-Israel bangsana.

²⁴ Ngkitai mesa' solana nasessa to-Mesir, napessangkaii joo solana, nabunoi joo to-Mesir.

²⁵ Nasanga napahang bangsana kumua iamo nasua Puang Allataala la'paranni. Apa sitonganna te'da napahangngi.

²⁶ Masawanna ngkita omi dua tau pada to-Israel sibobo', naalla'ii la mpasipemeloanni, nakuanni, 'Ee mane, to sile'to kamu' tee. Ammisipasusira kamu'?'

²⁷ Apa ia joo tosala lako solana, naturrunni to Nabi Musa nakuanni, 'Indara nnangka'ko kapala ba'tu tombicara kara-karaki'?

²⁸ La mubuno toora'ka susi to-Mesir mubuno sangbo'?'

²⁹ Ia tonna sa'dingngi Nabi Musa to kadanna, ta'pa malaii lako tana Midian, natorro jio. Jio nanii jaji to anakkana dua.

³⁰ Patang pulo taun mangkanna joo den mesa' malaeka' ratu lako Nabi Musa jio padang pallawangan sikandoppi' Buntu Sinai. Nampangpekitan kalena susi dukku api messun lan mai pangngala duri.

³¹ Jangngahhi ngkitai joo, namadoang ngkanassai. Iamo joo namale ngkandoppi'i, na ssa'ding gamaran-Na Puang Allataala kumua,

³² 'Aku'mo Puang Allataala to nasompa tojolomu, Nabi Ibrahim, Ishak na Yakub.' Mbe'behhi Nabi Musa, sanga malaja'i, na te'damo nabarani ngkitai.

³³ Mangkada pole' omi Puang Allataala nakua, 'Alaii sandala'mu, nasaba' ia tuu munii ke'deh, iamo tana nanii Puang!

³⁴ Kukitamo kamapa'dikanna umma'-Ku' jio tana Mesir. Kusa'ding toomo to sarrona angkumellao la la'paranni. Jaji, la kusuako pole lako tana Mesir!'

³⁵ Ia tee Nabi Musa to te'da natarimai bangsa Israel tonna kuanni, 'Indara nnangka'ko kapala ba'tu tomangra'tahki'?' Na ia to malaeka' mpangpekitan kalena lako Nabi Musa lan pangngala-ala duri dukku, iamo nasua Puang Allataala nnangka'i kapala nasua male lla'bak umma'-Na.

³⁶ Iamo mpasun bangsa Israel jio mai tana Mesir mpake mangrupa-rupa tanda mejangngaran la jio tana Mesir, la jio Tasik Malea, na jio padang pallawangan patang pulo taun masainna.

³⁷ Ia toomo mpauanni to bangsa Israel kumua, 'La napadenan kamu' Puang Allataala mesa' nabi susi tee aku', napilei lan mai rapummi.'

³⁸ Nabi Musamo to lan tangnga-tangngana to-Israel jio padang pallawangan mpangpeissenanni lako tojolota' to apa napauanni malaeka' jao Buntu Sinai. Iamo ntarimai to kada diputuo pole jio mai Puang Allataala to disimanahhi ratu lako kita'.

³⁹ Moi nasusi joo cia'i to tojolota' nturu'i. Te'da natarimai, apa madoangri ia pole pole' lako tana Mesir.

⁴⁰ Nakuanni to imang Harun, 'Garagankan kami' tau-tau dewata, na ia njoloankan. Sanga te'damo kami' kiissenni apa to jaji lako Nabi Musa, to mangka ssolankan messun jio mai tana Mesir!'

⁴¹ Iamo joo wattu nanggaraga tau-tau dewata susi anak sapin, namane' mpaden pangramean karoba ssompai joo tau-tau dewata panggaraganna.

⁴² Jaji napemboko'imi Puang Allataala napupangngelohna bangngi ssompa bintuin jao langi' susi to diuki' lan sura' nabi kumua, 'Ee to-Israel! Denmoraka mipangkaroban karoba panggere' sola karoba laen lako Aku' lan joo patang pulo taun masainna jio padang pallawangan?

⁴³ Te'da bangpa, apa malera kamu' mbulle-bulle tenda tau-tau dewata Molokh sola bintuin dewatammi to disanga Refan. Iamo to tau-tau dewata migaraga la misompa. Iamo joo kulampali' kamu' mambela sambali' kota Babel.'"

⁴⁴ Mpatarruhhi kadanna Stefanus nakua, "Ia tonna jio unapa padang pallawangan to tojolota', napangpeparentanni Puang Allataala lako Nabi Musa na nggaraga tenda, susi to apa mangka napakitanni. Ia joo tenda menjaji tanda kumua Ia to Puang Allataala mari'pih lan tangnga-tangngana tolino. Jaji tuli nabawa melakoi jio padang pallawangan.

⁴⁵ Sitarruhna nabawa tooi, tonna solanni Yosua male parari mpassialaii tee tondokkota' jio mai kuasanna bangsa laen to naula'i Puang Allataala jio mai olona. Ia joo tenda jioi tangnga-tangngana to-Israel ratu lako kaparentanna Raja Daud.

⁴⁶ Masannang penawan-Na Puang Allataala lako Raja Daud. Iamo joo napeta'dai Raja Daud lako Puang Allataala to nasompa Yakub tonna anu' nakua, 'Oo Puang, taeloranna' kugaraganki' bola.'

⁴⁷ Apa Sulaimanra mpake'deh Bola Puang Allataala.

⁴⁸ Apa te'da ia natorro lan bola panggaraga tolino to Puang Allataala makuasa, nasaba' den diuki' lan sura' nabi nakua Puang Allataala kumua,

⁴⁹ 'Langi' iamo kunii cumadokko mangparenta, na lino iamo pelleseang-Ku'. Bola apara to la migaraganna'? Umbora to kunii torro? Apa tang-Aku'raka mpadenni to sininna apa den?' Susimi joo kadan-Na Puang Allataala."

⁵⁰ (7:49)

⁵¹ Mpatarruhhi kadanna Stefanus nakua lako tuu lako Pangbicara Agama, "Ie' kita', antatakkaliwa'ra membattuk tagaja sussa menturu' lako Puang Allataala! Gaja taru to talinganta' mpesa'dingngi kadan-Na! Pada bangki' tojolota' tuli nnewa Roh Allataala!

⁵² Denraka to nabi tangnasessa? Buda nabi nasua Puang Allataala tonna anu' mpaui to karatuanna Tomalampu'-Na apa nabunoi tojolomi. Na mangten tooki' too allo tapangpejokkoanni antapangpebunoanni.

⁵³ Mangka toomiki' naparatuan malaeka' to atoranna Nabi Musa apa te'da taturu'i!"

⁵⁴ Ia tonna sa'dingngi tuu lako Pangbicara Agama sininna to napau Stefanus, gaja pallami nasunggarigi'.

⁵⁵ Apa ia to Stefanus nakuasai Roh Allataala, namentingngara de' langi' nangkita kamala'biran-Na Puang Allataala na Puang Isa ke'deh jio sa'de kanan-Na.

⁵⁶ Mangkadai nakua, "Wah, ngkitana' langi' titimbak na pajan to Anak Mentolino ke'deh jio sa'de kanan-Na Puang Allataala!"

⁵⁷ Pada ntampunni talinganna, napissennii mearrak naluruii to Stefanus.

⁵⁸ Nagararakki lako salean kota, namane' rrura batui. Ia to sa'bi tangtongan mpangpeampan pakeanna lako mesa' tokallolo disanga Saulus.

⁵⁹ Da'tan bang unapi dirura batu to Stefanus, namassambajang nakua, "Oo Puang Isa, tarimai to sunga'ku'!"

⁶⁰ Namane' mengguntu' naandongngii mangkada nakua, "Oo Puang, danggi' dikka' tapapassannii to dosana tee tau!" Mangkanna mangkada susi joo, matemi.

Kisah Para Rasul

Video Kisah Para Rasul 7

Ikuti Kami:

KONTAK | PARTISIPASI | DONASI