Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dob ai nini si Salomo ma, “Domma ipatugah Jahowa hinan, sihol marianan do Ia bani ianan na golap.

² Domma hupauli Bamu sada Rumah bahen ianan-Mu, bahen onjolan ni paratas-Mu ronsi sadokah ni dokahni.”

³ Dob ai mangkawah ma raja ai inggot anjaha ipasu-pasu ma ganup tumpuan ni halak Israel ai, sanggah na jongjong ijai ganup tumpuan ni halak Israel ai.

⁴ Anjaha nini ma, “Pinuji ma Jahowa, Naibata ni Israel, na pasaudkon marhitei tangan-Ni, ai ma na dob binagahkon-Ni, marhitei pamangan-Ni hubani bapa si Daud, sanggah na hinatahon-Ni,

⁵ ʻHumbani ari na dob Huarahkon luar bangsang-Ku hun tanoh Masir, seng ongga ope Hupilih sada huta i tongah-tongah ni ganup marga Israel, ase ijai ipajongjong sada rumah ianan ni goran-Ku, anjaha seng dong Hupilih sada raja, manggomgom bangsang-Ku halak Israel.

⁶ Tapi domma Hupilih anggo Jerusalem, ase ijai jonam goran-Ku, anjaha domma Hupilih si Daud, ase ia manggomgom bangsang-Ku, halak Israel.ʼ

⁷ Domma namin isura-surahon bapa, si Daud, sihol paulihon sada rumah bani goran ni Jahowa, Naibata ni Israel,

⁸ tapi nini Jahowa do hubani bapa, si Daud, ʻIsura-surahon ho do pajongjongkon sada rumah bani goran-Ku, dear do sura-suramai.

⁹ Tapi seng bulih ho pajongjongkon rumah ai; anakmu, na luar humbani binongeimu do na maningon pajongjongkon rumah ai bani goran-Ku.ʼ

¹⁰ Domma ipasaud Jahowa nuan hata-Ni, na dob hinatahon-Ni ai, ai domma ipabangkit ahu gantih ni bapa, si Daud, anjaha domma hundul ahu bani paratas ni Harajaon Israel, songon na dob binagahkon ni Jahowa, anjaha domma hupajongjong sada rumah bani goran ni Jahowa, Naibata ni Israel,

¹¹ anjaha domma hunahkon hujai poti ai, ianan ni titah parpadanan, na binahen ni Jahowa hubani halak Israel.”

¹² Dob ai jongjong ma raja ai i lobei ni anjapanjap ni Jahowa i lobei ni ganup tumpuan ni halak Israel, anjaha ipaherbang ma tanganni.

¹³ Domma ibahen si Salomo sada parambilanan humbani tombaga, anjaha inahkon do ai hu tongah-tongah ni alaman, lima asta do ganjangni, lima asta bolagni anjaha tolu asta do gijangni. Jadi jongjong ma ia hu atasni, manrogop ma ia i lobei ni ganup tumpuan ni halak Israel, anjaha ipaherbang ma tanganni dompak langit.

¹⁴ Dob ai nini ma, “Ham Jahowa, Naibata ni Israel! Seng dong Naibata usih songon Ham, age i nagori atas, age i tanoh on, na patotapkon parpadanan pakon idop ni uhur bani jabolon-Mu, na marparlahou i lobei-Mu humbani gok ni uhurni.

¹⁵ Ham do na pasaudkon hubani bapa, jabolon-Mu si Daud, na dob binagahkon-Mu hu bani; nai ma tongon, Ham do na mambagahkon ai marhitei pamangan-Mu, anjaha marhitei tangan-Mu ipasaud Ham do ai sadari on.

¹⁶ Ai pe, Ham Jahowa, Naibata ni Israel, sai pasaud Ham ma hubani jabolon-Mu, bapa, si Daud, hata na dob binagahkon-Mu hu bani, sanggah na hinatahon-Mu, ʻSeng anjai hurang bam sada dalahi i lobei-Hu, na hundul bani paratas ni Israel, asal ma ra anakmu mardiateihon dalan ni sidea, marparlahou ibagas titah-Ku, songon ho marparlahou i lobei-Hu.ʼ

¹⁷ Ai pe, Ham Jahowa, Naibata ni Israel, sai pasaud Ham ma hata-Mu, na dob hinatahon-Mu hubani jabolon-Mu, si Daud.

¹⁸ Tapi, sihol do tongon Naibata marianan rap pakon jolma i tanoh on? Tonggor ma, gari langit ni langitan seng tarhamkamsi Ham, samintolah rumah na hupauli on ma?

¹⁹ Tapi sai manatap ma Ham hubani tonggo ni jabolon-Mu on ampa hubani elek-elekni, Ham Jahowa, Naibatangku. Sai tangihon ma dilo-dilo pakon tonggo, na tinonggohon ni jabolon-Mu on i lobei-Mu.

²⁰ Sai kawah ma panonggor-Mu hu rumah on arian pakon borngin, hubani ianan, na dob binagahkon-Mu, ase ijai bahenon-Mu marianan goran-Mu; ase tangihonon-Mu tonggo na tinonggohon ni jabolon-Mu bani ianan on.

²¹ Sai tangihon Ham ma tongon elek-elek ni jabolon-Mu pakon bangsa-Mu, halak Israel, na tinonggohon ni sidea bani ianan on. Sai tangihon Ham ma in tongon humbani ianan-Mu marparatas, hun nagori atas; anjaha anggo itangar Ham ai, marpangulaki ma uhur-Mu.

²² Anggo mardousa sada halak dompak hasomanni, anjaha ipabija ia halani ai, gabe saud ia marbija i lobei ni anjapanjap-Mu ibagas rumah on,

²³ sai tangihon Ham ma hun nagori atas, anjaha dalankon Ham ma uhum bani jabolon-Mu, marhitei na mansalahkon parsalah, ase manginsonoh pambahenanni bani uluni sandiri, tapi mamintori halak parpintor, anjaha mambahen bani domu hubani hapintoranni.

²⁴ Anjaha porini talu bangsa-Mu, halak Israel, ibahen munsuhni, halani mardousa sidea Bamu, tapi anggo mulak sidea anjaha isaksihon sidea goran-Mu, martonggo anjaha mangelek-elek sidea i lobei ni bohi-Mu i rumah on,

²⁵ sai tangihon Ham ma hun nagori atas, anjaha marpangulaki ma uhur-Mu mangidah dousa ni bangsa-Mu halak Israel, anjaha boan Ham ma use sidea hu tanoh, na binerehon-Mu hubani sidea pakon hubani ompung ni sidea.

²⁶ Porini tartutup langit, gabe seng roh udan, halani mardousa sidea dompak Ham, dob ai martonggo sidea bani ianan on, anjaha mulak sidea humbani dousa ni sidea, halani na dob ipatoruh Ham sidea,

²⁷ sai tangihon Ham ma hun nagori atas, anjaha marpangulaki ma uhur-Mu mangidah dousa ni jabolon-Mu pakon bangsa-Mu halak Israel, halani na dob niajarhon-Mu bani sidea dalan na madear, sidalanan ni sidea, anjaha bere Ham ma udan hu tanoh-Mu, na dob binere-Mu hubani bangsa-Mu bahen parbagiananni.

²⁸ Anggo masa lohei i tanoh on, anggo masa sampar, masak juma barang antinganouon, masa balang atap tamponok; anggo isosak munsuhni sidea ibagas huta ni sidea, anggo masa sitaronon na ijahanin pe barang naborit na ijahanin pe,

²⁹ ai pe, barang aha na tinonggohon barang na pinindo ni sada halak barang ganup bangsa-Mu halak Israel, halani na dob mangahap sidea ganup bani lonsing-lonsing pakon na maborit, gabe ipaherbang tanganni dompak rumah on,

³⁰ sai tangihon Ham ma hun nagori atas, ianan-Mu marparatas, marpangulaki ma uhur-Mu, anjaha bere Ham ma bani sidea ganup domu hubani dalanni bei, songon pananda-Mu bani uhur ni sidea, ai Ham tumang do hansa, na mananda uhur ni jolma manisia;

³¹ ase ihabiari sidea Ham, anjaha marparlahou sidea ibagas dalan-Mu, sadokah sidea manggoluh i tanoh, na dob binerehon-Mu hubani ompung ni sidea.

³² Sonai homa halak na legan, na so humbani bangsa-Mu halak Israel, na roh hun tanoh na daoh, halani goran-Mu na timbul in pakon tangan-Mu na gogoh in, ampa botohon-Mu na gostong in, anggo roh ia anjaha martonggo dompak rumah on,

³³ sai tangihon Ham ma hun nagori atas, ianan-Mu marparatas, anjaha bahen Ham ma romban hubani pangindoan ni halak na legan ai Bamu, ase andohar ganup bangsa, na i atas tanoh on, mananda goran-Mu anjaha ihabiari Ham, songon bangsa-Mu halak Israel, anjaha ase ibotoh sidea, ia rumah na hupajongjong on, marpanggorani bani goran-Mu do on.

³⁴ Anggo bingkat bangsa-Mu hu parporangan dompak munsuh ni sidea, hun dalan na ijahanin pe isuruh Ham sidea, anjaha martonggo sidea Bamu mandompakkon huta on, na dob pinilih-Mu on, anjaha mandompakkon rumah on, na dob hupajongjong bani goran-Mu,

³⁵ sai tangihon Ham ma tonggo ni sidea pakon pangindoan ni sidea hun nagori atas, anjaha patotap Ham ma uhum bani sidea.

³⁶ Porini mardousa sidea dompak Ham, ai seng dong jolma age sada na so mardousa, anjaha manringis Ham dompak sidea, anjaha iondoskon Ham sidea bani munsuhni, gabe tarbuang sidea hu tanoh na daoh atap na dohor,

³⁷ anggo ipaulak sidea uhurni dompak bagas i tanoh habuangan ni sidea ai, anjaha ipaubah sidea uhur ni sidea, anjaha martonggo sidea Bamu i tanoh habuangan ni sidea anjaha nini, ʻDomma mardousa hanami, domma ihorjahon hanami hajahaton, anjaha domma manggeori hanami,ʼ

³⁸ anggo mulak sidea hu Bamu humbani gok ni pingkiran ni sidea pakon humbani gok ni uhur ni sidea i tanoh habuangan ni sidea, anjaha martonggo sidea dompak tanoh ni sidea, na dob binere-Mu hubani ompung ni sidea pakon dompak huta na dob pinilih-Mu pakon dompak rumah na dob hupauli bani goran-Mu,

³⁹ sai tangihon Ham ma hun nagori atas, ianan-Mu marparatas, tonggo pakon pangindoan ni sidea, anjaha patotap Ham ma uhum bani sidea, anjaha marpangulaki ma uhur-Mu bani dousa ni sidea ai, na hinorjahon ni bangsa-Mu dompak Ham.

⁴⁰ Ai pe, Ham Naibatangku, sai kawah ma panonggor-Mu, anjaha tangi ma pinggol-Mu mambalosi tonggo bani ianan on.

⁴¹ Ai pe, Ham Naibata Jahowa, sai jongjong ma Ham marayak parsaranan-Mu on, Ham pakon poti ni hamuliaon-Mu. Sai bahen Ham ma malim-Mu, Ham Naibata Jahowa, marpakeian hatuahon, anjaha bahen Ham ma na niidopan-Mu marmalas ni uhur ibagas dear layak-Mu.

⁴² Ham Naibata Jahowa, ulang ma tulak Ham bohi ni na mininakan-Mu. Sai ingat Ham idop ni uhur-Mu, na binagahkon-Mu hubani si Daud jabolon-Mu.”

2 Tawarikh

Video 2 Tawarikh 6

Ikuti Kami:

KONTAK | PARTISIPASI | DONASI