Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca bage ertoto Raja Salomo nina, "Tuhan nggo IpilihNdu InganNdu i bas embun ras gelap.
2 Genduari nggo kupanteki sada rumah si erdolat man BaNdu, sada rumah man InganNdu asa lalap."
3 Kerina bangsa Israel tedis i je. Ialaken raja bangsa Israel jenari ipindona pemasu-masun Dibata man bangsa e.
4 Nina, "Pujilah TUHAN Dibata nu Israel! Nggo IgenepiNa padan si IbahanNa man bapangku asum NiNa man bana,
5 'Menaken i bas paksa Kubaba bangsangKu Israel ndarat i Mesir nari seh paksa enda, la lit Kupilih sada kota i negeri Israel jadi ingan manteki rumah pertoton man inganKu isembah. Bage pe la lit Kupilih ise pe si ngerajai bangsangKu Israel.
6 Tapi genduari nggo Kupilih Jerusalem jadi inganKu isembah, janah kam Daud, nggo Kupilih jadi si merentah bangsangKu.'"
7 Iumputi Salomo tole ngerana nina, "Bapangku Daud ersura-sura manteki rumah pertoton guna ingan ersembah man TUHAN Dibata Israel,
8 tapi nina TUHAN man bapa, 'Mehuli sura-surandu manteki rumah pertoton man bangKu,
9 tapi labo pernah banci ipantekindu. Simanteki rumah pertotonKu eme anakndu -- anakndu jine.'
10 Genduari nggo igenepi TUHAN PadanNa. Aku nggo gancih bapangku jadi raja Israel dingen nggo kupajekken Rumah Pertoton ingan ersembah man TUHAN Dibata Israel.
11 Nggo kutamaken ku bas Rumah e Peti Perpadanen si isin dua papan batu perpadanen si ibahan TUHAN man bangsa Israel."
12 Kenca bage i adep-adepen bangsa e lawes ia tedis ku lebe-lebe batar-batar, jenari ertoto ia dingenna ndadaken tanna ku das.
13 (Nggo ibahan Salomo sada mimbar tembaga janah itamakenna e i tengah kesain. Ukuren mimbar e 2,2 meter persegi dingen 1,3 meter ganjangna. Inangkihna mimbar e, erjimpuh ia jenari idadakenna tanna ku langit.)
14 Ertoto ia nina, "O TUHAN Dibata Israel, la lit bagi Kam ulina. Subuk i belang-belang doni enda bage pe i das langit. IgenepiNdu PerpadanenNdu man BangsaNdu. IcidahkenNdu keleng AteNdu man bana adi ikutkenna Kam alu bulat ukurna.
15 Nggo IgenepiNdu padan si IbahanNdu man bapangku Daud. Genduari tiap kata nggo IgenepiNdu.
16 Genduari, O TUHAN Dibata Israel, genepilah padan si deban si IbahanNdu man bapangku asum IkatakenNdu man bana maka kesusurenna nge si tetap jadi raja i Israel adi kesusurenna e megermet ngikutken Kam, bali ras si ibahan bapa nai.
17 Emaka genduari O TUHAN Dibata Israel, bahan maka payo jadi bagi si IpadankenNdu man suru-SuruhenNdu Daud.
18 Tapi O Dibata, tuhu kin banci Kam ringan i tengah-tengah manusia i babo doni enda? Kerina langit si mbelang pe kitiksa man InganNdu, apai denga ka Rumah Pertoton si kupajekken enda.
19 O TUHAN Dibatangku, erkiteken suruh-SuruhenNdu, begikenlah pertotonku ras pingko-pingkongku man BaNdu.
20 Perdiatekenlah Rumah Pertoton enda suari ras berngi. Nggo Kam erpadan maka i jenda InganNdu isembah. Dage dengkehkenlah aku asum aku ertoto ngadap ku Rumah Pertoton enda.
21 Begikenlah pertotonku ras pertoton BangsaNdu Israel, sanga ia ngadap kempak Rumah Pertoton enda dingen ertoto. Begikenlah kami i bas RumahNdu i surga nari dingen alemilah kami.
22 Adi lit sekalak ituduh ersalah man kalak si deban janah ia ibaba ku batar-BatarNdu erbahan sada sumpah maka ia la ersalah,
23 O TUHAN begiken i Surga nari, janah adililah suruh-SuruhenNdu e. Ukumlah kalak si salah sue ras si patut ialokenna, tapi pulahilah kalak si la ersalah.
24 Adi BangsaNdu Israel italuken musuh-musuhna erkiteken nggo erdosa man Kam, tapi adi mulihken ia ku Kam, dingen reh ku bas Rumah Pertoton enda, ertoto ia man BaNdu alu meteruk ukurna mindo gelah ialemi dosana,
25 begikenlah ia i Surga nari. Alemilah dosa-dosa BangsaNdu e jenari babalah ia mulihken ku negeri si nggo IberekenNdu man nini-ninina ras man bana.
26 Adi la IberekenNdu udan erkiteken BangsaNdu erdosa man BaNdu, tapi adi erkadiola ia, jenari ngala ia kempak Rumah Pertoton enda, ertoto ia man BaNdu alu meteruk ukurna,
27 o TUHAN, begiken ia i surga nari jenari alemilah dosa suruh-SuruhenNdu, bangsa Israel e, jenari ajari ia ngelakoken kai si bujur. Emaka o TUHAN, berekenlah udan ku NegeriNdu enda, negeri si nggo IberekenNdu man BangsaNdu jadi sikerajangenna si tetap.
28 Adi jadi kelihen i negeri e, ntah wabah penakit ntah pe sinuan-sinuan icedaken angin si melas ntah erkiteken labang si melala, ntah adi BangsaNdu iserang musuh-musuhna, ntah adi lit penakit kai gia
29 begikenlah pertotonna. Adi lit BangsaNdu pusuhna dem ate ceda, jenari ertoto ia alu ndadaken tanna kempak Rumah Pertoton enda,
30 begikenlah pertotonna e. Begikenlah pemindonna i bas RumahNdu i Surga nari jenari alemilah ia. Kam kap ngenca metehsa isi perukuren manusia. Lakokenlah man tiap kalak sue ras si patut ialokenna,
31 maka BangsaNdu erkemalangen man BaNdu jenari iikutkenna Kam i bas kerina paksa-paksa kegeluhenna, i negeri si nggo IberekenNdu man nini-nini kami.
32 Adi lit bangsa si deban tading i bas negeri si ndauh; ibegina uga belinna dingen gegehna Kam, janah katawari pe nggit Kam ndudurken TanNdu lako nampati, jenari reh ia ertoto i bas Rumah Pertoton enda,
33 begikenlah pertotonna. I bas RumahNdu i Surga nari begiken ia janah berekenlah man bana kai si ipindona man BaNdu, gelah alu bage kerina bangsa i doni enda nandai Kam, jenari iikutkenna Kam bali ras BangsaNdu Israel. Alu bage ietehna maka Rumah Pertoton si kupajekken enda tuhu-tuhu ingan ersembah man BaNdu.
34 Adi IperentahkenNdu BangsaNdu lawes ku peperangen ngelawan musuh-musuhna, jenari ertoto ia man BaNdu, amin i ja pe ia, ialakenna kota si nggo IpilihNdu enda, dingen Rumah Pertoton si nggo kupajekken enda man BaNdu,
35 begikenlah pertotonna. Begikenlah ia i Surga nari dingen berekenlah man bana kemenangen.
36 Adi BangsaNdu erdosa man BaNdu, janah la kap lit kalak si la erdosa, emaka i bas pernembeh AteNdu IpediatNdu musuh-musuhna naluken ia jenari ibabana jadi tabanen ku negeri si deban, aminna pe ndauh negeri e,
37 begikenlah pertoton BangsaNdu. O TUHAN, adi i bas negeri e erkadiola ia, jenari ertoto ia man BaNdu, iakukenna kerina dosana ras kejahaten si nggo ibahanna, begikenlah pertotonna.
38 Adi i bas negeri e payo dingen tuhu-tuhu erkadiola kal ia jenari ertoto ia man BaNdu asum ialakenna kempak negeri si nggo IberekenNdu man nini-nini kami enda, kempak kota si nggo IpilihNdu, dingen Rumah Pertoton si nggo kupajekken
39 emaka begikenlah pertotonna. I bas RumahNdu i Surga nari begikenlah ia, janah mekuah min AteNdu man bana, alemilah kerina dosa-dosa BangsaNdu.
40 Genduari o Dibatangku, tataplah kami dingen dengkehkenlah kerina pertoton si isehken man BaNdu i bas ingan enda.
41 O TUHAN Dibata, genduari dage radu ras Peti Perpadann tanda KinigegehenNdu e, bengketi dage Rumah Pertoton enda jenari ringanlah Kam i je rasa lalap. Pasu-pasu kerina si idahiken imam-ImamNdu, jenari bereken keriahen man kerina BangsaNdu erkiteken KiniulinNdu man bana.
42 O TUHAN Dibata, ula tulak raja si IpilihNdu. Ingetlah keleng AteNdu man suruh-SuruhenNdu Daud."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA