Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nipilei Yoahas ri ra’ya’ Yehuda siagang niangkaki a’jari karaeng ri Yerusalem untu’ ansambeangi Yosia, manggena.
2 Anjo wattunna a’jari Karaeng Yoahas ri Yehuda 23 taung umuru’na siagang ammarentai 3 bulang sallona ri Yerusalem.
3 Nitahangi siagang nierangi Yoahas ri Nekho karaeng Mesir, mange ri Mesir, nampa nasuro tu Yehuda a’bayara’ passare 3.400 kilogarang pera’ siagang 34 kilogarang bulaeng. Nampa naangka’ Elyakim sari’battanna Yoahas a’jari karaeng, siagang napinra arenna Elyakim a’jari Yoyakim. Nampa naerang Yoahas mange ri Mesir.
4 (36:3)
5 Wattunna a’jari Karaeng Yoyakim ri Yehuda, 25 taung umuru’na, siagang 11 taung sallona ammarenta ri Yerusalem. Dorakai panggaukanna mae ri Karaeng Allata’alana.
6 Ri wattunna battu Nebukadnezar karaeng Babel angngempoi Yehuda, najakkalaki Yoyakim, nampa nasikko’ siagang naerangi mange ri Babel.
7 Naallei Nebukadnezar sipa’gang barang-barang lompoa anggaranna ri Balla’Na Batara nampa nalaling siagang naboli’ lalang ri balla’ kakaraenganna ri Babel.
8 Pau-pau maraengannaya ri passala’na Yoyakim, kammayami panggaukang-panggaukanna ja’dalaka siagang pallaka, niaki nicata’ lalang ri kitta’ Pau-pauanna Sikamma Karaeng Israel siagang Yehuda. Nampa ana’ bura’nena niarenga Yoyakhin ansambeangi a’jari karaeng.
9 Wattunna a’jari Karaeng Yoyakhin ri Yehuda, umuru’na 18 taung, siagang ammarentai 3 bulang 10 allo sallona ri Yerusalem. Doraka tongi panggaukanna mae ri Batara.
10 Ri wattunna kasambeang taunga niengkaki Yoyakhin ri Karaeng Nebukadnezar mange ri Babel salaku tunitahang, nampa nierang barang-barang lompoa anggaranna niaka ri Balla’Na Batara. Nampa naangka’ Nebukadnezar Zedekia, purinanna Yoyakhin, a’jari karaeng ri Yehuda siagang Yerusalem.
11 Wattunna a’jari Karaeng Zedekia ri Yehuda, umuru’na 21 taung; ammarentai ri Yerusalem 11 taung sallona.
12 Doraka tongi panggaukanna mae ri Karaeng Allata’alana. Taerokai ampakatunai kalenna siagang tena namappilangngeri ri Yeremia, ampabattuai pasanNa Batara mae ri ia.
13 Le’ba’mi nipassa Zedekia ri Karaeng Nebukadnezar untu’ assumpa lalang arenNa Allata’ala angkanaya talaminrayai pa’mai’na mae ri Nebukadnezar. Mingka ribokoanganna angngewai Zedekia mae ri Nebukadnezar. Kapala batui Zedekia mae ri Batara, Allata’alana Israel. Taerokai ambokoi dosa-dosana siagang taerokai ammotere’ mae ri Batara.
14 Pantaranganna anjo, Balla’Na Batara le’baka Natangkasi Batara untu’ KalenNa, nira’massi ri pamimping-pamimpinna tu Yehuda, imang-imanga, siagang ra’yaka, lanri amminawang turu’na todong ke’nanga anynyomba barhala siagang naturuki panggaukanna bansa-bansa dorakaya ri tammulilina ke’nanga.
15 A’mole-molemi Batara, Allata’alana boe-boena ke’nanga appabattu tunisuro untu’ ampakaingaki Umma’Na, lanri NasayanNa ke’nanga siagang Balla’Na.
16 Mingka napare’ karek-karenanji anjo sikamma tunisuroNa Allata’ala, siagang nakakkali na’bi-na’biNa, kammayatompa tena najampangi kana-kananNa. Kale’bakkanna sanna’mi larrona Batara mae ri ke’nanga, siagang takkulleami ke’nanga ta’lappasa’ battu ri hukkunganNa Batara.
17 Napagio’mi Batara atinna karaeng Babel sollanna battu ambunduki ke’nanga. Anjo karaenga nabunomi tu Yehuda rungka-rungkaya, kammayatompa ia niaka lalang ri Balla’Na Batara. Tena manna sitau nakamaseang, tau toa yareka tau rungka, bura’ne yareka baine, tau garring yareka tau tagarring. Nipassareang ngasengi ri Allata’ala ke’nanga mae ri karaeng Babel.
18 Sikamma pakkakasa’ niaka ri Balla’Na Batara, barang-barang lompoa anggaranna, kammayatompa barang-baranna karaenga siagang pagawe-pagawena nirampasa’ kabusuki ri karaeng Babel nampa nierang mange ri Babel.
19 Naruntungi tembo’ kotana Yerusalem, kammayatompa Balla’Na Batara siagang sikontu balla’ karaenga natunui siagang barang-barang lompoa anggaranna niaka ija lalang ri anjo sikamma balla’ karaenga.
20 Ra’ya’ ta’lappasaka nalalingi mange ri Babel. Anjorengi ke’nanga nipa’jari atanna karaenga siagang atanna jari-jarina karaenga sa’genna ri jammang kakoasanna kakaraengang Persia.
21 Kammami anjo na’rupamo apa Napaua Batara tete ri Na’bi Yeremia, angkanaya anjo pa’rasanganga la’jari kalotoroki sallang 70 taung sallona, salaku sambenna taung-taung allo Pammari-mariang tenaya nijampangi.
22 Ri taung makase’re ammarentana Kores, karaeng Persia, Napa’rupami Batara apa le’baka Napau tete ri Na’bi Yeremia. Napagioki nyawana Karaeng Kores untu’ appasulu’ sura’ parenta, nibacaya ri sikontu daera kakaraenganna. Kammaminne bonena anjo suraka:
23 "Anne parentana Kores, karaeng Persia. Batara, Allata’ala makoasaya ri suruga ampa’jari karaenga’ ri sikontu linoa, siagang Nasuroa’ ambangungi Balla’Na ri Yerusalem ri daera Yehuda. Jari ikau ngaseng Umma’Na Allata’ala musti ammoterekko mange anjoreng! Dasi-dasi naNajagaiko Karaeng Allata’alanu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA