Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Marumur sapuluh dua tahun do si Manasse sanggah na bangkit raja ai ia, anjaha lima puluh lima tahun do dokahni ia manrajai i Jerusalem.
2 Dob ai ihorjahon raja ai ma sogam ni uhur ni Jahowa, romban hubani hagigi, na hinorjahon ni bangsa sipajuh begu-begu, na dob pinabali ni Jahowa i lobei ni halak Israel.
3 Ai iulaki raja ai do paulihon panumbahan i buntu-buntu, na dob pinarreong ni si Hiskia, bapani ai, anjaha ipajongjong do anjapanjap bani Baal anjaha ipauli sisombahon Ashera; isombah do ganup bala na i langit, anjaha ibalosi do ai.
4 Anjaha ipajongjong do anjapanjap ibagas Rumah ni Jahowa, pasal ai domma ihatahon Jahowa namin, “I Jerusalem do ianan ni goran-Ku ronsi sadokah ni dokahni.”
5 Ambah ni ai ipauli do anjapanjap bani haganup bala ni langit i alaman ni Rumah ni Jahowa na dua ai.
6 Itutung do homa anakni i habungan Ben-Hinnom, ihorjahon do partondungon, uti-utian, tabas-tabas, ipakei do jolma hasiaran ni begu-begu ampa sipanjahai. Buei tumang do ihorjahon sogam ni uhur ni Jahowa laho mamuhoi ringis-Ni.
7 Ipajongjong do gana-gana batu ni naibata na legan, na pinaulini ai, hubagas Rumah ni Naibata; pasal ai do na hinatahon ni Naibata hubani si Daud ampa hubani si Salomo, anakni ai, “Ibagas rumah on do ampa i Jerusalem, na dob Hupilih ai humbani ganup marga ni Israel, patotapon-Ku goran-Ku ronsi sadokah ni dokahni.
8 Anjaha seng be paosoron-Ku nahei ni Israel, hun tanoh na dob Hutotapkon hubani ompung nasiam, asal ma iporluhon uhur ni sidea mangkorjahon haganup na dob Huparentahkon hubani sidea, ganupan titah, aturan pakon uhum ai, na binere marhitei si Musa.”
9 Tapi ipakahou si Manasse do halak Juda ampa isi ni Jerusalem, gabe ihorjahon sidea ma hajahaton, hasamboron humbani bangsa sipajuh begu-begu, na dob nisiapkon ni Jahowa i lobei ni halak Israel.
10 Roh do namin hata ni Jahowa hubani si Manasse ampa hubani ganup bangsa-Ni, tapi seng iparimbagaskon sidea.
11 Halani ai, iparoh Jahowa ma dompak sidea kopala-kopala ni bala ni raja Assur, ai ma na manangkap si Manasse marhitei hait-kait, irantei ma ia bani rantei tombaga, anjaha iboan sidea ma ia hu Babel.
12 Jadi dob tarsosak ia, ielek-elek ma Jahowa, Naibatani, anjaha ipaunduk botul ma uhurni i lobei ni Naibata ni ompungni.
13 Martonggo ma ia hu Bani, jadi marpangulaki ma uhur ni Naibata mangidahsi, itangihon ma tonggoni ai, anjaha iboan ma ia mulak hu Jerusalem, hu harajaonni ai hinan. Jadi mangahap ma si Manasse, Jahowa do hape Naibata.
14 Dob ai ipauli ma tembok hampit darat, i huta ni si Daud, hampit hasundutan ni Gihon, i habungan ai, laho masuk hu Horbangan Dengke; ipatorus ma ai manginggoti Opel, anjaha gijang tumang do ai ibahen. Ambahni ai inahkon do kopala-kopala ni bala marianan i ganup huta na pinatoguh i Juda.
15 Dob ai ipadaoh ma naibata na legan ampa gana-gana humbagas Rumah ni Jahowa ampa haganup anjapanjap na pinajongjong i dolog ianan ni Rumah ni Jahowa ampa na i Jerusalem; iambukkon ma ai hu darat ni huta ai.
16 Ipajongjong ma use anjapanjap ni Jahowa, anjaha igalangkon ma i atasni galangan pardameian ampa puji-pujian, anjaha iparentahkon ma Juda mambalosi Jahowa, Naibata ni Israel.
17 Tapi tong ope bangsa ai manggalang i panumbahan na i buntu-buntu, tapi pitah hubani Jahowa, Naibata ni sidea ai mando.
18 Tapi horja ni si Manasse na legan ai, ampa tonggoni hubani Naibatani ampa hata sipaingat ni nabi, na marsahap dompaksi ibagas goran ni Jahowa, Naibata ni Israel, tonggor ma, tarsurat do ai ibagas buku Barita ni Raja-raja Israel.
19 Sonai homa tonggoni ampa sonaha panangihon ni Naibata bani elek-elekni ai ampa haganup dousani ampa hajahatonni ampa tapak hajongjongan ni panumbahan na i buntu-buntu, na pinaulini ai, pakon sisombahon Ashera ampa gana-gana, paima ipaunduk uhurni, tonggor ma, tarsurat do ai ibagas buku Barita ni Halak na Marpanonggoran.
20 Dob ai modom ma si Manasse rap pakon ompungni, gabe itanom sidea ma ia ibagas rumahni; jadi si Amon, anakni ai ma bangkit raja manggantihsi.
21 Marumur dua puluh dua tahun do si Amon, sanggah na bangkit raja ai ia, anjaha dua tahun do dokahni ia manrajai i Jerusalem.
22 Ihorjahon do sogam ni uhur ni Jahowa, songon na binahen ni si Manasse, bapani ai: Manggalang do si Amon hubani ganup gana-gana, na pinauli ni si Manasse, bapani ai, anjaha marsombah do ia hujai.
23 Tapi seng ipaunduk si Amon uhurni i lobei ni Jahowa, songon na pinaunduk ni si Manasse, bapani ai, uhurni, tapi lambin ipabuei si Amon do tene salahni.
24 Dob ai marbulawan ma juakjuakni mangimbangsi, anjaha ibunuh ma ia ibagas rumahni sandiri.
25 Tapi roh ma bangsa pangisi ni nagori ai, ibunuh sidea ma halak na marbulawan mangimbang Raja Amon; jadi ipabangkit pangisi ni nagori ai ma si Josia, anakni ai, gabe raja manggantihsi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA