Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tupung Manase jadi raja Juda umurna sepulu dua tahun. Jenari merentah ia i Jerusalem lit lima pulu lima tahun dekahna.
2 Manase erdosa kempak TUHAN, perban iikutkenna lagu langkah si jahat i bas bangsa-bangsa si nggo ipelawes TUHAN i negeri Kanaan nari asum bangsa Israel bengket ku negeri e.
3 Ipajekkenna mulihi ingan-ingan ersembah kalak perbegu si nggo ikernepken bapana Hiskia. Ipajekkenna batar-batar guna nembah man Baal. Ibahanna gana-gana Dewi Asera dingen isembahna bintang-bintang.
4 Nggo ikataken TUHAN maka i bas Rumah Pertoton Jerusalem me Ia isembah rasa lalap; tapi i bas Rumah Pertoton eme ipajekken Manase batar-batar ingan ersembah man dibata-dibata kalak perbegu.
5 I bas duana kesain Rumah Pertoton e ipajekkenna batar-batar guna nembah bintang-bintang.
6 Ipersembahkenna anak-anakna si dilaki i Baluren Hinnom jadi persembahen tutungen. Ngguru-ngguru ia, isungkunna kalak pertendung ras perjinujung. Mbelin kal dosa Manase kempak TUHAN emaka keke ibahanna rawa TUHAN.
7 Itamakenna gana-gana i bas Rumah Pertoton e aminna pe nggo ikataken TUHAN man Daud ras anakna Salomo nina, "I jenda, i Jerusalem, i bas Rumah Pertoton enda, i jenda me ingan si nggo Kupilih i bas belang-belang daerah Israel si sepulu dua suku nari jadi ingan ersembah man bangKu rasa lalap.
8 Janah adi kalak Israel ngikutken kerina perentahKu, janah patuh man kerina Undang-undangKu, si nggo ibereken suruh-suruhenKu Musa man bangsa e, la Kupelepas kalak Israel ipelawes i bas negeri enda nari eme negeri si nggo Kubereken man nini-ninina."
9 Ibabai Manase kalak Israel erbahan dosa-dosa si belinen asangken si ibahan bangsa-bangsa si nggo ipelawes TUHAN i bas negeri e nari tupung bangsa Israel bengket ku je.
10 Aminna ipersingeti TUHAN si Manase ras rayatna, la diatena pe.
11 Emaka ipelepas TUHAN puanglima tentera Assur nerang Juda. Itangkapna Manase alu pengkawit, irantekenna, jenari ibabana ku Babil.
12 Erkiteken kiniseranna e, ukurna jadi meteruk emaka mulihken ia ku TUHAN, Dibatana janah ipindona penampat man BaNa.
13 Ibegiken ras ialoken Dibata pertoton Manase IbereNa ia mulih ku Jerusalem janah jadi raja ka mulihi. Enda erbahanca Manase tek maka TUHAN kap Dibata si tuhu-tuhu.
14 Kenca si e, ipeganjangi Manase tembok si arah darat arah Timur Kota Daud. Ibenaina i bas sada ingan i bas baluren deher ulu Lau Gihon terus ku Utara seh ku Pintu Gerbang Ikan dingen ku bagin kota si igelari Opel. Itamakenna ka pe puanglima-puanglima tentera ringan i bas tep-tep kota si erbenteng.
15 Iaguina i bas Rumah Pertoton e nari dibata-dibata bangsa si deban ras gana-gana si nggo itamakenna i je. Irontaskenna pe batar-batar persembahen man berhala-berhala si lit i bas uruk ingan Rumah Pertoton e pajek janah i bas ingan-ingan si deban i Jerusalem. Iangkutna kerina barang-barang e ku darat kota jenari iambekkenna.
16 Ipekenana pe batar-batar ingan nembah man TUHAN, jenari ipersembahkenna persembahen perdamen ras persembahen pengataken bujur i babo batar-batar e. Iperentahkenna kerina kalak Juda nembah man TUHAN, Dibata Israel.
17 Aminna pe iterusken bangsa e mereken persembahen i bas ingan-ingan persembahen si deban, tapi e ipersembahkenna man TUHAN saja.
18 Kerina si debanna si ibahan Manase, pertotonna man Dibatana, bage pe kata-kata nabi si ngerana man bana i bas gelar TUHAN, Dibata Israel, kerina isuratken i bas Sejarah Raja-raja Israel.
19 Pertoton raja dingen jabapen Dibata kerna pertoton e, kerina dosa-dosa si ilakokenna ope denga ia jera, si jahat si ibahanna, ingan-ingan ersembah man berhala-berhala ras patung-patung Dewi Asera si ibahanna bage pe gana-gana si isembahna, kerina isuratken i bas Sejarah Nabi-nabi.
20 Mate Manase jenari ikuburken i bas istana, emaka anakna Amon nggantiken ia jadi raja.
21 Umur Amon tupung ia jadi raja Juda dua pulu dua tahun, jenari merentah ia i Jerusalem lit dua tahun dekahna.
22 Bali ras bapana Manase, erdosa ia man TUHAN dingen isembahna gana-gana si nggo ibahan bapana.
23 Tapi lainna ia ras bapana eme la ipeterukna bana janah la ia nembah man TUHAN. Lebihen dosa-dosa si ibahanna asangken dosa-dosa si ibahan bapana.
24 Anak buahna erpekat ngelawan ia emaka ibunuhna Manase i bas istana.
25 Kenca bage ibunuh rayat Juda kalak si munuh Amon ndai, jenari itangkuhkenna Josia anak Amon jadi raja.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA