Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi dob salpu na masa ai ampa na pataridahkon horja hasintonganni si Hiskia ai, roh ma si Sanherib, raja ni Assur, imasuki ma Juda anjaha ihubu huta na pinatoguh; isura uhurni do sihol manaban ai.
2 Jadi dob iidah si Hiskia, na dob roh si Sanherib marsura-sura sihol marporang dompak Jerusalem,
3 manriah ma raja ai rap pakon kopala-kopalani ampa puanglima, sihol mambongbong bah tubuh na i darat ni huta ai; jadi iurupi sidea ma ia.
4 Ai martumpu do buei halak, gabe ibongbong sidea ma sagala bah tubuh ampa bah bolon, na mardalan hun tanoh ai, nini sidea do, “Mase ma buei bah jumpahon ni raja Assur, anggo roh ia?”
5 Dob ai ipatenger raja ai ma uhurni, ipatoguh ma sagala tembok na dob marongrong, ipauli ma menara i atasni, anjaha i daratni ai ipauli ma tembok na legan; anjaha Milo, na i huta ni si Daud ai, ipatoguh do. Ipauli do homa buei tumang tanja ampa gantar-gantar.
6 Anjaha ipabangkit do kopala-kopala porang mambobahon bangsa ai, anjaha ipatumpu ma sidea hu lambungni i alaman dohorhon horbangan ni huta ai, anjaha marsahap ma ia patengerhon uhur ni sidea,
7 “Tenger ma uhur nasiam anjaha marsijoloman, ulang ma nasiam mabiar, anjaha ulang ma gobir uhur nasiam i lobei ni raja Assur barang i lobei ni ganup balani na rap pakonsi, ai gogohan do sihasomani hita ase ia.
8 Tangan na mardaging do hasomanni, tapi anggo hasomanta Jahowa Naibatanta do, na mangurupi anjaha na mambobahon parporanganta.” Jadi tenger ma uhur ni bangsa ai halani hata ni si Hiskia, raja ni Juda ai.
9 Dob ai roh ma si Sanherib, raja ni Assur, na mangkubu huta Lakis rap pakon ganup balani, isuruh ma juakjuakni hu Jerusalem marayak si Hiskia, raja ni Juda, ampa haganup halak Juda, na i Jerusalem, nini ma,
10 “Sonon do hata ni si Sanherib, raja ni Assur, ʻMarhatengeran hubani aha do nasiam, ase marianan ope nasiam i Jerusalem, ibagas huta na hinubu inggot?
11 Ai lang si Hiskia do na pakahouhon nasiam, laho mangondoskon nasiam hu hamatean, lohei ampa horah, anggo ihatahon hubani nasiam, “Jahowa Naibatanta do na paluahkon hita humbani tangan ni raja Assur?”
12 Ai lang ia, si Hiskia do, na dob na padaohkon panumbahanni na i buntu-buntu ampa anjapanjapni, hape ihatahon ope hubani Juda ampa Jerusalem, “I lobei ni anjapanjap na sada on do nasiam marsombah, anjaha i atasni on do nasiam manutung dahupa?”
13 Ai lang ibotoh nasiam barang aha na dob hubahen ampa na binahen ni ompung hubani haganup bangsa ni tanoh na legan? Ai adong do naibata ni bangsa ni tanoh ai, na boi paluahkon nagori ni sidea hun tanganku?
14 Ise ma humbani haganup naibata ni bangsa sipajuh begu-begu, na siniapkon ni ompung, na boi paluahkon bangsani hun tanganku? Mintor mubah ma gakni Naibata nasiam, tarpaluah-Si ma nasiam hun tanganku?
15 Ai pe, ulang ma ra nasiam sonai paoto-otoon ni si Hiskia, barang pakahouonni! Ulang ma haporsayai nasiam ia! Ai lang adong age sada naibata ni ganup bangsa-bangsa barang harajaon ai, na boi paluahkon bangsani hun tanganku barang hun tangan ni ompung. Samintolah Naibata nasiam ai ma, mintor tarpaluah-Si ma nasiam hun tanganku?ʼ”
16 Lambin inunut juakjuakni ai ope mangkatahon hatani mangapasi Naibata Jahowa ampa si Hiskia, juakjuak-Ni ai.
17 Ambahni ai domma isurat hinan sada surat laho mangapasi Jahowa, Naibata ni Israel, ampa mangkatahon hatani hu Bani, “Songon naibata ni bangsa-bangsa ni tanoh na legan ai seng tarpaluahsi bangsani hun tanganku, sonai ma seng tarpaluah Naibata ni si Hiskia bangsa-Ni humbani tanganku.”
18 Anjaha idilohon sidea do ai gogoh ibagas hata Jahudi hubani pangisi ni Jerusalem, na i atas ni tembok ai, mambibiari ampa mambahen gobir sidea, ase andohar boi taluhononni huta ai.
19 Sonai ma parsahap ni sidea dompak Naibata ni Jerusalem, songon parsahap ni sidea dompak naibata ni bangsa sipajuh begu-begu, ai ma naibata na tinukangan ni tangan ni jolma tumang.
20 Dob ai martonggo ma Raja Hiskia ampa Nabi Jesaya, anak ni si Amos, halani hata ai anjaha doruh-doruh dompak nagori atas.
21 Dob ai isuruh Jahowa ma sada malekat-Ni maniapkon ganup puanglima, raja-raja ampa kopala-kopala i parsaranan ni raja Assur. Dob ai mulak ma ia, mela tumang hu tanohni. Jadi dob mulak ia hu rumah ni naibatani, roh ma piga-piga anakni sandiri mamunuhsi marhitei podang.
22 Ase Jahowa do na paluahkon si Hiskia ampa pangisi ni Jerusalem hun tangan ni si Sanherib, raja ni Assur, ampa hun tangan ni haganup munsuhni; anjaha sonang ma sidea ibahen inggot.
23 Jadi buei ma halak na maboban sibere-bere hubani Jahowa i Jerusalem ampa na maharga hubani si Hiskia, raja ni Juda, gabe timbul ma ia olatni ai iidah sagala bangsa sipajuh begu-begu.
24 Boritan ma ijia si Hiskia pala laho matei; dob ai martonggo ma ia hubani Jahowa, ibalosi Jahowa ma ia anjaha ibere ma bani sada tanda halongangan.
25 Tapi seng maruhur tarima kasih si Hiskia pasal idop ni uhur na jinaloni ai, ai ipagijang do uhurni. Halani ai, roh ma ringis hu bani, hubani Juda ampa Jerusalem.
26 Dob ai ipaunduk si Hiskia ma uhurni, halani gijang ni uhurni ai, ia ampa pangisi ni huta Jerusalem, gabe seng be saud sogop ringis ni Jahowa bani sidea, sanggah bani goluh ni si Hiskia.
27 Bayak tumang do si Hiskia anjaha sangap; ipadear ma bani kamar parartaan, ianan ni pirak, omas, mata intan, rium-riuman, gantar-gantar ampa marbagei-bagei parugas na maharga.
28 Ipauli do homa rumah panimpanan ni gogoh ni tanoh ai, omei, anggur pakon minak, sonai ampa harang ni pinahan.
29 Ambahni ai ipauli ma bani huta-huta; buei tumang do pinahanni, ai ma biribiri pakon lombu, ai ibere Naibata do arta bani buei tumang.
30 Si Hiskia do homa na mambongbong harohan ni Bah Gihon na parbuntu, anjaha ipadalan ma ai hun toruh ni tanoh hu huta ni si Daud na hampit hasundutan. Mardohar do si Hiskia bani ganup horjani.
31 Tapi dob roh suruhan ni raja hun Babel, ai ma na sinuruh marayaksi, laho manungkun tanda halongangan na dob masa i nagori ai, jadi itadingkon Naibata ma ia, laho manlajousi anjaha laho mangidah haganup atap aha na adong ibagas uhurni.
32 Ia barita na legan pasal si Hiskia ampa pambahenanni na dear ai, tonggor ma, tarsurat do ai ibagas Buku Pangungkabon ni Nabi Jesaya, anak ni si Amos, ampa ibagas Buku ni Raja-raja Juda pakon Israel.
33 Dob ai modom ma si Hiskia rap pakon ompungni, anjaha itanom sidea ma ia i raboyon ni tanoman ni ginompar ni si Daud, anjaha roh bei ma ganup halak Juda ampa pangisi ni Jerusalem pasangapkon raja ai bani parmateini ai. Jadi si Manasse, anakni ai ma bangkit raja manggantihsi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA