Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saellana Rato Hizkiya alampa’agi sabarang se noduwagi kaestowanna ka PANGERAN, Yehuda eserrang bi’ Sanherib, rato Asyur. Sanherib ngeppong tha-kottha se abinteng ban marenta’agi pasukanna sopaja tha-kottha jareya erebbu’a.

² E bakto Hizkiya ngagali ja’ Sanherib aneyat aloroga Yerusalim,

³ salerana ban ba-ponggabana sarta ra-parwirana motossagi notoba sakabbinna kennengnganna aeng e lowar kottha, maksodda sopaja oreng Asyur ta’ nemmowa aeng mon la napa’ ka seddi’na Yerusalim. Bannya’ oreng se epalako epanotop sakabbinna somberra aeng se agili ka lowar kottha.

⁴ (32:3)

⁵ Rato pas makoko partahananna kottha, iya areya mateppa’ geddhungnga, maddek ra-manara e attasanna, sarta maddek geddhung laen e lowarra se asal. Laen dhari jareya binteng se epaddek e attassa tana tembugan e penggir temor e bagiyanna Yerusalim se laju, epateppa’. Hizkiya makon oreng agabay tombak ban tameng sabannya’na.

⁶ Ngangkat ra-parwira se epangapalae sakabbinna lalake’an e dhalem kottha; reng-oreng jareya epakon akompol e lon-alon e adha’na labang sakethengnga kottha. Hizkiya laju adhabu ka reng-oreng jareya,

⁷ "Pakowat ban payakin atena ba’na; ja’ tako’ ka rato Asyur otaba ka pasukanna. Kakowadanna ba’na araja’an dhari kakowadanna Asyur.

⁸ Rato Asyur rowa andhi’ kakowadanna manossa tape, ba’na andhi’ GUSTE Allah se abantowa ba’na aperrang." Ngedhing dhabuna ratona se kantha jareya, ra’yat laju daddi bangal.

⁹ Ta’ abit dhari jareya e bakto Sanherib ban pasukanna gi’ badha e Lakhis, Sanherib jareya ngerem otosan ka Rato Hizkiya ban ka ra’yat Yehuda e Yerusalim, epakon manapa’ pessen kantha reya,

¹⁰ "Sengko’ Sanherib rato Asyur, terro atanya’a, apa sababba ba’na me’ ce’ bangalla gi’ paggun neng e Yerusalim se la ekeppong bi’ sengko’ reya?

¹¹ Apa Hizkiya malae ba’na ja’ GUSTE Allahna ba’na bakal malopoda ba’na dhari tang kakobasa’an? Ja’ parcaja, ba’na eco-koco. Ba’na bi’ ratona jareya epamateya kalaparan ban kapelka’en.

¹² Ratona ba’na jareya se maancor kennengnganna oreng abakte ka PANGERAN sarta ba-mezba neng e man-dhimman, laju nyoro oreng Yehuda ban Yerusalim ngalakone kabakteyan ban ngobbar dupa e settong mezba malolo.

¹³ Apa ba’na ta’ tao epabaramma sa-bangsa laen bi’ sengko’ sarta bi’ tang bangatowa? Ba-dibana bangsa laen gi’ ta’ tao malopot bangsana dhari kakobasa’anna rato Asyur!

¹⁴ Se kemma e antarana ba-diba jareya se tao malopot bangsana dhari kakobasa’anna Asyur? Dibana ba’na ta’ kera bisa masalamet ba’na!

¹⁵ Daddi ba’na ja’ endha’ eco-koco ratona! Ja’ parcaja ka rato jareya! Sabab dibana bangsa se kemma’a bai ta’ tao badha se sanggup malopot bangsana dhari kakobasa’anna rato Asyur. Daddi dibana ba’na terrang ta’ kera bisa masalamet ba’na!"

¹⁶ Gi’ bannya’ pole se ekoca’agi para otosanna rato Asyur jareya kaangguy ya-nyeya PANGERAN ban Rato Hizkiya, abdina PANGERAN jareya.

¹⁷ Rato Asyur abadhi keya sorat se nangtang PANGERAN, Allah se esemba oreng Isra’il. Monyena barinna’, "Ba-dibana sa-bangsa laen ta’ bisa malopot bangsana dhari tang kakobasa’an, bariya keya dibana Hizkiya ta’ bisa malopot bangsana dhari tang kakobasa’an."

¹⁸ Para otosanna Asyur jareya ra’-era’an ngoca’agi jareya kabbi ngangguy oca’ Ibrani, ko’-nako’ana ban maelanga samangadda reng-oreng Yerusalim se badha e attassa geddhungnga kottha sopaja bangsa Asyur jareya bisa’a gampang arebbu’ kottha jareya.

¹⁹ Reng-oreng Asyur jareya acaca parkara Allah se esemba e Yerusalim epapadha ban se acaca parkara ba-dibana bangsa laen, iya areya ca-arca gabayanna manossa.

²⁰ Daddi Rato Hizkiya ban Nabbi Yesaya pottrana Amos adu’a nyo’on partolongan ka Allah.

²¹ PANGERAN laju ngerem malaekat se mate’e rit-parjurit ban ra-parwira Asyur jareya. Rato Asyur ce’ malona, laju gubar ka nagarana. E settong are, teppa’na rato Asyur jareya badha e dhalem kowella dibana, badha tra-pottrana dibi’ entar ka jadhiya, laju mate’e rato Asyur jareya ban peddhang.

²² Kantha jareya carana PANGERAN malopot Rato Hizkiya ban pandhudhu’ Yerusalim dhari kakobasa’anna Sanherib rato Asyur, ban dhari so-mosona se laen. Rato Hizkiya ban ra’yat Yerusalim bi’ PANGERAN eparenge odhi’ aman, ta’ ela-salae ra-nagara tatanggana.

²³ Bannya’ oreng entar ka Yerusalim ngeba tor-ator ka PANGERAN sarta tor-ator ka Rato Hizkiya, sampe’ molae dhari jareya Hizkiya ehormadi sa-bangsa laenna.

²⁴ Ra-kera e bakto jareya Rato Hizkiya songkan. Panyakedda ce’ sarana sampe’ para’ seda’a. Hizkiya adu’a nyo’on ka Pangeran; PANGERAN laju apareng tandha ja’ salerana bakal barasa.

²⁵ Tape sarrena angga’, Hizkiya ta’ asokkor se la eparenge baras bi’ PANGERAN jareya. Daddi PANGERAN duka ka Yehuda ban Yerusalim.

²⁶ Tape dhi-budhina Hizkiya ban reng-oreng Yerusalim marendha, daddi saabidda Hizkiya gi’ odhi’, okoman jareya ta’ ejalannagi.

²⁷ Rato Hizkiya laju ce’ sogina ban ehormadi sakabbinna oreng. Salerana abadhi mar-kamar se egabay panyempennanna dunnyana, iya areya: emmas, salaka, to-bato mamatan, pa-lappa, tameng ban rang-barang se arga laenna.

²⁸ Hizkiya kaagungan dhang-gudhang kennengnganna panyempennanna rang-barang hasel bumena, akantha: gandum, anggur, ban mennya’ jaitun; bariya keya dhang-kandhang kennengnganna pe-sapena ban ba-dumbana se talebat bannya’na.

²⁹ Laen dhari jareya Hizkiya maddek kottha sabannya’na. Artana, paparengnga Allah ka salerana jareya, ta’ sakera-kera bannya’na.

³⁰ Rato Hizkiya jareya se nebbeng gilina somber Gihon, ban magili aengnga lebat e kalobungan e babana tana e dhalem kottha Yerusalim. Sabarang se elampa’agi Hizkiya ahasel.

³¹ Ban e bakto reng-oreng otosan dhari Babil dhateng ka jadhiya atanya’a ka salerana parkara panyakedda se baras sacara ajib, bi’ Pangeran Hizkiya epanneng ngala’ sakarebba dibi’ kalaban maksod ngojiya atena.

³² Careta laenna parkara Rato Hizkiya, ban parkara kataresna’anna ka PANGERAN ecathet e dhalem ketab Wahyu dhari Allah ka Nabbi Yesaya Pottrana Amos ban e dhalem ketab Sajarana To-rato Yehuda ban Isra’il.

³³ Hizkiya seda, laju esareyagi e ga’-ongga’an e tana pasareyanna to-rato. Ra’yat Yehuda ban Yerusalim kabbi padha ngatore panghormadan se raja ka salerana e bakto pasedana. Manasye epagante salerana epajumenneng rato.

2 Tawarikh

Video 2 Tawarikh 32

Ikuti Kami:

KONTAK | PARTISIPASI | DONASI