Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anjo wattua tenapa nisuarri Allo Lompo Paskaya punna narapi’ wattunna ri bulang se’re, lanri sike’de’ duduiji imang le’baka antangkasi kalenna siagang tenapa najai tau asse’re ri Yerusalem. Lanri kammana anjo situjumi Karaeng Hizkia siagang pagawe-pagawena kammayatompa panduduka ri Yerusalem untu’ ansuarri anjo Allo Lompo Paskaya ri bulang ruana. Sannang kabusuki pa’mai’na ke’nanga mae ri anjo rancanaya. Nampa akkirimmi sura’ karaenga mae ri sikontu tu Israel siagang tu Yehuda, kammayatompa mae ri tu Efraim siagang tu Manasye. Sikontu bansa Israel battua ri daera suku Dan bageang wara’ sa’genna mange ri Bersyeba ri bageang timboro’, niundang kabusu’ tongi mange ri Balla’Na Batara untu’ ansuarri Allo Lompo Paskaya siagang untu’ ampakala’biriki Karaeng Allata’alana Israel, situru’ apa le’baka nipattantu lalang ri hukkung-hukkung le’baka napassareang Musa. Tena le’bakapi nisuarri kamma anjo Allo Lompo Paskaya.
2 (30:1)
3 (30:1)
4 (30:1)
5 (30:1)
6 Lanri parentana karaenga siagang pagawe-pagawena nikirimmi a’lampa sikamma tunisuroa mange ri sikontu daera Yehuda siagang Israel untu’ angngerangi anjo suraka. Kammami anne bonena anjo suraka, "Kupabattui mae ri sikontu ra’ya’ Israel! Le’ba’ kabusu’ mako ta’lappasa’ battu ri kakoasanna tu Asyur. Kamma-kamma anne siratang mako ammotere’ anynyomba mae ri Batara, Allata’ala nisombaya ri Abraham, Ishak, siagang Yakub, sollanna ammotere’ todong untu’ antulungko.
7 Teako sangkammai boe-boenu siagang tu Israel maraenga tenaya namajarre’ tappa’na mae ri Karaeng Allata’alana ke’nanga. Nucini’mi kalennu antekamma battala’na hukkungang Napabattua Karaeng Allata’ala mae ri ke’nanga.
8 Teako kapala batui sangkamma ke’nanga, mingka mannurukiko ri Batara. Battu mako mae ri Yerusalem, ri Balla’na Batara le’bakamo Natangkasi Karaeng Allata’alanu untu’ KalenNa sa’genna satunggu-tungguna. Mae mako nakianynyomba mae ri Ia sollanna ammari larro mae ri kau.
9 Punna ammoterekko mange anynyomba ri Batara, anjo tau le’baka allalingi bija pammanakannu salaku tunitahang, lamangngamaseangi siagang lanapa’biangi ke’nanga ammotere’ mae anrinni ri pa’rasanganta. Anjo Karaeng Allata’alanu, Iami Allata’ala mabaji’ siagang Mangngamaseangi; laNatarimako punna ammoterekko mae ri KalenNa."
10 Ri wattunna a’lampa anjo sikamma tunisuroa battu ri se’reang kota mae ri kota maraengannaya ri daera suku Efraim siagang Manasye sa’genna wara’ ri daerana suku Zebulon, nikakkali siagang nihina-hinai ke’nanga.
11 Mingka, nia’ todong tau battu ri suku Asyer, Manasye, siagang Zebulon ero’ a’lampa mange ri Yerusalem.
12 Manna ri Yehuda Napagio’ tonji Allata’ala siagang Napa’julu ati ra’yaka untu’ attojeng-tojeng mannuruki ri ero’Na Allata’ala, sa’genna naturuki parentana karaenga siagang pagawe-pagawena.
13 Ri bulang ruana jaimi ra’ya’ asse’re ri Yerusalem untu’ ansuarri Allo Lompo Roti Tenaya Nammake Pa’gambang.
14 Sikontu tampa’ pakkoro’bangngang niaka ri Yerusalem le’baka nipake untu’ assare koro’bang siagang attunu dupa mae ri rewata-rewataya, nialle kabusuki nampa nipela’ antama’ ri Ka’bung Kidron.
15 Ri tanggala’ 14 anjo bulanga ammolommi ke’nanga gimbala’ untu’ nipassareang salaku koro’bang Paska. Sikamma imanga siagang tu Lewi ra’masaka ija, a’jari siri’-siri’mi. Jari natangkasimi ke’nanga kalenna, sa’genna akkullemo ke’nanga assare koro’bang nitunu ri Balla’Na Batara.
16 Massing mangemi ke’nanga ri tampa’na ri Balla’Na Batara, situru’ katantuang-katantuang niaka tattulisi’ lalang ri Kitta’ Hukkung-hukkung napassareanga Musa. Cera’na anjo olo’-oloka napassareangi tu Lewi mae ri sikamma imanga, nampa napatiri’ ke’nanga mae ri tampa’ pakkoro’bangnganga.
17 Jai battu ri sikontu anjo tau hadereka anjoreng tenapa natangkasi kalenna, sa’genna tenapa nakkulle ke’nanga ammolong gimbala’ untu’ koro’bang Paska. Lanri kammana anjo tu Lewi mami ampolongangi ke’nanga anjo gimbala’na, nampa napassareang ri Batara.
18 Pantaranganna anjo, jai tongi tau battu ri Efraim, Manasye, Isakhar, siagang Zebulon na tenapa natangkasi la’bi rioloi kalenna ke’nanga. Jari, tenapa nasiratang ke’nanga amminawang ansuarri anjo Allo Paskaya. Lanri kammana anjo napappala’ doangammi Karaeng Hizkia ke’nanga angkana,
19 "O Batara, Allata’ala nasombaya boe-boena ikambe, dasi-dasi nalanri kabajikang pa’maitTa naKipamopporangi ke’nanga anne niaka attojeng-tojeng nyawana anynyomba mae ri Katte, manna pole natasiratanga ke’nanga lanri tenanapa natangkasi kalenna."
20 Napilangngerimi Batara anjo pappala’ doanna Hizkia. Napammopporammi anjo taua, siagang tenamo Nahukkungi ke’nanga.
21 Tuju alloi sallona, sanna’ rannuna ngaseng nyawana taua asse’re ri Yerusalem anggaukangi anjo upacara passua’-suarrang Allo Lompo Roti Tenaya Nammake Pa’gambang. Tunggala’ alloi tu Lewi siagang sikamma imanga mammuji-mujia tojeng mae ri Batara.
22 Teai sipato’ cara’de’na anjo tu Lewia ampimpingi anjo panynyombanga mae ri Batara, sa’genna nipalece ke’nanga ri Hizkia. Le’baki tuju allo sallona ke’nanga angkasiaki kanre-kanreang battua ri anjo passua’-suarranga kammayatompa ampassareangi koro’banga untu’ appala’ sukkuru’ mae ri Batara, Allata’alana boe-boena ke’nanga,
23 natappukimi ke’nanga untu’ ansambungi pole anjo passua’-suarranga 7 allo pole sallona. Jari natambaimi pole nagaukang ke’nanga anjo passua’-suarranga, narannu ngaseng nyawana.
24 Anynyumbammi Karaeng Hizkia 1.000 sapi laki siagang 7.000 gimbala’. Pagawe-pagawena Hizkia assare todong sumbangang 1.000 sapi laki siagang 10.000 gimbala’. Sikontu anjo olo’-oloka nipassareangi mae ri ra’yaka untu’ nipolong nampa nikanre. Sanna’ jaina imang antangkasi kalenna.
25 Sikontu ra’ya’ Yehuda, imang-imanga, tu Lewi, sikamma tau battu waraka, kammayatompa bansa maraeng niakamo ammantang tuli ri Israel siagang ri Yehuda, mate’ne kabusuki nasa’ring nyawana.
26 Sanna’ suara’na kota Yerusalem, lanri baku’na jammang ammarentana Salomo ana’na Daud, tena le’bakai kajariang anjo gau’ kammaya.
27 Imang-imanga siagang tu Lewi napappalakangi barakka’ ra’yaka ri Batara, nampa Napilangngerimo Allata’ala battu ri pammantanganNa ri suruga anjo pappala’ doanna ke’nanga na Natarima.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA