Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E taon se kapeng petto’ Imam Yoyada motossagi ja’ la napa’ baktona mabaliya kakobasa’an e Yehuda ka ahli waris se sabendherra. Daddi Yoyada aparembagan ban panglima se bannya’na kalema, iya areya Azarya ana’na Yeroham, Isma’il ana’na Yokanan, Azarya ana’na Obed, Ma’aseya ana’na Adaya, ban Elisafat ana’na Zikhri.
2 Reng-oreng jareya padha meyos ka sakabbinna kottha e Yehuda, laju makompol reng-oreng Lewi ban sakabbinna kapalana kaom, saellana akompol laju padha egiba ka Yerusalim kabbi.
3 Reng-oreng jareya akompol e Padalemman Socce, laju abadhi parjanjiyan ban Yowas, pottrana rato jarowa. Dhabuna Yoyada ka reng-oreng jareya, "Paneka’ pottrana almarhum Rato Ahaziya! Kana’ paneka samangken kodu alenggi e tahtana karaja’an, sabab PANGERAN ampon adhabu ja’ toronanna Rato Daud bakal marenta’a saterrossa.
4 Samangken sampeyan ban kaula kodu sapaneka: Manabi para imam sareng oreng Lewi lastare ajalannagi kawajibanna e are Sabat, sadaja ja’ parengngagi paleman. Se sapartellon kodu noro’ ajaga bang-labang sakethengnga Padalemman Socce,
5 sapartellonna pole ajaga e karaton, dineng se sapartellon laenna e Labang Saketheng Dhasar. Ra’yat sadajana kodu akompol e palataranna Padalemman Socce.
6 Tadha’ oreng se kengeng maso’ ka Padalemman Socce kajabana para imam sareng reng-oreng Lewi se kalerressan ajalannagi kawajibanna. Para imam sareng reng-oreng Lewi gapaneka kengeng maso’ sabab ampon padha etantowagi epaladine Pangeran malolo. Reng-oreng laenna kodu atoro’ ka atoranna PANGERAN, sareng kodu neng e lowar.
7 Reng-oreng Lewi kodu manjeng e sakalenglengnga rato, peddhangnga eonos, sareng asarengnge rato gapaneka manabi meyos ka’amma’a saos. Pasera’a saos se aehteyar maso’a ka Padalemman Socce kodu epate’e."
8 Parentana Yoyada jareya ejalannagi bi’ reng-oreng Lewi sarta ra’yat Yehuda. Reng-oreng se la ajalannagi kawajibanna e are Sabat ta’ ebagi gubar. Daddi para parwira ngenneng ngangguy reng-oreng se la mare ajalannagi kawajiban ban reng-oreng se gi’ buru dhateng ajalannagiya kawajibanna.
9 Para parwira jareya bi’ Yoyada padha eparenge tombak ban tameng kaagunganna Rato Daud se esempen e Padalemman Socce.
10 E sabingkerra bagiyan adha’na Padalemman Socce bi’ Yoyada esaba’i oreng keya se neggu’ peddhang se eonos, esoro ajaga kasalameddanna rato.
11 Saellana jareya Yoyada abakta Yowas kalowar; Yowas laju epangagem makotha, sarta epassrae ketab Hokomma Allah. Kalaban cara se kantha jareya Yowas la epajumenneng rato. Saellana jareya bi’ Imam Yoyada ban tra-pottrana, Yowas eselene mennya’ se eangguy e dhalem opacara mon badha oreng se epajumenneng rato, ban sakabbinna oreng laju padha aera’, "Hidup rato!"
12 Atalya meyarsa ra’yat asorak ahormadi rato, laju duli meyos ka Padalemman Socce. E jadhiya bannya’ oreng abung-garibbung.
13 Atalya ngoladi rato se anyar ngadek e labang lowarra Padalemman Socce, e kennengnganna Yowas se eresmeyagi epajumenneng rato, ekalenglenge ra-parwira ban reng-oreng se nope tarompet. Ra’yat padha asorak kaperagen sambi etoro’e monyena tarompet, ban reng-oreng tokang nabbu mosik e Padalemman Socce nambai rammena paraya’an jareya ban mosigga. Atalya nyebbit kalambina, atena ketter, laju aera’, "Kiyanat! Kiyanat!"
14 Yoyada ta’ ngedine oreng mate’e Atalya e sabingkerra Padalemman Socce, daddi laju adhabu ka para parwira, "Pakalowar oreng ganeka, lebat e barisanna pangawal; pate’e pasera’a bai se ngoddi masalamedda Atalya ganeka."
15 Atalya laju epega’ bi’ ra-parwira jareya, laju egiba ka karaton. E karaton jareya Atalya epate’e e Labang Saketheng Jaran.
16 Imam Yoyada ngajak Rato Yowas ban ra’yat areng-bareng ban salerana, mabadha parjanjiyan padha daddiya ommadda PANGERAN.
17 Saellana jareya reng-oreng jareya kabbi padha nyerbu ban magujur kowella Ba’al. Mezba ban ca-arcana epaancor, dineng Matan, Imamma Ba’al, epate’e e adha’na ba-mezba jareya.
18 Yoyada laju makon para imam ban oreng Lewi ngoros lalakon e Padalemman Socce menorot pambagiyanna lalakon se la etantowagi bi’ Rato Daud. Reng-oreng jareya kodu ngatorragi kurban obbaran ka PANGERAN — menorot kom-hokomma Mosa — etoro’e paraya’an ban nyanyeyan-nyanyeyan se la eator bi’ Daud.
19 E bang-labang sakethengnga Padalemman Socce Yoyada nyaba’ pangawal se epajaga sopaja oreng se ta’ patot nyemba ka PANGERAN ta’ sampe’a maso’.
20 Para parwira, para pamimpin masarakat, om-kaom oreng agungnga pamarenta, ban sakabbinna ra’yat padha ngerengngagi Yoyada ngarak Rato Yowas dhari Padalemman Socce ka karaton. Sanapa’na ka karaton laju padha maso’ lebat e labang saketheng otama; rato laju alenggi e korse karaja’an.
21 Ra’yat padha perak kabbi, kottha taremtem, dineng Atalya la epate’e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA