Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca enem tahun nima-nima ibahan Imam Joyada keputusen maka nggo seh paksana erbahan tindaken. Ibahanna perpadanen ras lima kalak puanglima tentera eme: Asaria anak Jeroham, Ismael anak Johanan, Asaria anak Obet, Maaseiah anak Adaya dingen Elisapat anak Sikri.
2 Idahina ku kerina kota-kota Juda jenari ibabana kalak Lewi ras kerina peminpin-peminpin terpuk mulih ku Jerusalem.
3 Pulung kalak enda kerina i bas Rumah Pertoton dingen i je ibahanna perpadanen ras Joas anak raja mbarenda. Nina Joyada man kalak enda, "Enda me anak raja mbarenda! Genduari ia me jadi raja bagi si ipadanken TUHAN maka kesusuren Raja Daud me jadi raja.
4 Bagenda me ateta silakoken, kenca imam-imam ras kalak Lewi nggo dung ertugas i bas wari Sabat, sepertelu i bas kalak e nari njaga pintu gerbang Rumah Pertoton.
5 Sepertelu nari njaga istana, jenari si debanna njaga pintu gerbang Palas. Kerina jelma si nterem pulung i bas kesain Rumah Pertoton.
6 Ise pe la banci bengket ku bas Rumah Pertoton seakatan imam-imam ras kalak Lewi si ertugas. Kalak enda banci bengket sabap nggo ia itangkuhken, tapi kerina jelma si nterem arus patuh man perentah TUHAN dingen nimai i darat.
7 Kalak Lewi arus tedis erjaga-jaga i sekelewet raja alu pedang-pedang si talang, janah arus tetap ras raja ku japa pe raja e lawes. Ise si atena bengket ku bas Rumah Pertoton e la banci la ibunuh."
8 Kalak Lewi ras kalak Juda ngikutken kai si iperentahken Joyada. Kalak si aturenna dung ertugas i bas wari Sabat la ipelepas lawes. Emaka puanglima-puanglima e nggo sikap anak buahna subuk si nggo dung ertugas ras si sangana ertugas i bas wari Sabat.
9 Ibereken Joyada man bana lembing ras ampang-ampang i bas Raja Daud nari si ibuniken i bas Rumah Pertoton e.
10 Itamakenna kalak si njemak pedang talang i kelewet Rumah Pertoton guna ngkawali raja.
11 Kenca bage ibaba Joyada si Joas ndarat, itamakenna mahkota i babo takalna, jenari iberekenna bana salinen undang-undang kerajan. Kenca bage imomokenna maka Joas me raja. Imam Joyada ras anak-anakna nangkuhken Joas, jenari kerina kalak ersurak nina, "Mejuah-juahlah raja!"
12 Ibegi Atalia sora jelma si nterem ersurak meriah erkiteken raja e; emaka pedas-pedas ia lawes ku Rumah Pertoton e, i je jelma si nterem nggo pulung.
13 I je idahsa raja si mbaru e i bas dalan bengket ku bas Rumah Pertoton, sangana tedis deherken binangun ingan raja-raja, dingen ikeleweti puanglima-puanglima tentera ras kalak si ngembus terompet. Kerina jelma si nterem ersurak alu meriah dingen ngembus terompet, janah pemain-pemain musik Rumah Pertoton ergendang mbabai pesta e. Ngidah si e icaingken Atalia uisna perbahan merawa atena jenari serko ia nina, "Khianat! Khianat!"
14 La ate Joyada munuh Atalia i bas Rumah Pertoton e, emaka ilebuhna puanglima tentera e jenari nina, "Rintak ia ndarat arah kelang-kelang barisen pengawal e, janah adi lit kalak si atena mulahisa, bunuh minter."
15 Itangkap kalak ndai Atalia, ibabana ku istana, janah i je ibunuhna deher Pintu Gerbang Kuda.
16 Kenca bage isuruh Joyada Raja Joas ras rayat gelah ikut ras ia erbahan sada perpadanen maka kerina ia tetap bangsa TUHAN.
17 Jenari lawes ia kerina ku rumah pertoton Baal emaka iruntuhkenna rumah pertoton e. Iperperkenna batar-batar ras berhala-berhala si lit i je, jenari ibunuhna Mattan imam Baal, i lebe-lebe batar-batar ndai.
18 Isuruh Joyada imam-imam ras kalak Lewi e ertugas ndahiken dahin i bas Rumah Pertoton. Kalak enda arus ndahiken tugas-tugas si nggo iendesken Raja Daud nai man bana. Janah kalak enda me nutung persembahen si ipersembahken man TUHAN sue ras Undang-undang Musa. Kalak enda pe ertanggung jawab ngurus ende-enden dingen ngaturken perayan-perayan.
19 Isuruh Joyada pe pengawal si ertugas i bas pintu gerbang Rumah Pertoton gelah kalak si la bersih rikutken aturen agama ula bengket ku bas.
20 Puanglima tentera, peminpin-peminpin kota, wakil-wakil rayat ras kerina rayat ngikutken Joyada i bas sada pawai naruhken raja i bas Rumah Pertoton e nari ku istana. Bengket ia kerina arah pintu gerbang si mbelin, jenari kundul raja i bas kursi kinirajan.
21 Kerina rayat dem alu keriahen ukur, janah kota e nggo teneng, sabap genduari Atalia nggo ibunuh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA