Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ La ndekahsa kenca si e reh tentera Moap ras Amon radu ras temanna bangsa Meun, nerang Juda.

² Piga-piga kalak persuruhen reh ndahi Josapat nina, "Nterem tentera Edom nggo reh i lepar Lawit Mate nari, atena nerang kam. Hasason Tamar nggo italukenna." (Gelar si debanna eme Engedi.)

³ Mbiar Josapat, emaka ertoto ia man TUHAN mindo gelah ItuduhkenNa dalan man bana. Kenca bage iperentahkenna maka kerina kalak i belang-belang negeri e erpuasa.

⁴ Kerina kalak si ringan i kota-kota Juda, pedas-pedas lawes ku Jerusalem mindo ajar i bas TUHAN nari,

⁵ emaka kerina ia ras kalak si tading i Jerusalem pulung i bas kesain si mbaru Rumah Pertoton. Reh Raja Josapat jenari tedis ia i lebe-lebe kalak ndai

⁶ jenari ertoto ia nina, "O TUHAN, Dibata nu nini-nini kami. Kam kap si ngerajai kerina bangsa-bangsa i babo doni i Surga nari. Kam kap si megegehna ras si meganjangna. Ise pe la ngasup ngelawan Kam.

⁷ Kam kap Dibata kami. Sanga BangsaNdu miser ku negeri enda, IpelawesNdu bangsa si ringan i jenda, jenari IberekenNdu negeri enda man kesusuren Abraham TemanNdu e, gelah jadi sikerajangna seh rasa lalap.

⁸ Nggo ia tading i jenda dingen nggo ipajekkenna sada Rumah Pertoton guna mereken kemulian man BaNdu, sabap iteh BangsaNdu e

⁹ maka kune ia ndatken ukumen erkiteken dosa-dosana, umpamana perang, penakit si mehantu, ntah pe kelihen si mesangat, banci ia reh dingen tedis i lebe-lebe Rumah Pertoton ras i lebe-LebeNdu enda. Banci ia ertoto man BaNdu i bas paksa kesusahenna, janah nggit Kam ndengkehken ras nampati ia.

¹⁰ Genduari nggo reh bangsa Amon, bangsa Moap ras bangsa Edom nerang kami. Sanga nini-nini kami luar i Mesir nari, la IbereNdu nini-nini kami e mengketi negeri-negeri kalak ah ndai, emaka isilahi nini-nini kami e negeri-negeri e janah la ikernepkenna bangsa-bangsa e.

¹¹ Genduari bagenda me ia erbalas reh lako pelawes kami i bas negeri si nggo IberekenNdu man kami enda.

¹² Kam kap Dibata kami! Ukumlah ia, sabap la kami ngasup ngelawan tentera musuh si nterem si nerang kami enda. Lanai ieteh kami si man bahanen tapi man BaNdu kami mindo penampat."

¹³ Kerina kalak Juda ras ndeharana bage pe anak-anakna tedis i lebe-lebe Rumah Pertoton e.

¹⁴ Kesah TUHAN nusur ku sekalak kalak Lewi si lit i tengah-tengah jelma si nterem e. Gelarna Jahasiel anak si Sakaria; ia anggota terpuk Asap dingen kesusuren Asap erkiteken Matania, Jeiel ras Benaya.

¹⁵ Nina Jahasiel, "O Raja, bage pe kerina kalak Juda ras Jerusalem; bagenda nina TUHAN, 'Tetap lah ukurndu, ula mbiar ngalaken tentera si nterem e. Sabap sebo kam si erperang tapi Aku.

¹⁶ Seranglah pagi ia sanga ia nangkeng-nangkeng ku Sis. Ijumpaindu ia pagi i ujung baluren si nuju ku taneh mesawang deher Jeruel.

¹⁷ Labo perlu kam ikut erperang. Buat inganndu janah timai saja, idahndu me Aku TUHAN, mereken kemenangen man bandu. O kalak Juda ras Jerusalem, tetaplah ukurndu, ula mbiar. Laweslah erperang janah Aku TUHAN, si ngarak-ngarak kam!'"

¹⁸ Erjimpuh Raja Josapat ayona terus ku taneh janah kerina jelma si nterem erjimpuh ras ia jenari isembahna TUHAN.

¹⁹ Anggota-anggota suku Lewi i bas terpuk Kohat ras Korah nari tedis jenari alu sora megang ipujina TUHAN, Dibata Israel.

²⁰ Pepagina erpagi-pagi lawes kalak e ku tanah mesawang deher Tekoa. Nandangi ia berkat ngerana Josapat man kalak enda nina, "O Kalak Juda ras Jerusalem! Ernalemlah man TUHAN Dibatandu, maka tetap pertedisndu. Teklah man kai si ikataken Nabi NabiNa, maka seh sura-surandu."

²¹ Kenca arih-arih ras bangsa e, iperentahken raja piga-piga pemain musik make paken si biasa ipake i bas paksa-paksa perayan si badia jenari erdalan i lebe tentera e, janahna rende nina, "Pujilah TUHAN! Keleng AteNa tetap rasa lalap!"

²² Kenca kalak enda mulai rende, ikaco TUHAN barisen tentera musuh e.

²³ Iserang kalak Amon ras kalak Moap tentera kalak Edom, janah keri kal ikernepkenna. Kenca bage ia ka sibunuhen sapih-sapih ia.

²⁴ Kenca tentera Juda seh i bas sada menara si lit i bas taneh si mesawang e, itatapna ku musuh e dingen idahna maka kerina musuh-musuh e nggo amparen i babo taneh, mate. La lit sekalak pe si pulah.

²⁵ Josapat ras tenterana ngincuah muat barang tabanen perang e. I je idatca melala asuh-asuhen, persedian pangan, uis, ras barang-barang si meherga si deban. Lit telu wari dekahna ia pepulungi barang tabanen perang e, tapi perban bage kal lalana, seh maka la terbabasa kerina.

²⁶ I bas wari si peempatken pulung ia kerina i Baluren Berakah jenari ipujina TUHAN kerna si nggo IbahanNa. Eme sabapna maka baluren e igelari "Berakah."

²⁷ Ipinpin Josapat tenterana mulih ku Jerusalem alu dem keriahen sabap TUHAN nggo naluken musuh-musuhna.

²⁸ Kenca ia seh i bas kota e, erbaris ia ku Rumah Pertoton iikuti sora kulcapi ras terompet.

²⁹ Kerina bangsa-bangsa mbiar kenca ibegina maka TUHAN nggo naluken musuh-musuh Israel.

³⁰ Emaka Josapat merentah alu dame, janah TUHAN mereken man bana keamanen i belang-belang negeri.

³¹ Josapat nggo jadi raja i Juda i bas umur telu pulu lima tahun. Ia merentah i Jerusalem dua pulu lima tahun dekahna. Nandena eme Asuba anak Silhi.

³² Bali ras bapana Asa, si merentah ope denga ia, ibahan Josapat si payo iakap TUHAN;

³³ tapi ingan nembah berhala la isontarkenna. Bangsa e langa mulihken ersembah alu bulat ukurna man Dibata nini-ninina.

³⁴ Kerina si debanna si ilakoken Josapat mula-mulana nari seh ku bas ujung pemerentahenna isuratken i bas Sejarah Jehu anak Hanani eme sada bagin Sejarah Raja-raja Israel.

³⁵ I bas sada paksa erteman Josapat raja Juda ras Ahasia, raja Israel si melala ngelakoken perbahanen si jahat.

³⁶ Erkongsi ia ras Esion-geber ibahanna kapal-kapal si erlayar ku Tarsis.

³⁷ Tapi Elieser anak Dodawahu, anak kuta Maresa ipandangna Josapat nina, "Sabap nggo erteman kam ras Ahasia ikernepken TUHAN me kai si nggo ibahanndu." Emaka tenggelam kapal e kerina dingen la pernah erlayar.

2 Tawarikh

Video 2 Tawarikh 20

Ikuti Kami:

KONTAK | PARTISIPASI | DONASI