Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rato Sulaiman la motossagi maddegga Padalemman Socce ban karaton kaangguy salerana dibi’.
2 Kaangguy kaparlowan jareya Sulaiman ngangguy oreng pettong polo ebu se epangangko’a bahan bangonan, ballung polo ebu se epamathela bato e pagunongan ban tello ebu nem atos mandhur se epangawase lalakon jareya.
3 Sulaiman ngerem berta reya ka Hiram rato Tirus, "Kaula ngarep sampeyan teptebba mabadha hubungan dagang sareng kaula, akadi gi’ dhimen sareng Daud rama kaula. Sampeyan ampon ajuwal ka rama kaula kaju comara Libanon se ebadhiya karatonna.
4 Samangken kaula maddegga kennengnganna kabakteyan se malolo eangguya ahormadi GUSTE Allah Pangeran kaula. E padalemman gapaneka kaula sareng ra’yat Isra’il badhi abakte ka Salerana kalaban cara ngobbar dupa sareng racegan se ro’om, sarta ros-terrosan ngatorragiya roti sasajin ka Salerana. E padalemman gapaneka jugan kaula sareng ra’yat sadajana ngatorragiya kurban obbaran sabban gi’ laggu sareng sabban lem-malem, sabban are Sabat, Are Raja Bulan Anyar sareng re-are se kusus laenna kaangguy ahormadi GUSTE Allah Pangeran kaula. Sabab Salerana ampon adika’agi sopaja oreng Isra’il ajalannagi gapaneka kaangguy salanjangnga.
5 Kaula terro sopaja Padalemman Socce se epaddegga kaula paneka aropa padalemman se agung, sabab Allah kaula lebbi agung dhari sadajana diba se ka’imma’a saos.
6 Namong salerressa tadha’ oreng settonga se kobasa maddek padalemman kaagem GUSTE Allah, sabab saanterona langnge’ se lebar saos ta’ cokop rajana manabi ebadhiya kalenggiyanna. Daddi, Padalemman Socce se epaddegga kaula paneka, paleng namong ekenneng badhi kennengnganna pangobbaranna dupa kaator ka Allah!
7 Daddi kaula nyo’ona sopaja sampeyan kasokana ngeremmagi settong oreng se penter abadhi okeran, sareng se oneng abadhi sabarang dhari emmas, salaka, paronggu, besse, jugan se penter adhi-badhi dhari kaen se bungo, bungo terrong sareng mera. Tokang gapaneka epalakowa asareng para tokang e Yehuda sareng Yerusalim se ampon epele sareng Daud, rama kaula.
8 Kaula oneng ja’ reng-oreng tokang mogerra kaju e nagarana sampeyan penter moger kajuwan, daddi kaula nyo’ona tolong kasokana sampeyan ngeremmagi ka kaula acem-macem kaju comara sareng kaju candhana dhari Libanon. Kaula nyorowa reng-oreng e nagara kaula sopaja nolongana reng-orengnga sampeyan,
9 sopaja reng-oreng gapaneka kengenga nyadhiya’agi kaju sabannya’na. Sabab Padalemman Socce se epaddegga kaula paneka kodu raja sareng bagus.
10 Kaangguy sangona reng-orengnga sampeyan bi’ kaula ekeremana gandum dhu macem, cem-samacemma dhu ebu ton ebang, anggur pa’ ratos ebu liter sareng mennya’ jaitun pa’ ratos ebu liter."
11 Menangka balessanna serradda Rato Sulaiman jareya, Rato Hiram akerem serrat kantha reya, "Sarrena PANGERAN taresna ka ommadda, panjennengngan sareng Pangeran ampon epele epadaddi ratona ommadda gapaneka.
12 Ngereng poji GUSTE Allah Pangeranna Isra’il, Se nyepta’agi langnge’ sareng bume! Salerana marenge Daud pottra se talebat bicaksana sareng penter, bannya’ pangataowanna, se samangken parappa’na aehteyar maddegga padalemman se eatorragiya ka PANGERAN sareng karaton kaangguy salerana dibi’.
13 Asareng serrat paneka abdina ngeremmagi ka panjennengngan tokang se ahli, penter sareng parekas, nyamaepon Huram.
14 Ebuna dhari suku Dan, eppa’na oreng Tirus. Orengnga penter abadhi rang-barang dhari emmas, salaka, paronggu, besse, bato sareng kaju. Jugan oneng adhi-badhi dhari kaen bungo, bungo terrong, mera, sarengngan jugan kaen linen. Oneng abadhi barang okeran model ponapa’a saos menorot parmenta’an. Ampon eatore panjennengngan makon oreng gapaneka alako asareng para tokangnga panjennengngan, jugan sareng reng-oreng se ampon oneng alako ka Daud ramaepon panjennengngan.
15 Abdina anante’a kereman gandum se dhu macem, anggur sareng mennya’ jaitun se ejanjiyagi panjennengngan.
16 Abdina makona oreng moger kaju comara dhari pagunongan Libanon se bannya’na menorot kabutowanna panjennengngan, pas etaleyana epadaddiya gitek, elanyo’agiya ka Yope lebat tase’. Dhari Yope kaju gapaneka sareng panjennengngan kengeng eangko’ ka Yerusalim."
17 Rato Sulaiman mabadha caca jiwana reng-oreng manca se badha e Isra’il, akantha se la ebadha’agi bi’ Daud, ramana. Etemmo e jadhiya badha oreng manca saratos saeket tello ebu nem atos oreng.
18 Se pettong polo ebu epangangko’ han-bahanna bangonan, ballung polo ebu epamathel bato e pagunongan, ban tello ebu nem atos oreng epangawase sarta epassrae orosan lalakon jareya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA