Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Raja Salomo netapken mbangun rumah Dibata ras istana guna dirina jine.
2 Itamana 20.000 kalak erdahin ngangkut alat-alat dingen 80.000 tukang pahat batu. Lit 3.600 kalak si ngawasi pendahin e.
3 Isuruh Salomo sekalak persuruhen ndahi Raja Hiram i Tirus ngataken, "Bahanlah usaha man bangku bali ras si ibahanndu man bapangku Raja Daud, sanga ikiremkenndu man bana kayu aras guna pembangunen istanana.
4 Aku sangana mbangun rumah pertoton guna pemuliaken TUHAN Dibatangku. Rumah Pertoton e jadi ingan si badia, ingan bangsangku ras aku nembah man BaNa alu nutung si merim-merim, ingan kami mpersembahken roti si badia man BaNa alu teratur dingen ingan kami mpersembahken tutungen tiap erpagi-pagi ras karaben, subuk sanga wari Sabat, wari Raya Bulan si Mbaru, ras wari-wari raya si deban lako pemuliaken TUHAN Dibata kami. Ia si merentahkenca maka ilakoken Israel e rasa lalap.
5 Kubangun ateku sada rumah pertoton si mbelin, sabap Dibata kami belinen asangken kerina dibata-dibata si deban.
6 Aminna pe si tuhuna labo sekalak pe ngasup mbangun rumah man BaNa, sabap kerina belang langit pe kitiksa nge man BaNa. Dage uga banci aku mbangun rumah man BaNa, lebih asang ingan nutung si merim-merim man Dibata?
7 Dage bereken man bangku sekalak si beluh ndahiken ukiren emas, pirak, tembaga ras besi, ras si ahli erbahan uis belau, uis ungu ras uis megara. Ia erdahin ras tukang si nggo ipilihi bapangku Daud i Juda ras i Jerusalem nari.
8 Kueteh maka tukang kayundu seh kal beluhna, emaka kiremken man bangku piga-piga erbage kayu cemara ras kayu cendana i Deleng Libanon nari. Kusuruh pagi tukangku nampati tukangndu,
9 ngelitken perkayun man bangku, sabap rumah pertoton si ateku kubangun e mbelin dingen lanai tanggung jilena.
10 Persedian man tukang-tukangndu, kukiremken man bandu 2.000 ton tepung gandum halus, 2.000 ton tepung gandum kasar, 400.000 liter anggur, dingen 400.000 liter minak saitun."
11 Ikirem Raja Hiram man Salomo surat balasen. Nina i bas surat e, "Erkiteken keleng ate TUHAN man BangsaNa, nggo IbahanNa kam jadi raja bangsa e.
12 Pujilah TUHAN Dibata Israel, si njadiken langit ras doni! Nggo IberekenNa man Raja Daud sada anak dilaki si pentar, dem pengertin ras pemeteh. Genduari irencanakenna mbangun rumah pertoton man TUHAN dingen mbangun istana guna dirina jine.
13 Kukiremken man bandu sada tukang si pentar dingen beluh, gelarna Huram.
14 Nandena i bas suku Dan nari dingen bapana bangsa Tirus. Ia beluh kal erbahan barang-barang i bas emas, pirak, tembaga, besi, batu ras kayu nari. Ia beluh erbahan kain belau, ungu, kain megara ras lenen. Ia beluh erbahan kerina erbage ukiren, dingen ngasup ngikutken potongen si iusulken man bana. Suruh ia erdahin ras tukang-tukangndu dingen ras si erdahin bapandu mbarenda.
15 Emaka genduari kiremken man bangku tepung, gandum, anggur ras minak saitun si ipadankenndu.
16 I deleng-deleng Libanon itabah kami kerina kayu si iperlukenndu, jenari irakitken kami man bandu arah lawit seh i Jope. I jah nari banci ibabandu ku Jerusalem."
17 Kerina kalak pertandang si tading i negeri Israel isensus Raja Salomo, bali ras si ibahan bapana Daud. Lit 153.600 kalak pertandang.
18 Itugaskenna 70.000 kalak ngangkut alat-alat bangunen, dingen 80.000 kalak mahat batu i deleng-deleng jenari iangkatna 3.600 kalak jadi pengawas, guna ngawasi pendahin e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA