Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai sogop ma Tonduy ni Naibata hubani si Asarya, anak ni si Oded.
2 Jadi laho ma ia marayak si Asa anjaha nini ma hu bani, “Tangihon ma ahu, ham Asa pakon ganup Juda ampa Benyamin. Ihasomani Jahowa do nasiam, anggo marsijoloman nasiam hu Bani. Anggo ipindahi nasiam Ia, sai na jumpah nasiam do Ia; tapi anggo itadingkon nasiam Ia, sai tadingkonon-Ni do nasiam.
3 Dokah do halak Israel seng marnaibata na sintong, anjaha seng marmalim sipangajari anjaha seng martitah.
4 Tapi anggo tarsosak sidea, mulak do sidea hubani Jahowa, Naibata ni Israel, ipindahi sidea do Ia, anjaha jumpah sidea do Ia.
5 Bani panorang ai seng marhasonangan halak kaluar pakon masuk, ai masa do hageoron bolon i tongah-tongah ni ganup pangisi ni tanoh ai.
6 Marsidoraban do ijia bangsa dompak bangsa, anjaha huta dompak huta; ai isonggoti Naibata do sidea marhitei buei hasosakan.
7 Tapi anggo nasiam, tenger ma uhur nasiam anjaha ulang ma galek tangan nasiam, ai sai na dapotan upah do horja nasiam.”
8 Jadi dob ibogei si Asa hata ai pakon panjahaion ai, na hinatahon ni Nabi Asarya, anak ni si Oded ai, gabe tenger ma uhurni, anjaha ipadaoh ma sagala gana-gana sihagigihononkon hun ganup tanoh Juda pakon Benyamin ampa humbani huta-huta, na tinaluhonni i Dolog Efraim, anjaha ipabayu do anjapanjap ni Jahowa, na i lobei ni surambih ni Rumah ni Jahowa.
9 Dob ai ipatumpu ma ganup Juda pakon Benyamin sonai homa ganup halak Efraim, Manasse ampa Simeon, na manginsolat i tongah-tongah ni sidea; ai buei tumang do humbani halak Israel mandipar hu bani, dob iidah sidea, Jahowa Naibatani do mangkasomanisi.
10 Jadi martumpu ma sidea hu Jerusalem bani bulan tolu, pasapuluhlima-tahunkon dob manrajai si Asa.
11 Manggalang ma sidea bani na sadari ai hubani Jahowa humbani taban-taban na binoan ni sidea ai, pitu ratus lombu pakon pitu ribu biribiri.
12 Iparatah sidea ma padanni laho mangindahi Jahowa, Naibata ni ompung ni sidea, humbani gok ni uhurni pakon humbani gok ni tonduy ni sidea.
13 Anjaha barang ise na so mangindahi Jahowa, Naibata ni Israel, maningon marutang hosah do, dakdanak barang na magodang, dalahi barang naboru.
14 Pala do marbulawan sidea hubani Jahowa marhasoman sora na gogoh, anjaha marhasoman olob-olob, tarompit pakon tanduk.
15 Marmalas ni uhur do ganup Juda pasal bulawan ai; ai humbani gok ni uhur ni sidea do sidea marbulawan, anjaha humbani gok ni uhur ni sidea do ipindahi sidea Ia, gabe jumpah sidea ma Ia tongon, anjaha ibere Jahowa ma bani sidea hasonangan inggot.
16 Age si Maaka, inangni ai, ipaturun Raja Asa do humbani jabatan harajaon, halani na pinaulini ai sada gana-gana bani sisombahon Ashera. Dob ai ireongkon si Asa ma gana-gana ai, anjaha itutung i habuangan ni Bah Kidron.
17 Tapi seng ipadaoh anggo panumbahan na i buntu-buntu humbani Israel; age pe tong do namin marsijoloman uhur ni si Asa bani Jahowa sadokah manggoluh ia.
18 Iboan do homa hubagas Rumah ni Naibata sibere-bere na mapansing, na humbani bapani pakon sibere-bere na mapansingni sandiri, omas, pirak, pakon parugas marbagei-bagei.
19 Anjaha seng dong masa hamunsuhon das ronsi patolupuluhlima-tahunkon dob manrajai si Asa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA