Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nikoasai Na’bi Azarya ana’na Oded ri RohNa Allata’ala,
2 sa’genna a’lampa mange assicini’ siagang Karaeng Asa, nampa nakana, "He Karaeng Asa, siagang ikau ngaseng sikontu pandudu’ Yehuda siagang Benyamin! Pilangngeri anne! A’reppeseki Batara punna a’reppesekko mae ri Ia. Punna appalakko pangngunju’ ri Batara, laNasareko. Mingka punna tena numanjampangi ri Ia, tena todong nalaNajampangiko.
3 Sallo sikali tena namanynyomba tu Israel mae ri Allata’ala matojenga, tena nakatutui hukkung-hukkung mustia naturuki ke’nanga, siagang tena imang-imang angngajarakai ke’nanga.
4 Mingka ri wattu nia’na ke’nanga lalang ri kasukkarang, appala’ tulungi ke’nanga ri Batara, Allata’alana Israel. Appalaki ke’nanga pangngunju’ nampa nisare.
5 Anjo wattua takkulleai amang taua ri lampana, lanri ri tunggala’ pa’rasangang nia’ ngaseng karicuang lompo.
6 Bansa se’reanga najallakkangi bansa maraenga, siagang kota se’reanga najallakkangi kota maraenga, lanri appabattui Allata’ala karicuang lompo mae ri ke’nanga.
7 Mingka ikau ngaseng, musti nupakajarreki pa’mai’nu siagang musti baraniko. Lania’ wassele’na usahanu."
8 Nalangngere’na Asa kananna anjo Azarya ana’na Oded, a’rinrami sumanga’na. Napakabella kabusu’mi sikontu barhala niaka ri pa’rasangang Yehuda siagang Benyamin, kammayatompa ri kota-kota le’baka nabeta ri daera monconna Efraim, nampa napakabaji’ tampa’ pakkoro’bangngang niaka ri parang lakkenna Balla’Na Batara.
9 Jai tu Efraim, tu Manasye siagang tu Simeon asse’re siagang Asa siagang ammantang ri daera kakaraenganna, lanri naciniki ke’nanga angkanaya nitulungi Asa ri Batara. Nasuro ngasengi Asa anjo ke’nanga siagang ra’ya’ Yehuda siagang Benyamin
10 a’rappung ri Yerusalem. Jari a’rappummi ke’nanga ri bulang tallu ri taung makasampulo allima ammarentana Asa.
11 Anjo alloa assarei ke’nanga ri Batara 700 sapi siagang 7.000 gimbala’, wassele’ narampasaka siagang naeranga ke’nanga ammotere’na battu a’bundu’.
12 A’janji ke’nanga mae ri Batara angkanaya lattojeng-tojengi atinna siagang pa’mai’na ke’nanga attallasa’ situru’ ero’Na Batara, Allata’alana boe-boena ke’nanga.
13 Manna inai, tau toa yareka tau rungka, bura’ne yareka baine, tenaya nattallasa’ situru’ ero’Na Batara mattantui nihukkung mate.
14 Nalompoi sa’ranna ke’nanga assumpa mae ri Batara angkanaya lanata’gala’ jarreki anjo janjinna ke’nanga. Nampa a’rannu-rannu ke’nanga appasa’ra tarompe’.
15 Sikontu ra’ya’ Yehuda rannu kabusuki nyawana lanri le’ba’namo assumpa kamma anjo siagang attojeng-tojeng pa’mai’na. Sannangi nyawana ke’nanga anynyomba ri Batara, nampa Batara mangngellai todong antarimai ke’nanga. Napakaamangi siagang sannangi ke’nanga ri daerana.
16 Nampa napammari Karaeng Asa anjo toana niarenga Maakha battu ri jama-jamanna a’jari Amma’ Karaeng lanri le’ba’na appare’ patung barhala rantasaka untu’ Asyera, dewi ri kacopponganga. Naruntungi siagang naancuru’ tabasikali Asa anjo patunga nampa natunu anjoreng ri Lappara’ Ka’bung Kidron.
17 Manna natenapa naancuru’ kabusuki Asa sikontu tampa’ panynyombanga mae ri barhalaya ri anjo pa’rasanganga, mingka ia tena pamminrana tappa’na mae ri Batara lalang kabusu’na tallasa’na.
18 Sikontu bulaeng, pera’, siagang barang-barang narampasaka lalang bundu’ manggena, kammayatompa barang-barang kalenna naboli’ kabusuki ri Balla’Na Batara untu’ a’jari Napatang Batara.
19 Sa’genna taung makatallumpulo allima ammarentana Asa tena le’bakami nia’ pole pa’bundukang ri anjo pa’rasanganga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA