Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sanapa’na ka Yerusalim, Rato Rehabeyam makompol parjuridda bannya’na saratos ballung polo ebu oreng. Parjurit jareya epele se paleng bagus dhari suku Yehuda ban Benyamin, epaperranga ban oreng Isra’il, polana terro mabaliya one kakobasa’anna ka ku-suku e bagiyan dhajana Isra’il.
2 Tape PANGERAN makon Nabbi Semaya
3 manapa’ pessen kantha reya ka Rehabeyam ban ka sakabbinna oreng e dhalem suku Yehuda ban Benyamin,
4 "Ba’na ja’ merrange Isra’il, taretanna dibi’. Kassa’ mole! Kadaddiyan reya Tang karep." Reng-oreng jareya kabbi atoro’ ka dhabuna PANGERAN sarta burung se merrangana Yerobeyam.
5 Rehabeyam alenggi e Yerusalim sarta makon oreng maddek binteng e tha-kottha se badha e dhaera Yehuda ban Benyamin, iya areya kottha:
6 Betlehem, Etam, Tekowa,
7 Bet-Zur, Sokho, Adulam,
8 Gat, Mares, Zif,
9 Adoraim, Lakhis, Azeka,
10 Zora, Ayalon ban Hebron.
11 Tha-kottha jareya epakoko bintengnga, ban saneyap kottha esaba’i komandanna pasukan. Saneyap kottha jareya ecokobi ban parsadhiya’anna kakanan, mennya’ jaitun ban anggur
12 sarta tameng ban tombak. Kalaban cara se kantha jareya, dhaera Yehuda ban Benyamin paggun badha e dhalem kakobasa’anna.
13 Mam-imam ban oreng Lewi dhari sakabbinna dhaera Isra’il entar agabung ban Rehabeyam.
14 Reng-oreng Lewi jareya ngalle dhari lon-talon ban tanana, ngalle ka Yehuda ban Yerusalim, sabab bi’ Yerobeyam sarta to-rato gantena ta’ ebagi alako daddi imamma PANGERAN.
15 Yerobeyam ngangkat mam-imam dibi’ se epaladine e saneyap kennengnganna panyemba’anna brahala, sarta kaangguy nyemba jin-ejjin sarta ca-arcana sape gabayanna dibi’.
16 Reng-oreng dhari sakabbinna suku Isra’il se pajat terro onggu abakteya ka PANGERAN, Allahna Isra’il, padha ngalle ka Yerusalim, nerowe reng-oreng Lewi jareya sopaja bisa’a ngatorragi kurban ka PANGERAN, Allah se esemba bangatowana.
17 Kalaban cara se kantha jareya karaja’an Yehuda atamba koko. Tello taon abidda reng-oreng jareya nyokong pamarenta’anna Rehabeyam pottrana Sulaiman gella’, ban odhi’ akantha gi’ jamanna pamarenta’anna Rato Daud ban Rato Sulaiman.
18 Rehabeyam araji Mahalat; ramana Mahalat jareya Yerimot, pottrana Daud, dineng ebuna iya areya Abihail pottrana Eliyab, bajana Isay.
19 Rehabeyam ban Mahalat kaagungan pottra lalake’ katello: Yeus, Semariya ban Zaham.
20 Saellana jareya Rehabeyam laju araji Ma’akha pottrana Absalom. Se kadhuwa jareya kaagungan pottra lalake’ kaempa: Abiya, Atai, Ziza ban Selomit.
21 Rehabeyam kaagungan raji ballu bellas oreng ban seller sabidak oreng, pottra lalake’ ballu lekor oreng ban pottra babine’ sabidak oreng. Dhari sakabbinna raji ban sellerra jareya se paleng ekataresnae iya areya Ma’akha.
22 Jareya sababba Abiya, pottrana Ma’akha, lebbi ekaneserre etembang tra-pottrana se laen, sarta se epele epaganteya daddi rato.
23 Rehabeyam apareng gas-tugas ka tra-pottrana kalaban bicaksana sarta nyaba’ tra-pottrana jareya e tha-kottha se abinteng e saantero Yehuda ban Benyamin. Tra-pottrana jareya eparenge kakanan ce’ bannya’na sarta esadhiyai bine sabannya’na.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA