Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sanga Raja Rehabeam seh i Jerusalem ipepulungna 180.000 tentera si mbisana, i bas daerah Juda ras daerah Benyamin nari. Ia ersura-sura lawes erperang guna ngulihken kuasana man suku Israel Utara.
2 Tapi ngerana TUHAN man Nabi Semaya
3 lako mereken tenah man Raja Rehabeam dingen man kerina suku Juda ras Benyamin nina,
4 "Ula erperang ras sapih-sapih seninandu. To mulihlah kam kerina. Kai si jadi e sura-surangKu nge kap." Ipatuhi kalak enda perentah TUHAN emaka la ia lawes ngelawan Jerobeam.
5 Rehabeam ringan i Jerusalem ibahanna benteng kota-kota Juda ras Benyamin si tersena enda eme:
6 Betlehem, Etam, Tekoa,
7 Betsur, Soko, Adulam,
8 Gat, Maresa, Sip,
9 Adoraim, Lakis, Aseka,
10 Sora, Ayalon ras Hebron.
11 Kerina kota e ibentengina alu nteguh itamakenna komendan i bas tep-tep kota, dingen i bas tiap kota isikapkenna persedian nakan, minak saitun, ras anggur.
12 Ampang-ampang ras lembing pe isikapkenna i bas tiap kota e. Alu bage daerah Juda ras Benyamin tetap ikuasaina.
13 Kerina imam-imam ras kalak Lewi i Israel reh ku Juda.
14 Itadingkenna mbalmbal ras tanehna si deban jenari miser ia ku Juda ras ku Jerusalem, sabap Raja Jerobeam ras anak-anakna la mere kalak enda erdahin jadi imam TUHAN.
15 Itangkuhkenna imam-imamna, isuruhna erdahin i bas ingan persembahen berhala, dingen nembah man setan-setan, ras man gana-gana si ibahanna bagi tempas lembu.
16 Kerina suku kalak Israel si bulat ukurna nembah man TUHAN Dibata Israel ngikutken kalak Lewi lawes ku Jerusalem, gelah i je ia mpersembahken persembahen man TUHAN, Dibata nu nini-ninina.
17 Alu bage ergegehna kerajan Juda. Janah lit telu tahun dekahna ia nampati Raja Rehabeam anak Salomo janah pergeluhna sanga pemerentahen Raja Daud ras Raja Salomo.
18 Rehabeam erjabu ras Mahalat. Bapa Mahalat eme Jerimot anak Daud, janah nandena Abihail anak Eliap, kempu Isai.
19 I bas perjabun Rehabeam ras Mahalat ipupusna telu anak dilaki eme: Jeus, Semaria, ras Saham.
20 Kenca bage erjabu ka Rehabeam ras Maaka anak si Absalom janah i je ipupusna empat anak dilaki eme: Abiya, Atai, Sisa, ras Selomit.
21 Kerina, lit sepulu waluh kemberahen Rehabeam dingen enem puluh gundikna. Anakna lit dua pulu waluh dilaki ras enem puluh diberu. I bas kerina kemberahen ras gundikna si ngenana kal ate Rehabeam eme Maaka.
22 Emaka iangkatna Abiya jadi peminpin, janah irencanakenna maka ia me pagi si nggantiken ia jadi raja.
23 Rehabeam pentar mereken tanggung jawab man anak-anakna, emaka isuruhna ringan i Juda ras Benyamin kota-kota si erbenteng e. Isikapkenna mbue perbekalen man anakna e, janah ibuatna melala diberu jadi ndeharana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA