Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai roh ma ganup marga ni halak Israel hu Hebron marayak si Daud, nini ma hu bani, “Tonggor ma holi-holimu anjaha dagingmu do hanami.
2 Domma dokah, sanggah manggoluh ope si Saul manggomgom hanami, ham do na mangarahkon hanami luar pakon masuk; anjaha domma ihatahon Jahowa bamu, ʻHo do na maningon gabe parmahan ni bangsang-Ku halak Israel, anjaha maningon gabe pambobai ni halak Israel.ʼ”
3 Sonai homa roh do ganup pangintuai-pangintuai ni halak Israel, hu bani raja ai hu Hebron; jadi marpadan ma Raja Daud pakon sidea i Hebron i lobei ni Jahowa, anjaha iminaki sidea ma si Daud gabe raja manggomgom halak Israel.
4 Marumur tolu puluh tahun do si Daud, sanggah na bangkit gabe raja ia, anjaha ompat puluh tahun do ia manrajai.
5 Pitu tahun onom bulan do ia manrajai Juda i Hebron, anjaha tolu puluh tolu tahun ia manrajai Israel pakon Juda i Jerusalem.
6 Sanggah na laho raja ai pakon balani hu Jerusalem, uhurni sihol mamorang halak Jebus, na mangingani tanoh ai, nini sidea ma hu bani, “Seng bulih ham masuk, tapi maningon usiron ni halak na mapitung pakon halak na tempang do ham, artini: Seng bulih masuk si Daud hujon!”
7 Tapi italuhon si Daud ma benteng Sion, ai ma huta ni si Daud sisonari.
8 Bani ari na sasada ai ihatahon si Daud do, “Barang ise na sihol manaluhon halak Jebusi ai, maningon hun lubang ni bah ai ma ia masuk.” Magigi tumang do si Daud mangidah halak na tempang ampa na mapitung, halani ai do ase ihatahon halak, “Halak na mapitung pakon halak na tempang seng bulih masuk hu rumah.”
9 Jadi marianan ma si Daud ibagas benteng ai, anjaha igoran ma ai huta ni si Daud; dob ai ipauli si Daud ma batar-batar inggot, singgan ni Milo dompak bagas.
10 Dob ai lambin timbul ma si Daud, ai ihasomani Jahowa, Naibata Zebaot do ia.
11 Isuruh si Hiram raja hun Tirus ma suruhanni marayak si Daud, mamboan hayu ares pakon tuhang hayu ampa tuhang batu laho manuhangi rumah ni si Daud.
12 Jadi mangahap ma si Daud, na dob pinatotap ni Jahowa do ia gabe raja i Israel, anjaha na dob pinatimbul-Ni do harajaonni halani bangsa-Ni halak Israel.
13 Dob ai itambahi si Daud ope naboru i Jerusalem bahen parinangonni dob roh ia hun Hebron; jadi tubuh ope bani si Daud anak pakon boru.
14 Anjaha on do goran-goran ni anakni, na itubuhkon i Jerusalem: Si Samua, si Sobab, si Natan, si Salomo,
15 si Jibhar, si Elisua, si Nepeg, si Japia,
16 si Elisama, si Eliada pakon si Elipelet.
17 Tapi dob ibogei halak Palistim, na dob iminaki si Daud gabe raja manggomgom Israel, tangkog ma ganup halak Palistim sihol marburu si Daud. Jadi dob ibogei si Daud barita ai, tuad ma ia hu benteng ai.
18 Manrohan ma halak Palistim, anjaha merap ma sidea i habungan Refaim.
19 Dob ai isungkun si Daud ma Jahowa, nini ma, “Bulih do ahu tangkog mangimbang halak Palistim, anjaha ondoskonon-Mu do sidea hubagas tanganku?” Jadi ihatahon Jahowa ma hu bani si Daud, “Tangkog ma ho, ai sai na ondoskonon-Ku do halak Palistim hubagas tanganmu.”
20 Dob ai das ma si Daud hu Baal-Perasim, anjaha italuhon si Daud ma sidea ijai, nini ma, “Domma ipaerap Jahowa munsuhku i lobeihu songon parmerap ni bah marbanggal.” Halani ai do ase igoran ianan ai Baal-Perasim, artini Tuhan na pamerapkon.
21 Ipantadingkon halak Palistim ma ijai gana-gana ni sidea, jadi ibuat si Daud ampa balani ai ma ai.
22 Iulaki halak Palistim ma use tangkog, anjaha merap ma sidea i habungan Refaim.
23 Dob isungkun si Daud use Jahowa, nini ma mambalosi, “Seng bulih ho tangkog manjumpahkon sidea, tapi hun pudi ma sidea dorab, anjaha hun hayu baka ai ma ho roh mangimbang sidea.
24 Anggo ibogei ho ma gurojob ni halak mardalan i ujung ni hayu baka ai, jomba ma sidea; ai sanggah ai ma luar Jahowa mardalan i lobeimu laho manaluhon bala ni halak Palistim.”
25 Jadi ibahen si Daud ma sonai romban hu bani tonah ni Jahowa hu bani; gabe italuhon ma halak Palistim singgan ni Geba nari das hu Geser.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA