Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dob ibogei si Isboset, anak ni si Saul ai, na dob matei si Abner i Hebron, miloh ma hinsah ni uhurni, anjaha tarsonggot ganup halak Israel.

² Tapi adong do dua halak hasoman ni anak ni si Saul ai, ai ma pambobai ni balani; goran ni na sada si Baana, anjaha goran ni na sada nari si Rekab, anak ni si Rimmon, halak Beerot, hun bani marga Benjamin. Masuk hu Benjamin do ihira Beerot ai;

³ na maporus do halak Beerot ai hu Gitaim, lanjar manginsolat sidea ronsi sadari on.

⁴ Ambahni ai adong do bani si Jonatan, anak ni si Saul ai, sada anak, na repat naheini duasi. Lima tahun do umurni sanggah roh barita pasal si Saul ampa si Jonatan ai hun Jesreel. Jadi iangkat na marorotsi ma ia laho maporus, gabe madabuh ma ia lanjar repat. Ia goranni si Mepiboset do.

⁵ Dob ai laho ma na dua anak ni si Rimmon, halak Beerot ai, si Rekab pakon si Baana, gabe masuk ma sidea hira-hira tongah arian hu rumah ni si Isboset, tudu sanggah modom arian ia.

⁶ Jadi masuk ma sidea hu parsitongahan ni rumah ai, ipakulah songon na mangalop gandum. Tonggor ma, adong do sada naboru ijai na mangkoseihon gandum, gabe itobak sidea ma boltokni, gabe boi ma si Rekab pakon si Baana anggini ai masuk torus hu rumah ai.

⁷ Sanggah na masuk ai sidea hubagas rumah ai, tudu modom ia bani podomanni ibagas kamar podomanni, gabe ibunuh sidea ma ia anjaha itampul sidea ma uluni. Iboan sidea ma uluni ai, dob ai laho ma sidea mandalani hanopan ai torus sabornginni ai;

⁸ iboan sidea ma ulu ni si Isboset ai hu bani si Daud i Hebron. Nini sidea ma dompak raja ai, “Andon ma ulu ni si Isboset, anak ni si Saul, imbang-imbangmu ai, na mangindahi hosahmu; Jahowa do na mambalaskon tuannami, raja in sadari on hu bani si Saul pakon hu bani ginomparni.”

⁹ Tapi nini si Daud ma mambalosi si Rekab pakon si Baana anggini ai, anak ni si Rimmon halak Beerot ai, “Songon sintongni manggoluh Jahowa, na paluahkon tonduyhu hun bani ganup hasosakan;

¹⁰ halak na mamboan barita bangku, ʻDomma matei si Saul!ʼ Na mangagan siboan barita na madear ia, hutangkap do ia anjaha hubunuh i Ziklag, ai ma upah na hubere bani halani baritani ai.

¹¹ Samintolah halak parjahat ma, na mamunuh sada halak na bonar i rumahni, mintor lang ma tungguonku darohni hun tangannima, anjaha siapkononni hanima hun tanoh on?”

¹² Dob ai ihatahon si Daud ma juakjuakni mambunuh sidea; itampul ma tangan ni sidea pakon nahei ni sidea anjaha igantungkon ma sidea dohorhon bongbongan na i Hebron. Ibuat sidea ma homa ulu ni Isboset, anjaha itanom ma ai ibagas tanoman ni si Abner i Hebron.

2 Samuel

Video 2 Samuel 4

Ikuti Kami:

KONTAK | PARTISIPASI | DONASI